ບົວລະພາ ທຳລາຍຂອງກາງຫຼາຍລາຍການ

  ວັນທີ 17 ພຶດສະພາຜ່ານມາ ທີ່ເດີ່ນສະໂມສອນເມືອງບົວລະພາ ແຂວງຄຳມ່ວນ ກອງບັນຊາການ ປກສ ເມືອງ ໄດ້ຈັດພິທີທຳລາຍຂອງກາງເພື່ອແກ້ໄຂປະ ກົດການຫຍໍ້ທໍ້ ປີ 2019 ຂຶ້ນ ໂດຍພາຍໃຕ້ການເຂົ້າຮ່ວມຂອງທ່ານ ແກ້ວອຸດອນ ບຸດສິງຂອນ ເຈົ້າເມືອງໆບົວລະພາ, ທ່ານ ພັທ ວົງມາ ໄຊສີຈັນ ຫົວໜ້າກອງບັນຊາການ ປກສ ເມືອງບົວລະພາ ແລະ ພະນັກງານຕະຫຼອດຮອດອຳນາດການປົກຄອງບ້ານ, ນາຍບ້ານພາຍໃນເທສະບານເມືອງບົວລະພາເຂົ້າຮ່ວມ.

  ຂອງກາງທີ່ນຳມາທຳລາຍໃນຄັ້ງນີ້ປະກອບມີອາວຸດລ່າເນື້ອປະເພດປືນແກັບ 204 ກະບອກ, ປືນແວງ 5 ກະບອກ, ເຄື່ອງໄຟຟ້າຊອດປາ 12 ເຄື່ອງ ແລະ ໝາກແຕກ 2 ໜ່ວຍ, ສ່ວນໝາກແຕກແມ່ນໄດ້ມອບໃຫ້ກັບອົງການເກັບກູ້ລະເບີດປະຈຳເມືອງບົວລະພາເປັນຜູ້ທຳລາຍ.

  ໃນພິທີດັ່ງກ່າວແມ່ນຍັງໄດ້ຮັບຝັງການລາຍງານການຈັດຕັ້ງປະຕິບັດການເກັບກູ້ອາວຸດລ່າສັດສັດນໍ້າ-ສັດປ່າ ປະເພດຕ່າງໆເປັນຕົ້ນແມ່ນປືນແກັບ, ປືນ ແວງ ແລະເຄື່ອງໄຟຟ້າຊັອດປາໂດຍແມ່ນການຈັດຕັ້ງປະຕິບັດຄຳສັ່ງແນະນຳຂອງທ່ານນາຍົກລັດຖະມົນຕີສະບັບເລກທີ 27/ນຍ, ລົງວັນທີ 5 ຕຸລາ 2011 ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນແມ່ນການລ່າສັດນໍ້າ-ສັດປ່າ ແບບຊະຊາຍ, ໃນນັ້ນກໍ່ເພື່ອເປັນການຟື້ນພູຄວາມອຸດົມສົມບູນຂອງສັດນໍ້າ-ສັດປ່າໃຫ້ນຳໃຊ້ໄດ້ຢ່າງຍາວນານ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 22/05/2019