ຕັກແຕນຝູງລະບາດໜັກ ຢູ່ເມືອງວຽງໄຊ

 ຕາມການລາຍງານຂອງ ທ່ານ ສິງວົງໄຊ ສຸລິວົງພັນ ຫົວໜ້າຫ້ອງການກະສິກຳ ແລະປ່າໄມ້ເມືອງວຽງໄຊ ແຂວງຫົວພັນ ໃຫ້ຮູ້ວ່າ: ປະຈຸບັນໄດ້ມີຕັກກະແຕນຂີລະບາດທົ່ວໄປຢູ່ຫຼາຍບ້ານໃນນັ້ນໜັກກວ່າໝູ່ແມ່ນຂອບເຂດບ້ານນາ ເມືອງຂຶ້ນກັບກຸ່ມບ້ານຊຽງລວງ ເມືອງວຽງໄຊ.

ໂດຍໄດ້ຮັບຄຳຮ້ອງຂໍຄວາມຊ່ວຍເຫຼືອຈາກອຳນາດການປົກຄອງບ້ານ, ສະນັ້ນ, ວັນທີ 16 ພຶດສະພາ 2019 ຜ່ານມານີ້ຫ້ອງການກະສິກຳ ແລະ ປ່າໄມ້ ເມືອງວຽງໄຊ ໄດ້ສົ່ງທີມງານວິຊາການພ້ອມອຸປະກອນປາບສັດຕູພືດຄືເຄືອງສີດພົ່ນຊະນິດກາງຈຳນວນ 2 ເຄື່ອງລົງພື່ນທີ່ເພື່ອຊ່ວຍເຫຼືອແກ້ໄຂເບື້ອງຕົ້ນ. ແຕ່ເນື່ອງຈາກວ່າການລະບາດຂອງຕັກກະແຕນຄັ້ງນີ້ແມ່ນໜັກໜ່ວງ, ເປັນວົງກວ້າງ, ຕາມຂໍ້ມູນເບື້ອງຕົ້ນແມ່ນແຜ່ລາມໃນເນື້ອທີ່ 3 ເຮັກຕາກວ່າ ແລະເກີນຂີດຄວາມສາມາດ. ມາຮອດວັນທີ 17 ພຶດສະພາ 2019 ນີ້, ຫ້ອງການກະສິກຳ ແລະປ່າໄມ້ເມືອງໄດ້ນຳສະເໜີຕໍ່ການນຳເມືອງວຽງໄຊ ແລະພະແນກກະສິກຳ ແລະປ່າໄມ້ແຂວງພ້ອມທັງເພີ່ມອຸປະກອນສີດພົ່ນລົງພື້ນທີ່ສືບຕໍ່ກຳຈັດຕັກກະແຕນ, ຄາດວ່າການກຳຈັດຊຸດທຳອິດນີ້ແມ່ນຈະໃຊ້ເວລາ 3 ວັນລໍຖ້າທິດຊີ້ນຳຈາກຂັ້ນເທິງເພື່ອແກ້ໄຂໄລຍະຍາວໃຫ້ໄວທີ່ສຸດເພື່ອປົກປ້ອງພືດພັນ ແລະຜົນຜະລິດຂອງປະຊາຊົນໃຫ້ໄດ້ເທົ່າທີ່ສາມາດຈະຊ່ວຍໄດ້.

  ທ່ານ ບຸນກອງ ດວງປັນຍາ ນາຍບ້ານນາເມືອງເລົ່າວ່າ: ສະພາບການແຜ່ລະບາດຂອງຕັກກະແຕນຢູ່ຂອບເຂດບ້ານນາເມືອງແມ່ນມີມາຫຼາຍປີແລ້ວແຕ່ບໍ່ໜັກເພາະມັນບໍ່ລົງມາທຳລາຍເຄື່ອງປູກຂອງຝັງປະຊາຊົນ, ສະເພາະປີນີ້, ແມ່ໜັກກວ່າໝູ່ເທົ່າທີ່ມີມາ,ປະຈຸບັນຕັກກະແຕນໄດ້ທຳລາຍຕົ້ນກ້າຂອງປະຊາຊົນທີ່ຫາກໍ່ຫວ່ານຫຼາຍແຫ່ງ ແລະຂັ້ນເທິງກໍ່ໄດ້ລົງມາຊ່ວຍກຳຈັດເບື້ອງຕົ້ນແລ້ວ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์