ຍົກຄວາມຮູ້ລະບົບຊຳລະສະສາງໃຫ້ທະນາຄານທຸລະກິດ

 ເພື່ອເປັນການພັດທະນາການຄຸ້ມຄອງທະນາຄານທຸລະກິດໃນຍຸກການປະຕິບັດອຸດສາຫະກໍາ 4,0 ແລະສອດຄ່ອງກັບແຜນສ້າງຄວາມເຂັ້ມແຂງແກ່ຂົງເຂດການພັດທະນາທະນາຄານທຸລະກິດໃນ ສປປ ລາວ ໃຫ້ທັນຕໍ່ຄວາມຕ້ອງການຂອງລູກຄ້າ ແລະຮັບຮອງກັບສິ່ງທ້າທາຍໃນລະບົບຊໍາລະສະສາງຂ້າມແດນໃຫ້ມີຄວາມປອດໄພໂດຍອີງຕາມຜົນເກັບກໍາຂໍ້ມູນໃນປີ 2018 ມີຈໍານວນເງິນເຖິງ 40 ລ້ານໂດລາ ມີການໂອນຜ່ານໂດຍບັນດາທະນາຄານທຸລະກິດທົ່ວໂລກທີ່ເປັນສະມາຊິກຂອງ SWIFT.

  ສະນັ້ນສະມາຄົມທະນາຄານລາວຮ່ວມກັບຫ້ອງການ SWIFT ທີ່ຮັບຜິດຊອບ ສປປ ລາວ, ສສ ຫວຽດນາມ ແລະ ກໍາປູເຈຍ ຈັດກອງປະຊຸມສໍາມະນາໃນ ຫົວຂໍ້ນະວັດຕະກໍາລະບົບການຊໍາລະສະສາງ ແລະແຜນແມ່ບົດການຈັດຕັ້ງປະຕິບັດລະບົບການຊໍາລະສະສາງຂອງບັນດາປະເທດທີ່ເປັນສະມາຊິກ SWIFT ແລະ Roadmap ຂຶ້ນໃນວັນທີ 21 ພຶດສະພາ 2019 ທີ່ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມຂອງທ່ານ ນາງ ແສງດາວອນ ບັງອອນແສງເດດ ເລຂາທິການສະມາຄົມທະນາຄານລາວ, ທ່ານ ນາງ Sharon Toh ຫົວໜ້າ SWIFT ປະຈໍາອາຊຽນ ແລະ ທ່ານນາງ Laetia Moncarz ຜູ້ອໍານວຍການຮັບຜິດຊອບຕະຫຼາດຊໍາລະສະສາງປະຈໍາອາຊຽນ, ມີພະນັກງານວິຊາການທີ່ຮັບຜິດຊອບວຽກງານພັດທະນາຜະລິດຕະພັນ, ໄອທີ ແລະ ພະແນກບໍລິຫານທຶນຈາກ 36 ທະນາຄານທຸລະກິດ.

  ກອງປະຊຸມດັ່ງກ່າວໄດ້ນໍາສະເໜີແຜນແມ່ບົດການພັດທະນານະວັດຕະກໍາການຊໍາລະສະສາງຜ່ານ SWIFT, ໂດຍລົງເລິກເຖິງຂັ້ນຕອນການເກັບກໍາຂໍ້ມູນ ຂອງລູກຄ້າ, ຂັ້ນຕອນການລາຍງານຂອງບັນດາທະນາຄານທຸລະກິດທີ່ຈະໄດ້ຈັດຕັ້ງປະຕິບັດຕາມເງື່ອນໄຂຄົບຖ້ວນໃນປີ 2020. ທັງນີ້ກໍເພື່ອອໍານວຍຄວາມ ສະດວກໃຫ້ແກ່ບັນດາທະນາຄານທຸລະກິດສາມາດອໍານວຍຄວາມສະດວກໃນການສະໜອງການບໍລິໂອນເງິນລະຫວ່າງປະເທດມີຄວາມໄວຂຶ້ນ,ຮັບປະກັນຄວາ ມຖືກຕ້ອງ-ໂປ່ງໃສ ແລະສາມາດຂະຫຍາຍການບໍລິການລູກຄ້າທະນາຄານຫຼາຍຮູບແບບ.

  ສໍາລັບສະມາຄົມທະນາຄານລາວສ້າງຕັ້ງຂຶ້ນໃນປີ 2001 ແລະເປັນສະມາຊິກຂອງທະນາຄານອາຊຽນໃນປີ 2004. ເຄື່ອນໄຫວໃນຂອບເຂດພາຍໃນປະເທດ ເຕົ້າໂຮມຄວາມສະມັກຄີບັນດາທະນາຄານທຸລະກິດໃຫ້ເຄື່ອນໄຫວຕອບສະໜອງຕາມຄວາມຕ້ອງການແກ່ການຂະຫຍາຍຕົວທຸລະກິດແຕ່ລະໄລຍະ. ນອກນັ້ນ ສະມາຄົມທະນາຄານລາວຍັງເຄື່ອນໄຫວເປັນຕົວແທນໃຫ້ແກ່ບັນດາທະນາຄານທຸລະກິດດຶງດູດການລົງທຶນ, ການຮ່ວມມືບໍລິການການເງິນ ແລະ ການພັດທະ ນາເຕັກໂນໂລຊີມາຮັບໃຊ້ແກ່ການບໍ ລິການການເງິນສະໜອງແກ່ການຄ້າ ແລະ ການລົງທຶນກໍຄືການຈັດຕັ້ງປະຕິບັດແຜນການເຊື່ອມໂຍງປະຊາຄົມເສດຖະ ກິດອາຊຽນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์