ລັດກຳນົດສວນກ້ວຍໃນລາວຕ້ອງໄດ້ມາດຖານກະສິກຳສະອາດເທົ່ານັ້ນ ສະເພາະຢູ່ ນວ ຢຸດປູກໃໝ່

  ລັດຖະບານກໍຄືກະຊວງກະສິກຳ ແລະປ່າໄມ້ລະບຸວ່າ ທຸກໂຄງການສວນກ້ວຍໃນລາວຕ້ອງດຳເນີນການໃຫ້ໄດ້ຕາມມາດຕະຖານກະສິກຳສະອາດເທົ່ານັ້ນຈື່ງຈະອະນຸຍາດດຳເນີນການໄດ້ຂະນະທີ່ຢູ່ນະຄອນຫຼວງວຽງຈັນ ແມ່ນໃຫ້ຢຸດສຳລັບການຂະຫຍາຍເນື້ອທີ່ປູກກ້ວຍໃໝ່.

 ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້ເປີດເຜີຍຕໍ່ສື່ມວນຊົນເມື່ອວັນທີ 21 ພຶດສະພາຜ່ານມາວ່າ: ກ້ວຍແມ່ນໜື່ງໃນຈຳນວນ 5 ພືດກະສິກຳທີ່ນັກລົງທຶນຈີນມາລົງທຶນປູກຢູ່ລາວນັບແຕ່ປີ 2009 ເປັນຕົ້ນມາເລີ່ມຕົ້ນແມ່ນຢູ່ບັນດາແຂວງພາກເໜືອຂອງລາວດ້ວຍຮູບແບບການເຊົ່າ,ສຳປະທານທີ່ດິນນຳປະຊາຊົນ, ຈ້າງແຮງງານປະຊາຊົນປູກ,ບົວລະບັດຮັກສາ ແລະ ເກັບກ່ຽວຜົນຜະລິດເພື່ອສົ່ງອອກໝາກກ້ວຍໄປຍັງຕະຫຼາດ ສປ ຈີນ.

  ຫຼັງຈາກນັ້ນສວນກ້ວຍກໍໄດ້ມີການຂະຫຍາຍຢ່າງກ້ວງຂວາງໂດຍສະເພາະຢູ່ແຂວງຜົ້ງສາລີ, ຫຼວງນ້ຳທາ, ບໍ່ແກ້ວ, ອຸດົມໄຊ, ໄຊຍະບູລີ, ຫຼວງພະບາງ, ວຽງ ຈັນ, ນະຄອນຫຼວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ເຊກອງ ແລະແຂວງອັດຕາປື ຈາກການຂະຫຍາຍດັ່ງກ່າວກໍມີຫຼາຍບັນຫາເກີດຂຶ້ນຕາມມາເປັນຕົ້ນ: ບັນຫາການນຳໃຊ້ ເນື້ອທີ່ດິນ, ການນຳໃຊ້ຝຸ່ນ, ຢາປາບສັດຕູພືດເຂົ້າໃນຂະບວນການປູກກ້ວຍອັນມີຜົນກະທົບໂດຍກົງຕໍ່ສີ່ງແວດລ້ອມໂດຍສະເພາະແມ່ນດິນ ແລະແຫຼ່ງນ້ຳທີ່ໃຊ້ເຂົ້າໃນການຫຼໍ່ລ້ຽງສັດສາວາສີ່ງລວມທັງແຮງງານ ແລະປະຊາຊົນໃກ້ຄຽງໄດ້ຮັບຄວາມເດືອດຮ້ອນເປັນຕົ້ນສຸຂະພາບອອ່ນເພຍ ແລະເສຍຊີວິດຈຳນວນໜື່ງທາງແຂວງພາກເໜືອ.

