ສາລີ, ມັນຕົ້ນ ແລະສັດລ້ຽງຍັງເປັນສິນຄ້າທີ່ສົ່ງອອກຂອງໄຊຍະບູລີ

  ທ່ານ ຄຳຫຼັາ ຜິວວັນນາ ຫົວໜ້າພະແນກກະສິກຳ ແລະປ່າໄມ້ແຂວງໄດ້ກ່າວຕໍ່ນັກຂ່າວແຂວງໄຊຍະບູລີເມື່ອບໍ່ດົນມານີ້ວ່າ: ໃນໄລຍະ 1 ປີຜ່ານມາພະແນກກະສິກຳ ແລະປ່າໄມ້ແຂວງ, ໄດ້ເອົາໃຈໃສ່ຢ່າງຕັ້ງໜ້າໃນການຊຸກຍູ້ສົ່ງເສີມປະຕິບັດແຜນພັດທະນາວຽກງານກະສິກຳ ແລະປ່າໄມ້ຕາມຍຸດທະສາດ 3 ເສົາຄ້ຳ 4 ແຜນງານ ແລະແຜນດຳເນີນງານຕິດພັນກັບການຈັດຕັ້ງປະຕິບັດ 13 ນະໂຍບາຍສະໜັບສະໜູນໂຄງການຄ້ຳປະກັນສະບຽງອາຫານ ແລະ 8 ນະໂຍບາຍສະໜັບສະໜູນໂຄງການລ້ຽງສັດເປັນສິນຄ້າ.

 ຜ່ານການຈັດຕັ້ງປະຕິບັດໃນໄລຍະຜ່ານມາເຫັນວ່າການປູກພືດເປັນສິນຄ້າ ແລະລ້ຽງສັດເປັນສິນຄ້າໃນທົ່ວແຂວງຍັງມີການຂະຫຍາຍຕົວ ແລະແຜ່ຂະຫຍາຍຂຶ້ນຕາມລຳດັບເຊັ່ນ: ເນື້ອທີ່ການຜະລິດກະສິກຳເປັນສິນຄ້າຜ່ານການຈັດຕັ້ງປະຕິບັດຕົວຈິງໄດ້ 1 ແສນກວ່າເຮັກຕາ ເທົ່າກັບ 95,82% ຂອງແຜນການ, ຜົນຜະລິດໄດ້ 1.343.417 ໂຕນ, ໃນນີ້ພືດທີ່ເປັນເສດຖະກິດຫຼັກຍັງແມ່ນສາລີແຂງ,ເນື້ອທີ່ 28,7 ພັນເຮັກຕາ, ຜົນຜະລິດໄດ້ 1 ລ້ານກວ່າໂຕນ, ພ້ອມນີ້ການລ້ຽງສັດເປັນສິນຄ້າກໍ່ມີການຂະຫຍາຍຕົວ, ຈາກການລ້ຽງແບບທຳມະຊາດຫັນໄປສູ່ແບບລ້ຽງເປັນຟາມ,ໃນນີ້ມີຟາມລ້ຽງງົວ-ຄວາຍ 49 ຟາມ, ມີງົວ-ຄວາຍ 3 ພັນໂຕ, ຟາມລ້ຽງໝູມີ 29 ຟາມ, ມີໝູ 12,32 ພັນໂຕ, ຟາມລ້ຽງໄກ້ພັນໄຂ່ມີ 21 ຟາມມີໄກ່ 38,45 ພັນໂຕ, ຟາມໄກ່ພັນຊີ້ນມີ 4 ຟາມ, ມີໄກ່ 10,9 ພັນໂຕ, ດ້ານການລ້ຽງປາກໍ່ມີການຂະຫຍາຍຕົວເຊັ່ນດຽວກັນທົ່ວແຂວງມີໜອງປາທັງໝົດ 10,79 ພັນໜອງ, ມີເນື້ອທີ່ທັງໝົດ 1 ພັນກວ່າເຮັກຕາ, ປ່ອຍປາທັງໝົດ 44 ລ້ານກວ່າໂຕ, ນອກນີ້ຍັງໄດ້ລ້ຽງປາໃນກະຊັງມີ 100 ກວ່າກະຊັງມີປາ 186.500 ໂຕ.

  ໃນ 1 ປີຜ່ານມາແຂວງໄຊຍະບູລີສາມາດສົ່ງອອກຜົນຜະລິດກະສິກຳ ແລະສັດລ້ຽງໄດ້ຫຼາຍກວ່າ 30 ລ້ານໂດລາ,ເປັນຕົ້ນແມ່ນສາລີແຂງຈຳນວນ 34.450 ໂຕນ, ມູນຄ່າ 2,8 ລ້ານໂດລາ, ມັນຕົ້ນແຫ້ງ 62.026 ໂຕນ, ມູນຄ່າ 6,3 ລ້ານໂດລາ, ໝາກເດືອຍ 23.026 ໂຕນ, ມູນຄ່າ 1 ລ້ານໂດລາ ແລະ ກ້ວຍຫອມ 50 ພັນໂຕນ,ມູນຄ່າ 9,3 ລ້ານໂດລາ,ນອກຈາກສົ່ງຜົນຜະລິດກະສິກຳອອກຕ່າງປະເທດແລ້ວຍັງໄດ້ສົ່ງຂາຍໄປຕ່າງແຂວງເຊັ່ນ: ແຂວງຫຼວງພະບາງ, ແຂວງວຽງຈັນ, ແຂວງຫຼວງນ້ຳທາ ແລະແຂວງຜົ້ງສາລີ,ຜະລິດຕະພັນສ່ວນໃຫ່ຍແມ່ນສາລີຈຳນວນ 4.522 ໂຕນ, ມູນຄ່າ 54 ພັນໂດລາ, ເຂົ້າສານ 107 ໂຕນມູນຄ່າ 75 ພັນໂດລາ,ເຂົ້າເປືອກ 185 ໂຕນມູນຄ່າ 65 ພັນໂດລາ,ດ້ານສົ່ງສັດເປັນສິນຄ້າທັງພາຍໃນ ແລະສົ່ງອອກຕ່າງແຂວງໄດ້ທັງໝົດ 14.839 ໂຕ,ຄິດເປັນມູນຄ່າ 59.628 ລ້ານກີບ, ໃນນີ້ຄວາຍ 5.386 ໂຕ ມູນຄ່າ 40.395 ລ້ານກີບ, ງົວ 4.383 ໂຕ,ມູນຄ່າ 13.149 ລ້ານກີບ, ໝູ 5.070 ມູນຄ່າ 6.600 ລ້ານກີບ. 

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์