ມອບວຽກແຈ້ງຂຶ້ນທະບຽນ ແລະຄຸ້ມຄອງວິສາຫະກິດໃຫ້ເມືອງອາດສະພອນ

  ພິທີເຊັນບົດບັນທຶກມອບ-ຮັບວຽກແຈ້ງຂຶ້ນທະບຽນ ແລະຄຸ້ມຄອງວິສາຫະກິດລະຫວ່າງພະແນກອຸດສາຫະກຳ ແລະການຄ້າແຂວງສະຫວັນນະເຂດກັບຫ້ອງ ການອຸດສາຫະກຳ ແລະການຄ້າເມືອງອາດສະພອນເປັນຜູ້ຄຸ້ມຄອງໄດ້ຈັດຂຶ້ນໃນວັນທີ 8 ພຶດສະພາ ຜ່ານມາທີ່ສະໂມສອນ ເມືອງອາດສະພອນ ແຂວງສະຫວັ ນນະເຂດ, ໂດຍການເຂົ້າຮ່ວມຂອງທ່ານ ແສງທອງ  ວັງແກ້ວມະນີ ເຈົ້າເມືອງອາດສະພອນ, ທ່ານ ໂພສີສ້ອຍ ກຸທິລາດ ຮອງຫົວໜ້າພະແນກອຸດສາຫະກຳ ແລະການຄ້າແຂວງສະຫວັນນະເຂດ, ມີບັນດາທ່ານຫົວໜ້າຫ້ອງການ, ກົມກອງອ້ອມຂ້າງເມືອງເຂົ້າຮ່ວມ.

  ໃນພິທີກໍ່ໄດ້ມີການຜ່ານຂໍ້ຕົກລົງຂອງຫົວໜ້າພະແນກອຸດສາຫະກຳ ແລະການຄ້າແຂວງສະຫວັນນະເຂດ ສະບັບເລກທີ 0921/ພອຄ.ສຂ ລົງວັນທີ 25 ເມສາ 2019 ວ່າດ້ວຍການມອບວຽກແຈ້ງຂຶ້ນທະບຽນ ແລະຄຸ້ມຄອງວິສາຫະກິດໃຫ້ເມືອງອາດສະພອນເປັນຜູ້ຄຸ້ມຄອງ,ຈາກນັ້ນກໍ່ໄດ້ມີການເຊັນບົດບັນທຶກມອບຮັບວຽກດັ່ງກ່າວລະຫວ່າງພະແນກອຸດສາຫະກຳ ແລະການຄ້າແຂວງສະຫວັນນະເຂດ ແລະຫ້ອງການອຸດສາຫະກຳ ແລະການຄ້າເມືອງອາດສະພອນ.

 ໃນໂອກາດດັ່ງກ່າວ ທ່ານ ແສງທອງ ວັງແກ້ວມະນີ ກໍ່ໄດ້ກ່າວວ່າ: ການມອບຮັບວຽກດັ່ງກ່າວນີ້ມັນຈະຊ່ວຍຜູ້ປະກອບການໃນທຸລະກິດຕ່າງໆພາຍໃນເມືອງມີຄວາມສະດວກສະບາຍຍິ່ງຂຶ້ນ, ພ້ອມນັ້ນທ່ານກໍ່ໄດ້ເນັ້ນໃຫ້ພາກສ່ວນກ່ຽວຂ້ອງເອົາໃຈໃສ່ຄຸ້ມຄອງຜູ້ປະກອບການຮ້ານຄ້າດ້ວຍການກວດສອບສິນຄ້າປອມ ແປງ, ລອກຮຽນແບບ, ສິນຄ້າໝົດອາຍຸ, ສິນຄ້ານຳເຂົ້າບໍ່ຖືກຕ້ອງ ແລະອື່ນໆ, ຄຽງຄູ່ກັນນັ້ນກໍ່ຕ້ອງໄດ້ມີການສົ່ງເສີມໃຫ້ພໍ່ແມ່ປະຊາຊົນສ້າງຕັ້ງກຸ່ມຜະລິດໃຫ້ກາຍເປັນສິນຄ້າຫຼາຍຍິ່ງຂຶ້ນ, ໂດຍສະເພາະສິນຄ້າຫັດຖະກຳຕ່ຳແຜ່ນ, ເຄື່ອງຈັກສານ, ການປັ້ນໝໍ້ຫຼໍ່ໄຫ ແລະອື່ນໆ. ພ້ອມນັ້ນກໍ່ຕ້ອງໄດ້ຊ່ວຍໃນການຊອກຕະຫຼາດວາງຈຳໜ່າຍໃຫ້ເຂົາເຈົ້າຕື່ມອີກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์