ເຄແອນບີ ກຽມປູກໄມ້ໃຫ້ເປັນປ່າຫຼາຍຮ້ອຍຕົ້ນໃນວັນທີ 1 ມິຖຸນາ

  ເພື່ອເປັນການປະຕິບັດຕາມນະໂຍບາຍ 6 ສ ເປັນຕົ້ນແມ່ນ ສ ສີຂຽວ ເຮັດໃຫ້ນະຄອນຫຼວງວຽງຈັນມີອາກາດປອດໃສສົດຊື່ນ ແລະປະກອບສ່ວນເພີ່ມເນື້ອທີ່ປົກຫຸ້ມຂອງພື້ນທີ່ສີຂຽວໃນຂອບເຂດທົ່ວປະເທດໃຫ້ໄດ້ 70% ພາຍໃນປີ 2020 ໃນວັນທີ 1 ມິຖຸນາ ທີ່ຈະມາເຖິງນີ້ໂຮງງານເຄແອນບີເຟີນິເຈີຈະມີການປູກຕົ້ນໄມ້ເສດຖະກິດ ແລະໄມ້ປະດັບຈຳນວນ 500 ຕົ້ນທີ່ສວນຂອງໂຮງງານ.

 ທ່ານ ກອງມາລາ ພົມມະໄລ ເຈົ້າຂອງໂຮງງານເຄແອນບີເຟີນິເຈີທີ່ບ້ານໂສກປ່າຫຼວງ ເມືອງສີສັດຕະນາກນະຄອນຫຼວງວຽງຈັນເປີດເຜີຍໃຫ້ຮູ້ໃນວັນທີ 20 ພຶດສະພາຜ່ານມາວ່າ: ປະຕິບັດຕາມແຈ້ງການຂອງກະຊວງກະສິກຳ ແລະປ່າໄມ້ສະບັບເລກທີ 0035/ກປ ລົງວັນ ທີ 10 ພຶດສະພາ 2019 ທັງເພື່ອປະຕິ ບັດຕາມນະໂຍບາຍ 6 ສ ເປັນຕົ້ນແມ່ນ ສ.ສີຂຽວ ເຮັດໃຫ້ນະຄອນຫຼວງວຽງຈັນມີອາກາດບໍລິສຸດສົດຊື່ນຢູ່ສະເໜີ ແລະແນໃສ່ປະກອບສ່ວນເຮັດໃຫ້ເນື້ອທີ່ປ່າໄມ້ໃນຂອບເຂດທົ່ວປະເທດກວມເອົາ 70% ຂອງເນື້ອທີ່ທັງໝົດໂຮງງານເຄແອນບີເຟີນິເຈີ ຈະມີການປູກຕົ້ນໄມ້ໃນ ວັນທີ 1 ມິຖຸນາ 2019 ໄປຄຽງຄູ່ກັບການສະເຫຼີມສະຫຼອງວັນເດັກນ້ອຍສາກົນໃຫ້ມີຄວາມຄຶກຄື້ນປະກອບສ່ວນໃຫ້ເປັນຜືນປ່າຂຽວງາມໄວ້ເຊັ່ນລູກຫຼານໃນອະນາຄົດ.

  ໂດຍໄມ້ທີ່ໂຮງງານເຄແອນບີເຟີນິເຈີຈະນຳມາປູກໃນຄັ້ງນີ້ລວມມີທັງໝົດ 500 ກວ່າຕົ້ນທີ່ປະກອບໄປດ້ວຍໄມ້ເສດຖະກິດເປັນຕົ້ນແມ່ນໄມ້ດູ່, ຂະຍູງ, ແຕ້ນອກຈາກນັ້ນກໍຍັງຈະມີເບ້ຍໄມ້ປະດັບຕ່າງໆອີກຊຶ່ງເວລານີ້ແມ່ນໄດ້ມີການສຳເລັດຫຼາຍໜ້າວຽກໂດຍສະເພາະແມ່ນການກະກຽມພື້ນທີ່ ແລະ ເບ້ຍໄມ້ໂດຍພື້ນ ທີ່ແມ່ນຈະໄດ້ປູກທີ່ສວນຂອງໂຮງງານເອງໃນເນື້ອທີ່ 3 ກວ່າເຮັກຕາຢູ່ບ້ານບໍ່ນາງົວ ເມືອງຈັນທະບູລີນະຄອນຫຼວງວຽງຈັນ.

  ນອກຈາກນີ້ ທ່ານ ກອງມາລາ ພົມມະໄລ ຍັງໄດ້ຮຽກຮ້ອງມາຍັງພະນັກງານ, ທະຫານ, ຕໍາຫຼວດ, ນັກຮຽນ-ນັກສຶກສາ ແລະປະຊາຊົນລາວບັນດາເຜົ່າຈົ່ງພ້ອມກັນຮ່ວມແຮງຮ່ວມໃຈປູກຕົ້ນໄມ້ຄົນລະ 1 ຕົ້ນ, 2 ຕົ້ນ ຫຼື ຫຼາຍກ່ວານັ້ນຍິ່ງເປັນການດີ, ເມື່ອມີການປູກແລ້ວກໍຕ້ອງໄດ້ມີການບົວລະບັດຮັກສາໃຫ້ດີ ແລະພ້ອມກັນປົກປັກຮັກສາປ່າໄມ້ທີ່ມີຢູ່ກໍ່ຄືແຫຼ່ງນໍ້າ, ທໍາມະຊາດທີ່ອຸດົມສົມບູນ, ສະພາບແວດລ້ອມທີ່ດີທຸກຄົນ, ທຸກພາກສ່ວນຈະໄດ້ຊ່ວຍກັນເບິ່ງແຍງເພື່ອບໍ່ໃຫ້ປ່າໄມ້ຕ້ອງຖືກບຸກລຸກ ແລະທໍາລາຍແບບຊະຊາຍອີກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์