  ຈາກສະພາບຄືດັ່ງກ່າວທ່ານ ບຸນຂວາງ ຄຳບຸນເຮືອງ ກ່າວຕື່ມວ່າ: ລັດຖະບານກໍໄດ້ມີການອອກກົດໝາຍ, ນິຕິກຳ ແລະແຈ້ງການຫຼາຍສະບັບກ່ຽວກັບ ການປູກກ້ວຍໃນຂອບເຂດທົ່ວປະເທດໂດຍຫ້າມເດັດຂາດປູກກ້ວຍໃສ່ເນື້ອທີ່ດິນທີ່ສາມາດປູກພືດຊະນິດອື່ນໄດ້ຢູ່ເປັນຕົ້ນແມ່ນໄຮ່ນາປູກເຂົ້າ, ຈຸດໃກ້ແຫຼ່ງນ້ຳ, ໃກ້ຊຸມຊົນພ້ອມດຽວກັນນັ້ນກໍໄດ້ເອົາໃຈໃສ່ເຂັ້ມງວດຄຸ້ມຄອງການນຳເຂົ້າຢາຂ້າຫຍ້າທີ່ຫວງຫ້າມ, ຢາຂ້າແມງໄມ້ທີ່ກໍ່ໃຫ້ເກີດເຊື້ອລາ.

 ຂະນະທີ່ເວລານີ້ລັດຖະບານແມ່ນໄດ້ມີການໂຈະສຳລັບການອະນຸຍາດປູກກ້ວຍສຳລັບໂຄງການໃໝ່ຫາກບໍ່ຜ່ານເອກະສານດ້ານສີ່ງແວດລ້ອມໂດຍສະເພາະແມ່ ນເລື່ອງມາດຕະຖານກະສິກຳສະອາດ ກໍຈະບໍ່ອະນຸຍາດໃຫ້ດຳເນີນການຕໍ່ຢ່າງເດັດຂາດສຳລັບໂຄງການເກົ່າຄະນະຮັບຜິດຊອບໄດ້ມີຄວາມເອົາໃຈໃສ່ໃນການລົງຕິດຕາມກວດກາຂຶ້ນທະບຽນສວນກ້ວຍໃຫ້ຖືກຕາມຂັ້ນຕອນກະສິກຳສະອາດໂດຍມີການຈັດຝຶກອົບຮົມແຮງງານ ແລະຜູ້ປະກອບການນອກຈາກນີ້ກໍມີການ ລົງຕິດຕາມຫ້າງຮ້ານທີ່ຂາຍສິນຄ້າປະເພດຢາບຳລຸງ ແລະປາບສັດຕູພືດ.

ສະເພາະຢູ່ນະຄອນຫຼວງວຽງຈັນ ຮອງລັດຖະມົນຕີກະຊວງກະສິກຳ ແລະ ປ່າໄມ້ກ່າວວ່າ: ເວລານີ້ລັດຖະບານໄດ້ມີຄຳເຫັນຢຸດຕິບໍ່ໃຫ້ຂະຫຍາຍເນື້ອທີ່ປູກກ້ວຍໃໝ່ອອກຕື່ມສ່ວນທີ່ມີການເຊົ່າດິນປະຊາຊົນບຸກເບີກເພື່ອປູກຢູ່ເມືອງນາຍຊາຍທອງ ແລະ ເມືອງປາກງື່ມແມ່ນໄດ້ແນະນຳໃຫ້ປູກພືດເສດຖະກິດອື່ນທົດ      ແທນເປັນຕົ້ນແມ່ນສາລີ ແລະມັນຕົ້ນເນື່ອງຈາກເປັນຫ່ວງບັນຫາສີ່ງແວດລ້ອມຍ້ອນມີຈຸດທີ່ຕັ້ງໃກ້ຊຸມຊົນ ແລະສາຂາແຫຼ່ງນ້ຳຕ່າງໆຈະໄຫຼລົງສູ່ແມ່ນ້ຳງື່ມ ທີ່ຈະນຳມາຫຼໍ່ລ້ຽງຊີວິດປະຊາຊົນຄົນເມືອງເອກຂອງປະເທດຫຼາຍແສນຄົນຊຶ່ງຖ້າວ່າໂຄງການໃດຍັງຝ່າຝືນກໍຈະໄດ້ປະຕິບັດມາດຕະການທາງກົດໝາຍຈົນກ້າວ ໄປເຖິງການທຳລາຍຖີ້ມສ່ວນໂຄງການເກົ່າທີ່ປູກແລ້ວຈຳນວນ 500 ກວ່າເຮັກ ຕາກໍຈະລົງຕິດຕາມກວດກາໃຫ້ຫັນໄປສູ່ມາດຕະຖານກະສິກຳສະອາດທັງ ໝົດຖ້າເຮັດບໍ່ໄດ້ກໍຈະບໍ່ໃຫ້ດຳເນີນການຕໍ່ໄປ.

