ງານ​ບຸນປະເພນີແຂ່ງຂັນຊ່ວງ​ເຮືອ​ປະຈຳ​ປີ 2026 ຢູ່ເມືອງບໍ່ແຕນ ແຂວງໄຊຍະບູລີ ໄດ້ຈັດຂຶ້ນໃນວັນ​ທີ 19 ຕຸລາຜ່ານມາ, ທີ່ສາຍນ້ຳຮອຍ ​ໂດຍການໃຫ້ກຽດເຂົ້າຮ່ວມຂອງທ່ານ ພຸດທະຈອນ ປິ່ນທິບ ກຳມະການພັກແຂວງ ຫົວໜ້າຫ້ອງວ່າການແຂວງ, ມີຄະນະປະທານຈັດງານບຸນ, ແຂກ​ຖືກ​ເຊີນ​ ພ້ອມ​ດ້ວຍ​ມວນ​ຊົນ​ຊາວ​ເມືອງ​ບໍ່ແຕນເຂົ້າຮ່ວມ.

ທ່ານ ສະຫງົບ ພັບບົວອອນ ຮອງປະທານຈັດງານບຸນ ໄດ້ລາຍງານການກະກຽມຄວາມພ້ອມ ໃນການຈັດງານບຸນ. ຈາກນັ້ນ, ທ່ານ ອານຸສິດ ມະໂນສິນ ປະທານຈັດງານບຸນ ໄດ້ກ່າວເປີດພິທີ ວ່າ: ການຈັດງານບຸນຄັ້ງນີ້, ເພື່ອເປັນການສືບຕໍ່ອະນຸລັກ ຮັກສາວັດທະນະທໍາຮີດຄອງປະເພນີອັນດີງາມຂອງຊາດ, ຂອງທ້ອງຖິ່ນ ແລະ ບັນດາເຜົ່າ ຕິດພັນກັບການຊຸກຍູ້ທາງດ້ານເສດຖະກິດ-ສັງຄົມ ທັງເປັນການສົ່ງເສີມການທ່ອງທ່ຽວຂອງເມືອງ ໃຫ້ເປີດກວ້າງອອກສູ່ສາຍຕາຂອງມວນຊົນທັງພາຍໃນ ແລະ ຕ່າງປະເທດ ຊຶ່ງໄດ້ຈັດໃຫ້ມີກິດຈະກໍາຫຼາຍຢ່າງເຊັ່ນ: ການສະແດງສິລະປະ-ວັນນະຄະດີ, ທ່ຽວຊົມຕະຫຼາດນັດ.

ສຳລັບການແຂ່ງຂັນຊ່ວງເຮືອ​ປີ​ນີ້ມີທັງ​ໝົດ 17 ທີມ, ມີ​ທີມຊ່ວງເຮືອ​​ຊາຍ 7 ທີມ ຍິງ 4 ທີມ, ມີທີມຊ່ວງເຮືອຂອງນັກທຸລະກິດຕ່າງເມືອງ 6 ທີມ. ຜົນ​​ການ​ແຂ່ງຂັນ​ຊ່ວງ​​ເຮືອ​ຊາຍ ທີ 1 ເຮືອ​ບ້ານນາສ້ານ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 7,000,000 ລ້ານກີບ, ທີ 2 ເຮືອບ້ານຕາລິ່ງ ໄດ້ຮັບລາງວັນ 6,000,000 ລ້ານກີບ ແລະ ທີ 3 ​​ເຮືອ​ຕາແສງບໍ່ແຕນ ໄດ້ຮັບລາງວັນ 5,000,000 ລ້ານກີບ, ​ເຮືອ​​ເພດ​ຍິງ ​ທີ 1 ເຮືອບ້ານນາສ້ານ ໄດ້ຮັບຂັນເງິນ 1 ໜ່ວຍ ພ້ອມເງິນສົດ 7,000,000 ລ້ານກີບ, ທີ 2 ເຮືອບ້ານ​ຕາລິ່ງ ໄດ້ຮັບລາງວັນ 6,000,000 ລ້ານກີບ ​ແລະ ທີ 3 ເຮືອບ້ານເມືອງຮຳ ໄດ້ຮັບລາງວັນ 5,000,000 ລ້ານກີບ, ທີມເຮືອຂອງນັກທຸລະກິດຕ່າງເມືອງທີ 1 ທີມເຮືອພອນທິດານາວາ ໄດ້ຮັບເງິນ 3,000,000 ລ້ານກີບ, ທີ 2 ທິມເຮືອບໍລິສັດຈັນທະວົງ ກໍ່ສ້າງຂົວທາງ ໄດ້ຮັບເງິນ 2,000,000 ກີບ, ທີ 3 ທີມເຮືອຈັນທະສອນ ໄດ້ຮັບເງິນ 1,000,000 ກີບ.

ໂອກາດ​ນີ້, ທ່ານ ອານຸສິດ ມະໂນສິນ ໄດ້​ກ່າວສະ​ແດງ​ຄວາມ​ຂອບ​ໃຈ​ຢ່າງ​ສູງ ​ຕໍ່​ອົງການ​ຈັດ​ຕັ້ງ​ພັກ-ລັດ ບໍລິສັດ, ຫ້າງ​ຮ້ານ, ນັກ​ທຸລະ​ກິດ, ພໍ່ຄ້າ-ຊາວ​ຂາຍ ​ແລະ ​ປະຊາຊົນ​ໃນ​ທົ່ວ​ເມືອງ​ທີ່​ໄດ້​ໃຫ້ການ​ອຸປະຖຳ​ທາງ​ດ້ານ​ວັດ​ຖຸປັດ​ໃຈ ​ແລະ ພ້ອມ​ກັນ​ຈັດ​ງານປະ​ເພນີ ບຸນຊ່ວງ​ເຮືອ​ປະຈຳ​ປີນີ້ໃຫ້ສຳ​ເລັດ​ລົງ​ດ້ວຍ​ບັນຍາກາດ​ຄຶກຄື້ນ​ມ່ວນ​ຊື່ນ ​ແລະ ມີ​ຄວາມ​ສະຫງົບ​ປອດ​ໄພ 100%. ຂ່າວ-ພາບ: ສາຍຄຳ ບຸນຍາວົງ