ເມືອງບົວລະພາ ຫາລືສ້າງສາຂາບໍລິການທະນາຄານ

ກອງປະຊຸມປຶກສາຫາລືກ່ຽວກັບການສ້າງຕັ້ງກິ່ງສາຂາບໍລິການຂອງທະນາຄານພາຍໃນເທດສະບານເມືອງບົວລະພາໄດ້ຈັດຂຶ້ນໃນວັນທີ 15 ພຶດສະພາ 2019 ພາຍໃຕ້ການເປັນປະທານຂອງທ່ານ ແກ້ວອຸດອນ ບຸດສິງຂອນ ເຈົ້າເມືອງໆ ບົວລະພາ, ທ່ານ ນາງ ແກ້ວລໍາມອນ ຜາລີສອນ ຮອງຫົວໜ້າສາຂາທະນາຄານ ການຄ້າແຂວງຄຳມ່ວນ, ມີຫົວໜ້າ, ຮອງຫົວໜ້າຫ້ອງການຕະຫຼອດຮອດພະນັກງານວິຊາການແຕ່ລະຂະແໜງການອ້ອມຂ້າງເມືອງ ແລະການຈັດຕັ້ງບ້ານເຂົ້າຮ່ວມ.

  ທ່ານ ນາງ ແກ້ວລໍາມອນ  ຜາລີສອນ ຮອງຫົວໜ້າທະນາຄານການຄ້າຕ່າງປະເທດລາວມະຫາຊົນສາຂາແຂວງຄຳມ່ວນ ໄດ້ກ່າວຈຸດປະສົງຂອງກອງປະຊຸມເພື່ອຄົ້ນຄວ້າປຶກສາຫາລືກ່ຽວກັບການສ້າງຕັ້ງກິ່ງສາຂາບໍລິການຂອງທະນາຄານໃນເທດສະບານເມືອງບົວລະພາ ຈາກນັ້ນໃນກອງປະຊຸມກໍ່ໄດ້ຄົ້ນຄວ້າ ແລະປະກອບຄໍາຄິດເຫັນ ແລະເຫັນດີເປັນເອກກະພາບໃນການສ້າງຕັ້ງກິ່ງສາຂາບໍລິການຂອງທະນາຄານພາຍໃນເທດສະບານເມືອງບົວລະພາ.

 ຈາກນັ້ນ ທ່ານ ແກ້ວອຸດອນ ບຸດສິງຂອນ ເຈົ້າເມືອງໆບົວລະພາ ໄດ້ໃຫ້ກຽດໂອ້ລົມເບື້ອງຕົ້ນທ່ານກໍ່ໄດ້ເຫັນດີເປັນເອກະພາບຕໍ່ກອງປະຊຸມດັ່ງກ່າວເພາະການ ສ້າງຕັ້ງກິ່ງສາຂາບໍລິການຂອງທະນາຄານໃນເທດສະບານເມືອງບົວລະພານີ້ກໍ່ເປັນອີກບາດກ້າວໜຶ່ງຂອງການຂະຫຍາຍຕົວຂອງເສດຖະກິດພາຍໃນເມືອງໃຫ້ດີຂຶ້ນ ແລະ ການບໍລິການທາງດ້ານການຮັບ-ຝາກເງິນຂອງພໍ່ແມ່ປະຊາຊົນກໍ່ສະດວກສະບາຍຂຶ້ນຕື່ມ, ນອກນັ້ນທ່ານຍັງໄດ້ຮຽກຮ້ອງໃຫ້ພາກສ່ວນດັ່ງກ່າວ ຄວນມີມາດຕະການ ແລະ ລະບຽບກົດໝາຍໃຫ້ຮັດກຸມ ແລະຊັດເຈນເພື່ອເປັນການເຂົ້າໃຈກ່ຽວກັບການມາໃຊ້ບໍລິການນໍາອີກດ້ວຍ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 21/05/2019