ທະຫານຊາຍແດນ ສະຫວັນະເຂດ ຢຶດເຮືອຈັກຂົນສົ່ງໄມ້ຂະຍຸງເກືອບ 200 ທ່ອນ ສ່ວນເຈົ້າຂອງຫຼົບໜີ

  ຕາມແຫຼ່ງຂ່າວຈາກວິທະຍຸແຂວງສະຫວັນນະເຂດແຈ້ງມາວ່າ: ໃນວັນທີ 17 ພຶດສະພາ 2019 ນີ້ ເຈົ້າໜ້າທີ່ທະຫານຊາຍແດນ 324 ທີ່ຂຶ້ນກັບກອງບັນ ຊາການທະຫານແຂວງສະຫວັນະເຂດ ໄດ້ອອກກວດກາລາດຕະເວນຕາມຂອບເຂດຄວາມຮັບພິຊອບຂອງຕົນຊຶ່ງນຳໂດຍ ສະຫາຍ ຮ້ອຍໂທ ຄອນພະວັນ ສຸກມາວັນ ຫົວໜ້າໜູ່ພ້ອມດ້ວຍອ້າຍນ້ອງ 3 ສະຫາຍ,

  ພໍຮອດເວລາ 5:30 ໂມງ ໄດ້ເຫັນເຮືອຈັກຂະໜາດໃຫຍ່ 1 ລຳ ຄວາມແຮງ 4 ສູບ, ທີ່ແລ່ນລຽບຕາມລຳນ້ຳຂອງມາຈາກຕອນໃຕ້ທີ່ບັນທຸກໄມ້ຜິດກົດ ໝາຍເຕັມລຳເຮືອ, ເມື່ອເຫັນດັ່ງນັ້ນທາງເຈົ້າໜ້າທີ່ຈິ່ງໄດ້ເຂົ້າກັກເຮືອຈັກລຳດັ່ງກ່າວຈິ່ງໄດ້ພົບວ່າໄມ້ທີ່ບັນຈຸຢູ່ໃນເຮືອແມ່ນໄມ້ຂະຍຸງມີຈຳນວນ 195 ທ່ອນ ສ່ວນ ເຈົ້າຂອງຜູ້ຂັບເຮືອແມ່ນຫຼົບໜີໄປໄດ້ດັ່ງ ນັ້ນທາງເຈົ້າໜ້າທີ່ທະຫານຊາຍແດນ 324 ຈິ່ງໄດ້ລາຍງານຫາຄະນະພັກ-ຄະນະບັນຊາກົມກອງຈາກນັ້ນຈິ່ງລາຍງານເຖິງຄະນະພັກ-ຄະນະບັນຊາກອງບັນຊາການທະຫານແຂວງສະຫວັນນະເຂດ, ເພື່ອລົງກວດກາຕົວຈິງ.

  ສະຫາຍ ພັນເອກ ຂັນທະລີ ທາທິລາດ ຮອງເລຂາຄະນະພັກຫົວໜ້າການທະຫານກອງບັນຊາການທະຫານແຂວງພ້ອມດ້ວຍພະແນກການທີ່ກ່ຽວຂ້ອງຈິ່ງໄດ້ລົງກວດກາເບິ່ງຕົວຈິງ ແລະຫັນວ່າເປັນມູນຄວາມຈິງແທ້ດັ່ງນັ້ນທາງເຈົ້າໜ້າທີ່ກອງບັນຊາການທະຫານແຂວງສະຫວັນນະເຂດ, ຈິ່ງໄດ້ເຮັດບົດບັນທຶໃນການຢືດໄມ້ໃນຄັ້ງນີ້ໄວ້ເປັນຫຼັກຖານ ແລະສະເໜີຂັ້ນເທີງເພື່ອແກ້ໄຂຕໍ່ໄປ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 21/05/2019