ທົ່ວປະເທດເກັບກ່ຽວເຂົ້ານາແຊງສຳເລັດເກືອບ 100%

  ການເກັບກ່ຽວເຂົ້ານາແຊງຂອງປະຊາຊົນໃນຂອບເຂດທົ່ວປະເທດມາຮອດປະຈຸບັນສຳເລັດແລ້ວ 84 ພັນກວ່າ ເຮັກຕາ ເທົ່າກັບ 96% ຂອງເນື້ອທີ່ປັກ ດຳທົ່ວປະເທດ, ໃນນີ້ພາກກາງສາມາດເກັບກ່ຽວສຳເລັດແລ້ວ, ສຳລັບພາກເໜືອ ແລະພາກໃຕ້ແມ່ນຍັງສືບຕໍ່ເກັບກ່ຽວ, ສ່ວນການປູກພືດລະດູແລ້ງກໍນັບວ່າປະຕິບັດໄດ້ດີ.

 ຂໍ້ມູນຈາກບົດສະຫຼຸບວຽກງານປະຈຳເດືອນພຶດສະພາຂອງກະຊວງກະສິກຳ ແລະປ່າໄມ້ໃຫ້ຮູ້ວ່າ: ການຜະລິດເຂົ້ານາແຊງ ປີ 2018-2019, ມາຮອດປະຈຸ ບັນທົ່ວປະເທດສາມາດເກັບກ່ຽວມ້ຽນມັດຜົນຜະລິດເຂົ້ານາແຊງໄດ້ແລ້ວ 84,93 ພັນເຮັກຕາ ເທົ່າກັບ 96% ຂອງເນື້ອທີ່ປັກດຳ,ໃນນັ້ນແຂວງທີ່ເກັບກ່ຽວ ສຳເລັດແມ່ນເຂດພາກກາງຊຶ່ງລວມມີນະຄອນຫຼວງວຽງຈັນ, ຄຳມ່ວນ, ສະຫວັນນະເຂດ ແລະແຂວງອື່ນໆ, ສ່ວນເຂດພາກເໜືອ ແລະພາກໃຕ້ແມ່ນກຳລັງສືບຕໍ່ເກັບກ່ຽວຢູ່, ສ່ວນວຽກການຜະລິດພືດລະດູແລ້ງກໍນັບວ່າມີຫຼາຍດ້ານທີ່ພົ້ນເດັ່ນເປັນຕົ້ນແມ່ນມາຮອດປະຈຸບັນຊາວກະສິກອນໄດ້ປູກພືດຜັກຊະນິດຕ່າງໆໄດ້ແລ້ວ 1,53 ແສນເຮັກຕາ ເທົ່າກັບ 83% ຂອງ ແຜນການ, ໃນນີ້ພືດທີ່ປູກຫຼາຍກວ່າໝູ່ ແມ່ນສາລີອາຫານສັດ, ສາລີຫວານ, ມັນຕົ້ນ, ຢາສູບ, ຖົ່ວດິນ ແລະເຜືອກມັນຕ່າງໆ, ສຳລັບແຂວງ ທີ່ປູກພືດຫຼາຍກວ່າ ໝູ່ແມ່ນພາກເໜືອປະຕິບັດໄດ້ 58,48 ພັນເຮັກຕາ, ພາກກາງ 56,63 ພັນເຮັກຕາ ແລະພາກໃຕ້ 28,94 ພັນເຮັກຕາ, ສ່ວນພືດຜັກແມ່ນສາມາດເກັບກ່ຽວໄດ້ຫຼາຍຮອບແລ້ວຕົ້ນຕໍແມ່ນຜັກສະລັດ, ຜັກຫອມ, ຜັກບົ່ວ, ຜັກກາດ, ຫອມລາບ, ຜັກບົ້ງ ແລະອື່ນໆ.

  ສຳລັບວຽກການລ້ຽງສັດແມ່ນໄດ້ເອົາໃຈໃສ່ລົງຊຸກຍູ້ຕິດຕາມກວດກາຜະລິດຕະພັນສິນຄ້າສັດ, ສັດນ້ຳ ແລະອາຫານທະເລຢູ່ບັນດາດ່ານຕ່າງໆທີ່ນຳເຂົ້າມາ ຈາກບັນດາປະເທດເພື່ອບ້ານໃກ້ຄຽງ ແລະຕະຫຼາດພາຍໃນຕົວເມືອງເພື່ອຊອກຫາສານປົນເປື້ອນ ແລະສານຕົກຄ້າງຢູ່ໃນສິນຄ້າສັດ ແລະຜະລິດຕະພັນສັດ, ພ້ອມທັງເພີ່ມທະວີການຕິດຕາມ ເຝົ້າລະວັງການນຳເຂົ້າສິ້ນສ່ວນ ແລະ ຜະລິດຕະພັນສັດທີ່ມີຄວາມສ່ຽງຂອງ ພະຍາດອະຫິວາໝູອາຟິກກາຢູ່ບັນດາດ່ານຕ່າງໆ ໃນຂອບເຂດທົ່ວປະເທດ, ຄຽງຄູ່ກັບການຜະລິດຢາປ້ອງກັນພະຍາດສັດ, ປະຈຸບັນສາມາດຜະລິດໄດ້ທັງ ໝົດ 1,91 ລ້ານເຂັມ ແລະ ສະໜອງໃຫ້ ບັນດາແຂວງແລ້ວ 2,50 ແສນເຂັມ, ພ້ອມດຽວນັ້ນເພື່ອເປັນການສືບຕໍ່ປະຕິບັດວຽກງານໃນຕໍ່ໜ້າກໍຄືເດືອນມິຖຸນາທີ່ຈະມາເຖິງນີ້, ກະຊວງຍັງຈະສືບຕໍ່ຕິດ ຕາມຊຸກຍູ້ການຈັດຕັ້ງປະຕິບັດຕາມແຈ້ງການກ່ຽວກັບວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄວບຄູ່ກັບການຊີ້ນຳເອົາ ໃຈໃສ່ໃຫ້ປະຊາຊົນເກັບກູ້ຜົນຜະລິດລະດູແລ້ງໃຫ້ສຳເລັດຕາມລະດັບຄາດໝາຍ ແລະກະກຽມຢ່າງຮອບດ້ານແຕ່ຫົວທີ່ເພື່ອກຽມໃສ່ການຜະລິດລະດູຝົນທີ່ຈະມາເຖິງນີ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์