ຈຳປາສັກ ອົບຮົມຫຼັກສູດພັດທະນາບຸກຄະລາກອນມືອາຊີບ

  ສະພາການຄ້າ ແລະອຸດສາຫະກໍາ ແຂວງຈໍາປາສັກ ໄດ້ຈັກຝຶກອົບຮົມໃຫ້ແກ່ບັນດາຫົວໜ່ວຍທຸລະກິດທັງພາກລັດ ແລະພາກເອກກະຊົນໃນການບໍລິຫານບຸກຄະລະກອນຢ່າງມືອາຊີບເພື່ອນໍາໃຊ້ຄວາມຮູ້ດັ່ງກ່າວເຂົ້າໃນການບໍລິຫານຕົວຈິງ.

ກອງປະຊຸດຈັດຝຶກອົບຮົມໃນຫົວຂໍ້: ຫຼັກສູດການພັດທະນາບຸກຄະລາກອນຢ່າງມືອາຊີບຄັ້ງທີ III ຂອງສະພາການຄ້າ ແລະອຸດສາຫະກໍາ ແລະການຄ້າແຂວງຈໍາປາສັກ, ໄດ້ມີຂຶ້ນໃນວັນທີ 20 ພຶດສະພາ 2019 ທີ່ໂຮງແຮມແກຣນນະຄອນປາກເຊ ແຂວງຈໍາປາສັກ, ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ວັນທອງ ສິດທິກຸນ ຮອງປະທານສະພາການຄ້າ ແລະອຸດສາຫະກໍາແຫ່ງຊາດ, ທ່ານ ນາງ ບຸກເຮືອງ ດິດດັງ ປະທານສະພາການຄ້າ ແລະ ອຸດສາຫະກໍາແຂວງ ຈໍາປາສັກ, ມີບັນທ່ານແຂກຜູ້ໃຫຍ່ທີ່ກ່ຽວ, ບັນດານັກທຸລະກິດຈາກພາກລັດ  ແລະ ພາກເອກະຊົນເຂົ້າຮ່ວມ.

ໃນກອງປະຊຸມທ່ານ ວັນທອງ ສິດ ທິກຸນ ໄດ້ກ່າວວ່າ: ການຈັດກອງປະຊຸມໃນຄັ້ງນີ້ແມ່ນເພື່ອເປັນການພັດທະນາຂິດ ຄວາມສາມາດໃຫ້ແກ່ພາກທຸລະກິດຄຽງ ຄູ່ກັບການພັດທະນາບຸກຄະລາກອນຂອງບໍລິສັດເພື່ອໃຫ້ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການໃນດ້ານການພັດທະນາບໍ່ຢຸດຢັ້ງ, ນອກຈາກນີ້ຍັງຈະຊ່ວຍເພີ່ມຜະລິດຕະພາບຂອງການຜະລິດ ແລະເພີ່ມຂິດຄວາມສາມາດໃຫ້ກັບບຸກຄະລາກອນໃຫ້ເຮັດວຽກຢ່າງມືອາຊີບເຊັ່ນ: ບັນດາພະນັກງານໃນບໍລິສັດ, ຜູ້ຈັດການ ແລະຜູ້ບໍລິຫານໃຫ້ມີຄວາມເຂົ້າໃຈຢ່າງເລີກເຊົ່ງຕໍ່ກັບການຈັດລະບົບຂອງການເຮັດວຽກຊຶ່ງບົດຮຽນດັ່ງກ່າວແມ່ນມີຄວາມສໍາຄັນ ແລະຈໍາເປັນທີ່ສຸດສໍາລັບທຸລະກິດຂອງ ສປປ ລາວ ເພື່ອເຮັດແນວໃດໃຫ້ທຸລະກິດຂອງລາວໃຫ້ສາມາດແຂ່ງໄດ້ກັບພາກພື້ນ ແລະສາກົນ.

 ທ່ານກ່າວຕື່ມອີກວ່າ: ການຈັດກອງປະຊຸມສໍາມະນາຄັ້ງນີ້ຈະເປັນໂອກາດອັນດີໃຫ້ກັບບັນດານັກສໍາມະນາກອນ, ເພາະຈະໄດ້ແລກປ່ຽນບົດຮຽນກັບທາງວິທະ ຍາກອນທີ່ມີຄວາມຮູ້, ມີປະສົບການສູງ, ພ້ອມຮຽກຮ້ອງໃຫ້ບັນດາທ່ານປະກອບສ່ວນຢ່າງຕັ້ງໜ້າເຂົ້າໃນການຖອດຖອນບົດຮຽນ ແລະແລກປ່ຽນສົນທະນາຮ່ວມ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 21/05/2019