ທຫລ ປະຊຸມວິຊາການຂັ້ນສູງວຽກງານຊຳລະສະສາງ

 ທະນາຄານແຫ່ງ ສປປ ລາວ (ທຫລ) ໄດ້ຈັດຕັ້ງກອງປະຊຸມວິຊາການຂັ້ນສູງວຽກງານຊຳລະສະສາງຢ່າງເປັນທາງການ ແລະເປັນຄັ້ງທໍາອິດທີ່ມີຄະນະນໍາ ແລະພະນັກງານຈາກຫຼາຍກະຊວງທີ່ກ່ຽວຂ້ອງເຂົ້າຮ່ວມປຶກສາຫາລື ແລະແລກປ່ຽນຊຶ່ງເປັນຫົວຂໍ້ໜຶ່ງທີ່ສຳຄັນທີ່ນອນໃນ 3 ພາລະບົດບາດຂອງ ທຫລ ໃນໄລຍະໃໝ່ຄື: ການຮັກສາສະຖຽນລະພາບດ້ານເງິນຕາ ແລະຄຸ້ມຄອງສະຖາບັນການເງິນໃຫ້ມີຄວາມໝັ້ນຄົງ ແລະ ວຽກງານຊຳລະສະສາງໃຫ້ປອດໄພໝັ້ນຄົງໂດຍພາຍໃຕ້ການເປັນປະທານຂອງ ທ່ານ ນາງ ວັດທະນາ ດາລາ ລອຍ ຮອງຜູ້ວ່າການທະນາຄານແຫ່ງ ສປປ ລາວ ພ້ອມນີ້ ກໍ່ມີບັນດາຄະນະກົມຈາກ ທຫລ, ກະ ຊວງວິທະຍາສາດ ແລະເຕັກໂນໂລຊີ, ກະຊວງໄປສະນີໂທລະຄົມມະນາຄົມ ແລະການສື່ສານ, ກະຊວງອຸດສາຫະກໍາ ແລະການຄ້າ ແລະພາກສ່ວນທີ່ກ່ຽວຂ້ອງ ຊຶ່ງໄດ້ຈັດຂຶ້ນໃນຕອນບ່າຍຂອງວັນທີ 16 ພຶດສະພາ ທີ່ ທຫລ ນະຄອນຫຼວງວຽງຈັນ.

  ກອງປະຊຸມໃນຄັ້ງນີ້ ທ່ານ ສຸລິສັກ ທໍານຸວົງ ວ່າການຫົວໜ້າກົມຄຸ້ມຄອງລະບົບຊໍາລະສະສາງ ທຫລ ໄດ້ນໍາສະເໜີລະບົບການຊໍາລະຂອງ ສປປ ລາວ ຊຶ່ງມີການຊໍາລະແບບງ່າຍ, ການຊໍາລະແບບຊັບຊ້ອນ; ສະເພາະລະບົບການຊໍາລະແມ່ນຂະບວນການສົ່ງມອບ ຫຼື ໂອນເງິນຜ່ານເຄື່ອງມືການຊໍາລະປະເພດຕ່າງໆ ເພື່ອຊໍາລະຄ່າສິນຄ້າ ແລະການບໍລິການອັນເປັນຜົນຈາກການພົວພັນທາງສັງຄົມ; ປະເພດໃຫ້ການບໍລິການຊໍາລະ ແລະເຄື່ອງມືການຊໍາລະ, ການຄຸ້ມຄອງ ລະບົບການຊໍາລະຂອງ ສປປ ລາວ ແລະ ແຜນພັດທະນາວຽກງານຊຳລະສະສາງໃນຕໍ່ໜ້າຊຶ່ງມີແຜນຍຸດທະສາດແຫ່ງຊາດວ່າດ້ວຍການພັດທະນາລະບົບຊໍາ ລະສະສາງ; ສ້າງນິຕິກໍາລຸ່ມກົດໝາຍວ່າດ້ວຍລະບົບການຊໍາລະ ແລະບັນຫາອື່ນໆທີ່ປິ່ນອ້ອມວຽກງານຊຳລະສະສາງ.

  ກອງປະຊຸມໄດ້ເນັ້ນໃສ່ນິຕິກຳ ແລະ ການຄຸ້ມຄອງວຽກງານຊຳລະສະສາງເພື່ອສຶກສາຄົ້ນຄວ້າ ແລະປຶກສາຫາລືຮ່ວມກັນຊຶ່ງປະຈຸບັນວຽກງານດັ່ງກ່າວໄດ້ສອດຫ້ອຍເຂົ້າໄປໃນຫຼາຍຂົງເຂດວຽກງານນອກຈາກຂະແໜງການທະນາຄານທີ່ເຮັດໜ້າທີ່ໃນການຄຸ້ມຄອງໂດຍກົງ; ເຖິງແມ່ນວ່າການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາກໍ່ປະຕິບັດໄດ້ດີພໍສົມຄວນ, ແຕ່ກໍ່ຍັງບໍ່ທັນມີການຮັບຮູ້ຢ່າງແຜ່ຫຼາຍໂດຍສະເພາະແມ່ນຕິດພັນກັບພາກລັດທີ່ມີໜ້າທີ່ກ່ຽວຂ້ອງຕິດພັນກັບວຽກງານຊຳລະຊຳລະສະສາງ. ສະນັ້ນ, ຈິ່ງຈໍາເປັນຈະມີການເຜີຍແຜ່ນິຕິກຳ ແລະນະໂຍບາຍຕ່າງໆທີ່ຕິດພັນໃຫ້ພາກສ່ວນຕ່າງໆມີຄວາມເຂົ້າໃຈ ແລະປະຕິບັດໃຫ້ສອດຄ່ອງກັບນິຕິກຳທີ່ກ່ຽວຂ້ອງໂດຍສະເພາະໃນສະພາບທີ່ວຽກງານດັ່ງກ່າວນັບມື້ນັບເຕີບໃຫຍ່ຂະຫຍາຍຕົວ ແລະປະເທດຂອງພວກເຮົາກໍ່ກໍາລັງມີການເຊື່ອມໂຍງທາງດ້ານເສດຖະກິດການເງິນກັບພາກພື້ນ ແລະສາກົນຊຶ່ງໃນນີ້ກໍ່ລວມທັງລະບົບການຊຳລະ.

  ນອກນີ້, ທີ່ປະຊຸມຍັງໄດ້ປຶກສາຫາລືການພັດທະນາມາດຕະຖານເພື່ອຮັບຮອງການຊໍາລະ; ການຮ່ວມມືກ່ຽວກັບຂໍ້ມູນຂອງຜູ້ໃຊ້ບໍລິການ; ການປົກປ້ອງຜູ້ຊົມໃຊ້; ຄວາມຕ້ອງການດ້ານການຊໍາລະທີ່ຕິດພັນກັບພາກທຸລະກິດ; ການຄຸ້ມຄອງ ແລະພັດທະນາຊ່ອງທາງ ແລະ ເຄື່ອງມືເພື່ອຮັບຮອງການຊໍາລະ ແລະ ການອອກນິຕິກໍາໃນການຄຸ້ມຄອງວຽກງານຊຳລະສະສາງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

• 20/05/2019