ສັງຄົມຈົ່ງຮ່ວມປູກຕົ້ນໄມ້ໃຫ້ເປັນຂະບວນຟົດຟື້ນ

  ລັດຖະບານກໍຄືກະຊວງກະສິກຳ ແລະປ່າໄມ້ໄດ້ອອກແຈ້ງການມາແລ້ວກ່ຽວກັບການສ້າງຂະບວນການປູກຕົ້ນໄມ້ ແລະຟື້ນຟູປ່າເນື່ອງໃນໂອກາດວັນປູກຕົ້ນ ໄມ້ແຫ່ງຊາດວັນທີ 1 ມິຖຸນາ 2019 ນີ້ ໂດຍແຈ້ງການດັ່ງກ່າວໄດ້ລະບຸວ່າໃຫ້ທຸກກົມ,ທຸກພະແນກທີ່ກ່ຽວຂ້ອງລວມທັງຫົວໜ່ວຍທຸລະກິດທີ່ມີເງື່ອນໄຂພ້ອມໃນການກຽມປູກຕົ້ນໄມ້ເພື່ອເພີ່ມພື້ນທີ່ປ່າສີຂຽວນັ້ນເລີ່ມປູກໄດ້ເລີຍໂດຍບໍ່ຕ້ອງລໍຖ້າຮອດວັນປູກຕົ້ນໄມ້ຈຶ່ງປູກ.

  ສຳລັບແຈ້ງການຂອງກະຊວງກະສິກຳ ແລະປ່າໄມ້, ສະບັບເລກທີ 0035/ກປ, ລົງວັນທີ 10 ພືດສະພາ 2019 ຜ່ານມາ, ໂດຍຕາງໜ້າເຊັນຂອງ ທ່ານ ທອງ ພັດ ວົງມະນີ ຮອງລັດຖະມົນຕີກະຊວງກະສິກຳ ແລະປ່າໄມ້ ທີ່ໄດ້ແຈ້ງອອກໄປນັ້ນກໍເພື່ອໃຫ້ກົມປ່າໄມ້, ພະແນກກະສິກຳ ແລະ ປ່າໄມ້ປະຈຳແຂວງ, ນະ ຄອນຫຼວງເປັນເຈົ້າການໂຄສະນາເຜີຍແຜ່ບັນດານະໂຍບາຍ, ກົດໝາຍ ແລະລະບຽບການກ່ຽວກັບການປູກໄມ້, ຟື້ນຟູປ່າທຳມະຊາດໂດຍຜ່ານສື່ມວນຊົນ ເພື່ອໃຫ້ທຸກຊັ້ນຄົນທົ່ວສັງຄົມຮັບຮູ້, ເຊື່ອມຊືມເຫັນໄດ້ເຖິງຄວາມສຳຄັນຂອງວຽກງານປ່າໄມ້ໂດຍສະເພາະການ

ປູກໄມ້,ການຟື້ນຟູປ່າໄມ້ທຳມະຊາດ,ການປົກປັກຮັກສາປ່າໄມ້,ການປົກປັກຮັກສາສິ່ງແວດລ້ອມ ແລະການປ້ອງກັນໄຟໄໝ້ປ່າ, ພ້ອມທັງປຸກລະດົມຄອບຄົວ, ຜູ້ປະກອບການ, ສູນ ຫຼື ສະຖານີຂອງລັດ ຈັດຕັ້ງວາງສະແດງເບ້ຍໄມ້, ໃຫ້ຄວາມ ຮູ້ຜ່ານກິດຈະກຳຖາມ-ຕອບຕິດພັນກັບການສະເຫຼີມສະຫຼອງວັນເດັກນ້ອຍສາກົນ ວັນທີ 1 ມິຖຸນາ 2019 ໃຫ້ຟົດຟື້ນແນໃສ່ປູກຈິດສຳນຶກໃຫ້ເຍົາວະຊົນເຂົ້າໃຈເຖິງຄຸນປະໂຫຍດຂອງຕົ້ນໄມ້ຕໍ່ການດຳລົງຊີວິດ ແລະສາຍກ່ຽວພັນກັບການປ່ຽນແປງດິນຟ້າອາກາດ.