  ແນວໃດກໍດີໃນຊຸມປີມານີ້ທ່າອ່ຽງການປູກກ້ວຍແມ່ນມີຕົວເລກຫຼຸດລົງຕໍ່ເນື່ອງ ຈາກເມື່ອກ່ອນທີ່ມີຫຼາຍເຖິງ 26 ພັນກວ່າເຮັກຕາ ປີ 2018 ມີ 20,4 ພັນເຮັກຕາ ແລະປີນີ້ ມີ 15 ພັນເຮັກຕາ ໃນຈຳນວນ 100 ກວ່າບໍລິສັດກໍຫຼຸດລົງມາເຫຼືອ 90 ບໍລິສັດຍ້ອນລັດເຂັ້ມງວດໃນການໃຊ້ສານເຄມີຕ້ອງຫ້າມ, ຈີນກໍຮັບເອົາແຕ່ສີນຄ້າປອດສານພິດ ແລະ ເກີດການລະບາດຂອງພະຍາດໂດຍໃນນັ້ນມີ 80% ແມ່ນໄດ້ຂຶ້ນທະບຽນຜະລິດກະສິກຳສະອາດຊຶ່ງໃນແຕ່ລະປີຜູ້ປະກອບການແມ່ນມີລາຍຮັບຫຼາຍຍ້ອນລາ ຄາທີ່ຕະຫຼາດ ສປ ຈີນສູງສ່ວນປະຊາຊົນຜູ້ມີສ່ວນຮ່ວມໂດຍສະເພາະແຮງງານໃນແຕ່ລະທ້ອງຖີ່ນແມນແຕກຕ່າງກັນໄປແຕ່ຢູ່ນະຄອນຫຼວງວຽງຈັນເຫັນວ່າຕໍ່າກວ່າໝູ່ 2,5-4 ລ້ານກີບຕໍ່ເຮັກຕາຕໍ່ປີ.

  ຈາກຕົວເລກດັ່ງກ່າວເຫັນວ່າປະຊາຊົນມີລາຍໄດ້ນ້ອຍກວ່າຄວາມສ່ຽງຈາກສານເຄມີຈິ່ງສະເໜີພາກສ່ວນທີ່ກ່ຽວຂ້ອງຈົ່ງມີຄວາມເອົາໃຈໃສ່ຢ່າງເຂັ້ມງວດໃນການປະເມີນບັນຫາສີ່ງແວດລ້ອມໃນທຸກໆໂຄງການເກົ່າ  ແລະໂຄງການໃໝ່ກໍເຊັ່ນດຽວກັນໃນການຕິດຕາມດ້ານເອກະສານທັງນີ້ກໍເພື່ອຄວາມປອດໄພຂອງສຸຂະພາບ ແລະຊີວິດຂອງປະຊາຊົນກ່ອນຈະໄດ້ຮັບຜົນກະທົບຢ່າງຮ້າຍແຮງຈົນບໍ່ສາມາດແກ້ໄຂໄດ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์