ງານຕະຫຼາດນັດແຮງງານໄຊຍະບູລີ ຈັດຂຶ້ນທ້າຍອາທິດນີ້

  ທ່ານ ນາງ ແພງຈັນ ແກ້ວມະນີວົງ ຫົວໜ້າພະແນກແຮງງານ ແລະສະຫວັດດີການສັງຄົມແຂວງໄຊຍະບູລີ, ໄດ້ຖະແຫຼ່ງຂ່າວງານຕະຫຼາດນັດແຮງງານຄັ້ງທີ I  ທີ່ແຂວງໄຊຍະບູລີ ໃນວັນທີ 20 ພຶດສະພາ ວ່າ: ການຈັດງານຕະຫຼາດນັດແຮງງານກໍ່ເປັນວຽກງານໜຶ່ງທີ່ທາງພະແນກແຮງງານ ແລະ ສະຫວັດດີການສັງຄົມແຂວງໄດ້ເຫັນຄວາມສຳຄັນເປັນຢ່າງຍິງເພາະສາມາດຕອບສະໜອງແຮງງານມີໂອກາດເລືອກວຽກທີ່ເໝາະສົມກັບຕົນເອງ ແລະຝ່າຍຜູ້ໃຊ້ແຮງງານໄດ້ມີໂອກາດສຳພາດ, ຄັດເລືອກເອົາແຮງງານທີ່ມີຄວາມເໝາະສົມກັບຕຳແໜ່ງງານຂອງຕົນເພື່ອບັນຈຸເຂົ້າເຮັດວຽກ, ກິດຈະກຳໃນງານປະກອບມີການຂຶ້ນທະບຽນຜູ້ຕ້ອງການມີວຽກເຮັດງານທຳ,ຜູ້ຕ້ອງການຝຶກວິຊາຊີບ,ຕຳແໜ່ງງານຫວ່າງ,ມີການສຳພາດຜູ້ຕ້ອງການມີວຽກເຮັດງານທຳຄັດເລືອກໃສ່ຕຳແໜ່ງວາງ ແລະການນຳສະເໜີວຽກງານບໍລິຫານຈັດຫາງານ, ການໃຫ້ຄຳປຶກສາກ່ຽວກັບມີວຽກເຮັດງານທຳຢູ່ພາຍໃນ ແລະຕ່າງປະເທດ.

  ດັ່ງນັ້ນງານຕະຫຼາດນັດແຮງງານຄັ້ງນີ້ແມ່ນຈັດຂຶ້ນເປັນຄັ້ງທຳອິດສຳລັບແຂວງໄຊຍະບູລີພາຍໃຕ້ໂຄງການສ້າງຄວາມອາດສາມາດທາງດ້ານວິຊາການ, ເພື່ອພັດ ທະນາລະບົບຈັດຫາງານຢູ່ ສປປ ລາວ ໂດຍສະໜັບສະໜູນຈາກລັດ ຖະບານຍີ່ປຸ່ນຜ່ານທະນາຄານພັດທະນາອາຊີ, ຈະໄດ້ຈັດຂຶ້ນໃນລະຫວ່າງວັນທີ 23-24 ພຶດສະພາ 2019 ທີ່ເດີນທະນາຄານພົງສະ ຫວັນ, ບ້ານສີເມືອງ, ເມືອງໄຊຍະ ບູລີ ແຂວງໄຊຍະບູລີ, ຄາດວ່າຈະ ມີຜູ້ເຂົ້າຮ່ວມທ່ຽວຊົມຫຼາຍກວ່າ 500 ຄົນ, ຈະມີບໍລິສັດຫົວໜ່ວຍ ທຸລະກິດ ຫຼືຫົວໜ່ວຍແຮງງານ ຫຼາຍກ່ວາ 15 ຫົວໜ່ວຍເຂົ້າມາ ຕັ້ງໂຕະໂຄສະນາປະກາດຕຳແໜ່ງງານຫວ່າງເພື່ອຮັບສະໜັກເອົາພະນັກງານຢູ່ກັບທີ່ ແລະອາດຈະມີຫຼາຍກວ່າ 20 ຕຳແໜ່ງງານໃຫ້ເລືອກ, ຊຶ່ງຈະມີຄວາມຕ້ອງການແຮງງານຫຼາຍກວ່າ 200 ຄົນ ແລະພາຍຫຼັງສຳເລັດງານຈະມີຜູ້ບັນຈຸເຂົ້າເຮັດວຽກນຳບັນດາໜ່ວຍງານຢ່າງໜ້ອຍ 100 ຄົນ, ສະນັ້ນການຈັດງານຕະຫຼາດນັດແຮງງານຂຶ້ນເຫັນວ່າມີຄວາມໝາຍສຳຄັນຫຼາຍເພາະສາມາດຕອບສະໜອງຄວາມຕ້ອງການຂອງຕະຫຼາດແຮງງານໃນປະຈຸບັນ.

  ທ່ານຍັງໄດ້ກ່າວຕື່ມວ່າ: ຈຸດປະສົງຂອງການຈັດງານຕະຫຼາດນັດແມ່ນເພື່ອສ້າງໂອກາດໃຫ້ຜູ້ທີ່ຕ້ອງການມີວຽກເຮັດງານທຳເຂົ້າເຖິງການຈັດຫາງານ ແລະບັນດາ ຫົວໜ່ວຍແຮງງານທີ່ມີຄວາມຕ້ອງ ການແຮງງານ, ສະມາດຄັດເລືອກ ເອົາແຮງງານທີ່ມີຄວາມເໝາະສົມ ກັບຕຳແໜ່ງງານທີ່ມີຢູ່, ນອກຈາກນັ້ນກໍ່ເປັນການສ້າງເງື່ອນໄຂໃຫ້ກັບຜູ້ອອກແຮງງານທີ່ຕ້ອງການພັດທະນາສີມືແຮງງານໄດ້ເຂົ້າເຖິງການສຶກສາ, ຢູ່ສະຖາບັນການຝຶກວິຊາຊີບ ແລະ ສູນຝຶກອົບຮົມວິຊາຊີບຕ່າງໆແນ່ໃສ່ເຮັດໃຫ້ອັດຕາ ການຫວ່າງງານ ແລະ ການເຄື່ອນຍ້າຍແຮງງານໄປຕ່າງປະເທດແບບບໍ່ຖືກຕ້ອງໃຫ້ຫຼຸດລົງເທື່ອລະກ້າວ.   

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์