ພ້ອມດຽວກັນນັ້ນ, ຍັງໄດ້ມອບໃຫ້ພາກສ່ວນທີ່ກ່ຽວຂ້ອງແຕ່ງຕັ້ງຄະນະຮັບຜິດຊອບວຽກດັ່ງກ່າວເພື່ອຊີ້ນຳບັນຊາວຽກງານສົ່ງເສີມການປູກໄມ້ຟື້ນຟູປ່າ ແລະແຕ່ງຕັ້ງພະນັກງານວິຊາການລົງຊ່ວຍແນະນຳເຕັກນິກການປູກ, ບົວລະບັດຮັກສາໃຫ້ແກ່ບັນດາສຳນັກງານ, ອົງການ, ຄອບຄົວ, ບໍລິສັດ, ຜູ້ປະກອບການ ແນໃສ່ເຮັດໃຫ້ການປູກໄມ້ ແລະຟື້ນຟູປ່າທຳມະຊາດກາຍເປັນຮູບປະທຳ ແລະມີປະສິດທິຜົນກວ່າເກົ່າ, ຕໍ່ກັບພະແນກ ກປ ປະຈຳແຂວງ, ນະຄອນຫຼວງ ແມ່ ນໃຫ້ຊີ້ນຳກອງຄຸ້ມຄອງປ່າປ້ອງກັນ ແລະປ່າສະຫງວນຂອງແຂວງ, ຂະແໜງກະສິກຳ ແລະປ່າໄມ້ປະຈຳເມືອງ, ສົມທົບກັບອົງການປົກຄອງເມືອງກຳນົດເຂດ ປ່າໄມ້ເພື່ອທຸລະກິດ, ການປົກປັກຮັກສາ ສິ່ງແວດລ້ອມ ກໍຄືການຟື້ນຟູປ່າໄມ້ຢ່າງ ມີຈຸດສຸມ ແລະມີເປົ້າໝາຍຍາວນານ, ສະເພາະພັນໄມ້ທີ່ຈະປູກແມ່ນໃຫ້ຖືເອົາພັນໄມ້ພື້ນເມືອງ ຫຼື ໄມ້ນຳເຂົ້າທີ່ເປັນເສດຖະກິດ, ເບ້ຍໄມ້ທີ່ແຂງແຮງ ແລະ ທົນທານ ເໝາະສົມກັບສະພາບແວດລ້ອມຂອງແຕ່ລະທ້ອງຖິ່ນ, ສ່ວນການປູກໃນສຳນັກງານຫ້ອງການແມ່ນໃຫ້ເນັ້ນໄມ້ປະດັບ, ໄມ້ໃຫ້ໝາກ, ໄມ້ທີ່ເປັນຮົ່ມລຳຕົ້ນບໍ່ສູງ ແລະສາມາດປົກປັກສາສິ່ງແວດລ້ອມ.

  ສ່ວນກອງຄຸ້ມຄອງປ່າສະຫງວນແຫ່ງຊາດ, ກອງຄຸ້ມຄອງປ່າປ້ອງກັນ ແລະປ່າສະຫງວນຂອງແຂວງ, ກອງຄຸ້ມຄອງປ່າຜະລິດ, ຂະແໜງປ່າໄມ້ປະຈຳ ແຂວ ງ ແລະນະຄອນຫຼວງ, ລວມທັງຫ້ອງການກະສິກຳ ແລະປ່າໄມ້ປະຈຳເມືອງແມ່ນໃຫ້ເປັນເຈົ້າການກວດກາ, ເກັບກຳ ແລະສັງລວມສະຖິຕິການປູກໄມ້ໂດຍສົມ ທຽບໃສ່ກັບໂຕເລກແຜນການໃນສົກປີຜ່ານມາສາມາດປະຕິບັດໄດ້ເທົ່າໃດ, ຈຳນວນເບ້ຍທີ່ຜະລິດໄດ້, ໂດຍແຍກລະອຽດແຕ່ລະຊະນິດເພື່ອຈະປູກໃນແຕ່ລະເຂດ.

ສຳລັບການປູກໄມ້ນັ້ນ ແມ່ນໃຫ້ອີງ   ຕາມສະພາບເງື່ອນໄຂຂອງແຕ່ລະທ້ອງ ຖິ່ນທີ່ເໝາະສົມ ໂດຍເນັ້ນໃສ່ເນື້ອໃນປຸກ ລະດົມເປັນຕົ້ນຕໍ ບົນພື້ນຖານປະຢັດມັດ ທະຍັດ ແລະຕ້ານການຟູມເຟືອຍ, ສ່ວນ ທ້ອງຖິ່ນໃດ ຫຼື ບ່ອນໃດທີ່ມີເງື່ອນໄຂແມ່ນ ໃຫ້ເລີ່ມລົງມືປູກແຕ່ດຽວນີ້ ໂດຍບໍ່ໃຫ້ລໍຖ້າ ຮອດວັນທີ 1 ມິຖຸນາ, ທັງນີ້ກໍເພື່ອເຮັດໃຫ້ ການສະເຫຼີມສະຫຼອງວັນເດັກນ້ອຍສາ ກົນ ກໍຄື ວັນປູກຕົ້ນໄມ້ແຫ່ງຊາດມີຄວາມ ໝາຍສຳຄັນ, ທັງເປັນການຊຸກຍູ້ແຮງ ການປູກໄມ້ ແລະຟື້ນຟູປ່າໄມ້ໃຫ້ກາຍເປັນພັນທະ ແລະໜ້າທີ່ຂອງປວງຊົນຕິດພັນກັບການປູກຈິດສຳນຶກໃຫ້ອານຸຊົນ, ເຍົາວະຊົນກໍຄືປະຊາຊົນບັນດາເຜົ່າໃນທົ່ວສັງຄົມໃຫ້ຮູ້ຈັກຮັກ ແລະສະຫວງແຫນປ່າໄມ້, ຊັບພະຍາກອນປ່າໄມ້ຕາມທິດພັດທະນາສີຂຽວ ແລະຍືນຍົງໃຫ້ກາຍເປັນຂະບວນການຟົດຟື້ນ.

ໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ແຕ່ຫ້າມກັອບປີ້ຂ່າວ

แชร์