ແລກປ່ຽນບົດຮຽນການດຳເນີນທຸລະກິດຢູ່ລາວ ແລະຕ່າງປະເທດ

  ວັນທີ 15 ພຶດສະພາ 2019 ສະພາການຄ້າ ແລະອຸດສາຫະກໍາແຫ່ງຊາດລາວຮ່ວມກັບສະພາການຄ້າ ແລະ ອຸດສາຫະກໍາໂອຣົບ ປະຈໍາລາວ, ສະພາການຄ້າ ແລະອຸດສາຫະກໍາອົດສະຕາລີປະຈໍາລາວ, ສະມາຄົມທຸລະກິດອາເມລິກາ-ລາວ, ກຸ່ມທຸລະກິດອັງກິດປະຈໍາລາວ ແລະ ສະພາການຄ້າ ແລະ ອຸດສາຫະກໍາຍີ່ປຸ່ນ ປະຈໍາລາວໄດ້ຈັດກອງປະຊຸມ Top Executive Meeting 2019 ຂຶ້ນທີ່ໂຮງແຮມຄຣາວພລາຊານະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍທ່ານ ສົມດີ ດວງດີຮອງນາຍົກລັດຖະມົນຕີ, ລັດຖະມົນຕີກະຊວງການເງິນພ້ອມດ້ວຍບັນດາແຂກຖືກເຊີນຈາກພາກລັດຖະບານທູຕານຸທູດນັກທຸລະກິດລາວ ແລະ ຕ່າງປະເທດ.

 ກອງປະຊຸມຄັ້ງນີ້ແມ່ນໄດ້ຮັບຟັງການບັນຍາຍໃນເວທີຈາກຕົວແທນພາກລັດຖະບານ ແລະພາກທຸລະກິດເພື່ອປຶກສາຫາລືເຊັ່ນ: ທະນາຄານແຫ່ງ ສປປ ລາວ ກະຊວງອຸສາຫະກໍາ ແລະ ການຄ້ານັກທຸລະກິດ ແລະ ຕົວແທນຈາກສະພາການຄ້າ ແລະ ອຸສາຫະກໍາແຫ່ງຊາດເພື່ອເປັນການເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນຂໍ້ມູນຂ່າວສານ ແລະ ຊັກຖາມຂໍ້ມູນຕ່າງໆເປັນຕົ້ນນະໂຍບາຍທາງດ້ານການຄ້າ-ການລົງທຶນ ແລະການສ້າງຕັ້ງວິສາຫະກິດໃນ ສປປ ລາວ ມູມມອງຂອງນັກລົງທຶນຕ່າງປະເທດໃນການດໍາເນີນທຸລະກິດ ແລະ ການລົງທຶນໃນ ສປປ ລາວ ນະໂຍບາຍການຄຸ້ມຄອງລະບົບພັດທະນາຂະແໜງທະນາຄານການເງິນເພື່ອຮັບຮອງການເຕີບໂຕຂອງເສດຖະກິດລາວໃນຍຸກປັດຈຸບັນລວມເຖິງກາລະໂອກາດ ແລະ ສິ່ງທ້າທາຍທາງດ້ານການລົງທຶນໃນ ສປປ ລາວ ພາ ຍໃຕ້ນະໂຍບາຍ “ໜຶ່ງ ແລວທາງໜຶ່ງເສັ້ນທາງ” ຂອງລັດຖະບານ ສປ ຈີນ.

  ໃນໂອກາດນີ້ທ່ານ ສົມດີ ດວງດີ ໄດ້ ມີທິດຊີ້ນໍາໃຫ້ເນັ້ນຕື່ມອີກວ່າ: ລັດຖະບານຈະສືບຕໍ່ໃຫ້ຄວາມສໍາຄັນໃນການຮັກສາສະຖຽນລະພາບຂອງເສດຖະກິດ ມະຫາພາກ ແລະ ຕັ້ງໜ້າຊຸກຍູ້ການເຕີບ ໂຕຂອງເສດຖະກິດຢ່າງສະເໝີຕົ້ນສະເໝີປາຍພ້ອມນັ້ນກໍຈະສືບຕໍ່ພະຍາຍາມເປີດກວ້າງຕະຫຼາດ ແລະການເຊື່ອມໂຍງ ເສດຖະກິດກັບພາກພື້ນ ແລະສາກົນຕິດ ພັນກັບການປັບປຸງ ແລະ ການກໍ່ສ້າງພື້ນ ຖານໂຄງລ່າງ ເພື່ອການເຊື່ອມຈອດກັບພາກພື້ນສິ່ງດັ່ງກ່າວແມ່ນຜົນປະໂຫຍດຮ່ວມກັນກັບພາກລັດ ແລະ ພາກທຸລະກິດ ແລະ ທັງແມ່ນຄວາມຈໍາເປັນຂອງ ສປປ ລາວ ສະນັ້ນຈຶ່ງຮຽກຮ້ອງມາຍັງທຸກພາກສ່ວນ ແລະ ຫົວ ໜ່ວຍທຸລະກິດໃຫ້ສືບຕໍ່ເອົາໃຈໃສ່ສຶກສາກາລະໂອກາດທີ່ເກີດຂຶ້ນຈາກການປະຕິບັດນະໂຍບາຍຕ່າງໆ ຂອງລັດຖະບານໂດຍຄໍານຶ່ງເຖິງສະພາບຄວາມເປັນຈິງທ່າແຮງທີ່ແຂ່ງຂັນໄດ້ຄວາມເປັນໄປໄດ້ໃນດ້ານຕ່າງໆ ແລະ ການຜັນແປຂອງສະພາບການຂອງໂລກ ແລະພາກພື້ນເມື່ອເຫັນໂອກາດແລ້ວໃຫ້ເລີ່ມສ້າງເປັນໂຄງການລົງທຶນຂອງທຸລະກິດພາກລັດຈະສືບຕໍ່ເອົາໃຈໃສ່ສ້າງເງື່ອນໄຂສະດວກຊຸກຍູ້ສົ່ງເສີມ ແລະແກ້ໄຂບັນຫາໃຫ້ພາກທຸລະກິດຢ່າງແທດເໝາະ ແລະ ທັນການ.

ໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ແຕ່ຫ້າມກັອບປີ້ຂ່າວ

แชร์