ສຳເລັດການສ້ອມແປງທາງດິນແດງ 2 ເສັ້ນຢູ່ເມືອງທ່າແຕງ

  ວັນທີ 16 ພຶດສະພາ 2019 ທ່ານ ບົວໄຂ ໄຊຍະວົງ ຫົວໜ້າຫ້ອງການໂຍທາທິການ ແລະຂົນສົ່ງເມືອງທ່າແຕງພ້ອມດ້ວຍຫ້ອງການກ່ຽວຂ້ອງຂັ້ນແຂວງ-ເມືອງ ແລະຜູ້ຕາງໜ້າບໍລິສັດຮັບເໝົາກ່ໍສ້າງໄດ້ລົງຕິດຕາມກວດກາຄວາມຄືບໜ້າໂຄງການສ້ອມແປງເສັ້ນທາງດິນແດງຢູ່ 2 ຈຸດຄື: ທາງແຍກເຂົ້າບ້ານກັນດອນຫາ ບ້ານປະໄລ່ຍາວ 3 ກິໂລແມັດ ແລະ ທາງເຂົ້າບ້ານຕຸ້ມຍໍຫາຈຸດເຊື່ອມຕໍ່ເຂົ້າເຂດການຜະລິດກະສິກໍາຂອງປະຊາຊົນຍາວ 5,6 ກິໂລ ແມັດ.

  ທ່ານ ບົວໄຂ ໄຊຍະວົງ ກ່າວວ່າ: ໂຄງການກໍ່ສ້າງ ແລະສ້ອມແປງເສັ້ນທາງແຍກເຂົ້າບ້ານກັນດອນຫາບ້ານປະໄລ່ຍາວ 3 ກິ ໂລແມັດ, ກວ້າງ 6 ແມັດ, ມູນຄ່າ 359 ລ້ານກວ່າກີບ ແມ່ນໄດ້ເລີ່ມລົງມືກໍ່ສ້າງມາແຕ່ວັນທີ 7 ເມສາ ຫາ ວັນທີ 16 ພຶດສະພາ 2019 ຊຶ່ງແມ່ນບໍລິສັດຈຸດປະສົງກໍ່ສ້າງສ້ອມແປງຂົວທາງເປັນຜູ້ຮັບເໝົາໂດຍມີໜ້າວຽກຖົມດິນໜ້າທາງ, ອະນາໄມລວງທໍ່ທີ່ມີແລ້ວ, ເຮັດຮ່ອງລະບາຍນໍ້າມາຮອດປະຈຸບັນການກໍ່ສ້າງສ້ອມແປງເສັ້ນທາງດັ່ງກ່າວແມ່ນສຳເລັດ 100%,

  ສ່ວນທາງເຂົ້າບ້ານຕຸ້ມຍໍຫາຈຸດເຊື່ອມຕໍ່ເຂົ້າເຂດການຜະລິດກະສິກໍາຂອງປະຊາຊົນມີຄວາມຍາວ 5,6 ກິໂລແມັດ, ກວ້າງ 6 ແມັດ, ມູນຄ່າ 2,9 ຕື້ກີບ ແມ່ນໄດ້ເລີ່ມລົງມືກໍ່ສ້າງມາແຕ່ວັນທີ 28 ມີນາຫາວັນທີ 15 ພຶດສະພາ 2019 ໂດຍແມ່ນບໍລິສັດສອນກໍ່ສ້າງສ້ອມແປງຂົວທາງເປັນຜູ້ ຮັບເໝົາທີ່ປະກອບມີໜ້າວຽກບຸກເບີກແລວທາງປ່າ, ດຸດລອກໜ້າດິນທໍາມະຊາດ, ກວດປັບຮູບທາງພ້ອມຮ່ອງລະບາຍນໍ້າຂ້າມທາງ ແລະຕັດດິນພື້ນທາງໂດຍມາຮອດປະຈຸບັນການກໍ່ສ້າງສ້ອມແປງເສັ້ນທາງແມ່ນສຳເລັດ 100 %.

  ຊຶ່ງໄລຍະຜ່ານມາກໍ່ໄດ້ສໍາເລັດໃນການລົງຕິດຕາມກວດກາຄວາມຄືບໜ້າໃນການສ້ອມແປງເສັ້ນທາງດິນແດງແລ້ວອີກ 2 ໂຄງການມາຮອດປະຈຸບັນການກໍ່ສ້າງສ້ອມແປງເສັ້ນທາງດັ່ງກ່າວແມ່ນສຳເລັດ 100 ສ່ວນຮ້ອຍ.ສາມາດເຮັດໃຫ້ການສັນຈອນໄປມາຫາສູ່ກັນລະຫວ່າງບ້ານຕໍ່ບ້ານ,ບ້ານຫາເຂດການຜະລິດຂອງປະຊາຊົນໄດ້ມີຄວາມສະດວກສະບາຍໄດ້ທັງສອງລະດູການ, ທັງນີ້ ກໍຍ້ອນຄວາມຕັດສິນໃຈສູງຄວາມຮັບຜິດຊອບໂດຍກົງຂອງຄະນະພັກຂັ້ນເທິງທີ່ເຫັນໄດ້ຄວາມສຳຄັນໃນການພັດທະນາທ້ອງຖິ່ນທີ່ລົງເກັບກຳຂໍ້ມູນສະພາບຕົວຈິງເພື່ອຈະໄດ້ບັນຈຸເຂົ້າແຜນພັດທະນາເສດຖະກິດ-ສັງຄົມຂອງແຂວງກໍ່ຄືຂອງເມືອງໃນສະເພາະໜ້າໃຫ້ດີຂຶ້ນກວ່າເກົ່າ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์