ຕາດຕະແລ ຈຸດທ່ອງທ່ຽວທີ່ປະທັບໃຈ

ປະຈຸບັນນີ້ ແຂວງອຸດົມໄຊ ມີຫຼາຍສິ່ງສາມາດອໍານວຍຄວາມສະດວກເປັນຕົ້ນຖະໜົນຫົນທາງຊ່ວຍເຮັດໃຫ້ຜູ້ຄົນທີ່ເດີນທາງໄປມາໄດ້ສໍາຜັດກັບທໍາະຊາດ,ນໍ້າຕົກຕາດທີ່ສາມາດສ້າງຄວາມປະທັບ ໃຈແກ່ນັກທ່ອງທ່ຽວທັງພາຍໃນແລະຕ່າງປະເທດເປັນຈໍານວນບໍ່ໜ້ອຍ, ບໍ່ວ່າຈະເປັນແຫຼ່ງທ່ອງທ່ຽວ ທີ່ສ້າງຂຶ້ນມາເອງ ຫຼື ທຳມະຊາດ ສ້າງມາ. ໂດຍເຮົາຈະສາມາດສໍາຜັດກັບສິ່ງໃໝ່ໆ ແລະທໍາມະຊາດອັນໂດດເດັ່ນແລະສວຍສົດງົດງາມ ເພື່ອຜ່ອນຄາຍສະບາຍໃຈ.ດັ່ງຕາດຕະແລຖືເປັນແຫຼ່ງທ່ອງທ່ຽວທາງທໍາມະຊາດທີ່ງົດງາມອີກ ແຫ່ງໜຶ່ງຂອງແຂວງອຸດົມໄຊທີ່ມີອາກາດສົດຊື່ນແລະທຳມະຊາດອັນສວຍສົດງົດງາມ,ອ້ອມຮອບດ້ວຍປ່າດົງດິບ, ມີຕົ້ນໄມ້ນ້ອຍ-ໃຫຍ່ຂຽວງາມຕະຫຼອດປີແລະເຕັມໄປດ້ວຍສັດປ່ານານາຊະນິດ.ມີຄົນຂະໜານນາມວ່າຕາດຕະແລກໍປຽບສະຫວັນຊັ້ນເຈັດຂອງອຸດົມໄຊເໝາະແກ່ການພັກຜ່ອນຢ່ອນໃຈ ໃນຍາມວັນພັກ ໂດຍການໄປນັ່ງ ຊົມວິວສູບເອົາອາກາດສົດໆ ແລະກິ່ນຫອມຂອງອາຍທໍາມະຊາດ,ຟັງສຽງນົກໜູປູປີກ, ຊຸມແຊວກິນເຂົ້າປ່າສາມັກຄີກັບຄອບຄົວ,ໝູ່ຄູ່ ດ້ວຍຄວາມສຳລານໃຈ.

ນ້ຳຕົກຕາດແຫ່ງນີ້ມີຕຳນານ ເລົ່າຂານປາກຕໍ່ປາກສືບຕໍ່ກັນມາ ວ່າ:ແຕ່ປາງກ່ອນມີບ່າວເງືອກຊື່ທ້າວພັກໄດ້ລົງໄປຫຼິ້ນບຸນຢູ່ຫຼວງ ພະບາງ, ໄປເຫັນສາວເງືອກຊື່ວ່າ ນາງ ຄຳຜິວ ທີ່ອາໄສຢູ່ນໍ້າຄານ. ທ້າວ ພັກ ເກີດມີຄວາມຮັກມັກກັບ ນາງ ຄຳຜິວ ແລະໄດ້ລັກເອົານາງຄຳຜິວມານຳ, ຕໍ່ຈາກນັ້ນມາມີບ່າວ   ເງືອກທີ່ຢູ່ຫຼວງພະບາງ ເຄີຍຮັກ ມັກກັບນາງ ຄຳຜິວ ມາກ່ອນ ໄດ້ນຳໄປເອົານາງຄືນຈົນເກີດມີການ ຕໍ່ສູ້ກັນຂຶ້ນຢ່າງດຸເດືອດ. ທ້າວພັກເຫັນດັ່ງນັ້ນ, ຈຶ່ງໄດ້ກໍ່ສ້າງດ່ານຕ້ານກັນໄວ້ເປັນຈຸດໆຢູ່ທີ່ນໍ້າຕະແລແລະດ່ານແຕ່ລະດ່ານດັ່ງກ່າວກໍ່ ກາຍໄປຕາດຕະແລໃນປະຈຸບັນ.ຕາດຕະແລຕັ້ງຢູ່ຫ່າງຈາກເທສະບານເມືອງຮຸນ ແຂວງອຸດົມ ໄຊ ປະມານ 40 ກວ່າກິໂລແມັດ ດ້ວຍທາງດິນແດງ, ຊຶ່ງເປັນນໍ້າຕົກ ຫຼາຍຊັ້ນຕໍ່ກັນລົງມາ 7 ຊັ້ນ ດ້ວຍ ກັນ ໂດຍມີທັງໃຫຍ່-ນ້ອຍແຕກ ຕ່າງກັນ ແລະມີຄວາມສູງ 161 ແມັດ ແລະກວ້າງເປັນແຕ່ລະຊັ້ນ ຕ່າງກັນຄື: ຊັ້ນ 1 ສູງ 7 ແມັດ, ກວ້າງ 8 ແມັດ, ຊັ້ນ 2 ສູງ 15 ແມັດ, ກວ້າງ 7 ແມັດ, ຊັ້ນ 3 ສູງ 15 ແມັດ, ກວ້າງ 11 ແມັດ, ຊັ້ນ 4 ສູງ 16  ແມັດ,  ກວ້າງ 27 ແມັດ, ຊັ້ນ 5 ສູງ 40 ແມັດ, ກວ້າງ 27 ແມັດ, ຊັ້ນ 6 ສູງ 13 ແມັດ, ກວ້າງ 28 ແມັດ ແລະຊັ້ນ 7 ສູງ 55 ແມັດ, ກວ້າງ 35 ແມັດ.

ໂດຍ: ວົງມະນີີ

แชร์