ຫົວພັນເປີດເທສະການຜ້າໄໝມ້ອນພ້ອມສະຫຼອງໜ່ວຍແກ້ວຫຼັກເມືອງ

  ວັນທີ 16 ພຶດສະພາ 2019 ນີ້, ແຂວງຫົວພັນໄດ້ຈັດພິທີເປີດເທສະການຜ້າໄໝມ້ອນແຂວງຫົວພັນຂື້ນທີ່ສວນແກ້ວຫຼັກເມືອງ ເມືອງຊຳເໜືອ, ພາຍໃຕ້ ການເປັນປະທານຂອງທ່ານ ພູໂຊນ ທຳມະວິໄຊ ຮອງເຈົ້າແຂວງໆຫົວພັນ, ຜູ້ຊີ້ນຳຂົງເຂດວັດທະນະທຳ-ສັງຄົມຂັ້ນແຂວງ, ເປັນກຽດເຂົ້າຮ່ວມມີທ່ານ ນາງ ແພງ ກັນຍາພິມ ຮອງເລຂາພັກແຂວງ, ຮອງເຈົ້າແຂວງໆຫົວພັນ, ມີບັນດາທ່ານໃນການນຳແຂວງ, ການນຳບັນດາເມືອງທົ່ວແຂວງ, ພະແນກການອ້ອມຂ້າງແຂວງ, ບັນດາບໍລິສັດຫ່າງຮ້ານ, ຕະຫຼອດຮອດພໍ່ແມ່ປະຊາຊົນອ້ອມຂ້າງເທສະບານແຂວງເຂົ້າຮ່ວມຢ່າງພ້ອມພຽງ.

  ທ່ານ ນາງ ໝັ້ນ ເພັງຄັດຕິຍະ ປະທານສະຫະພັນແມ່ຍິງແຂວງຫົວພັນ ກ່າວວ່າ: ຫັດຖະກຳຕໍ່າຫູກທໍໄໝ, ການປູກມອນລ້ຽງມ້ອນເປັນມູນເຊື້ອອັນດີງາມ ຂອງເອື້ອຍນ້ອງແມ່ຍິງແຂວງຫົວພັນ, ເປັນທ່າແຮງໜຶ່ງຂອງແຂວງທັງເປັນເອກະລັກສະເພາະທີ່ເປັນມູນເຊື້ອອັນດີງາມທີ່ສືບທອດກັນມາແຕ່ປູ່ຍ່າຕາຍາຍຈົນ ເຖິງທຸວັນນີ້. ຜ້າແພ, ສິ້ນໄໝມ້ອນ, ສີໄມ້ລາຍມືອັນປານີດຂອງເອື້ອຍນ້ອງແມ່ຍິງແຂວງຫົວພັນໄດ້ມີຊື່ສຽງໂດງດັງພ້ອມທັງໄດ້ຮັບລາງວັນຕະຫຼອດມາ, ເປັນທີ່ນິຍົມທັງພາຍໃນ ແລະຕ່າງປະເທດ.

  ທ່ານ ພູໂຊນ ທຳມະວິໄຊ ກ່າວເປີດພິທີວ່າ: ການຈັດເທດສະການຜ້າໄໝມ້ອນ ແຂວງຫົວພັນຄັ້ງນີ້ແມ່ນແນໃສ່ອະນຸລັກຮັກສາຮີດຄອງປະເພນີອັນດີງາມຂອງຊາດກໍ່ຄືແຂວງຫົວພັນ, ທັງເປັນການເຜີຍແຜ່ວັດທະນະທຳອັນດີງາມຂອງປະຊາຊົນບັນດາເຜົ່າແຂວງຫົວພັນ ໂດຍສະເພາະແມ່ນຫັດຖະກຳຕໍ່າຫູກທໍໄໝ, ການຄົ້ນຄິດລວດລາຍຕ່າງໆລົງຜືນຜ້າແຜຂອງເອື້ອຍນ້ອງແມ່ຍິງທີ່ມີເອກະລັກສະເພາະຂອງແຕ່ລະເຜົ່າໃນແຂວງຫົວພັນ ເປັນສິ່ງໜຶ່ງທີ່ໜ້າພາກ ພູມໃຈ ແລະ ເອກອ້າງທະນົງໃຈຂອງຊາວແຂວງຫົວພັນ. ພ້ອມນີ້ຍັງເປັນການກະຕຸກຊຸກຍູ້, ສົ່ງເສີມສ້າງໂອກາດໃຫ້ແກ່ບັນດາຫົວໜ່ວຍທຸລະກິດຜູ້ຜະລິດຫັດຖະກຳພາຍໃນແຂວງຫົວພັນໄດ້ນຳເອົາຜະລິດຕະພັນສິນຄ້າຂອງຕົນມາສະແດງ ແລະວາງຂາຍ, ເພື່ອສ້າງທ່າແຮງໃຫ້ແກ່ການພັດທະນາສິນຄ້າ, ທຸລະກິດຫັດຖະກຳຕໍ່າຫູກທໍໄໝໃຫ້ນັບມື້ດີຂຶ້ນເລີຍໆ, ປະກອບສ່ວນເຂົ້າໃນວຽກງານການທ່ອງທ່ຽວໃຫ້ນັບມື້ແຂງແຮງ ແລະ ເປັນການສ້າງລາຍຮັບໃຫ້ປະຊາຊົນເພື່ອ ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

  ພາຍໃນເທສະການຜ້າໄໝມ້ອນ ແຂວງຫົວພັນຄັ້ງນີ້, ໄດ້ຈັດໃຫ້ມີກິດຈະກຳແຂ່ງຂັນສາວໄໝ, ຜ່ຽນຫຼອດ ແລະ ຄົ້ນຫູກໄວ-ງາມ; ປະກວດຜ້າໄໝ, ສິ້ນ ໄໝງາມ; ປະກວດນາງສາວຜ້າໄໝມ້ອນ, ນັກຮ້ອງສຽງດີ, ງານຕະຫຼາດນັດສິນຄ້າຜ້າແພໄໝມ້ອນ, ຜະລິດຕະພັນຫັດຖະກຳຂອງແຂວງຫົວພັນອີກດ້ວຍ ແລະຕິດພັນກັບການສະເຫຼີມສະຫຼອງສວນແກ້ວຫຼັກເມືອງຄົບຮອບ 11 ປີ ເຊິ່ງເລີ່ມແຕ່ ມື້ນີ້ເຖິງວັນທີ 17 ພຶດສະພາ 2019 ຈິ່ງຈະອັດລົງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ແຕ່ຫ້າມກັອບປີ້ຂ່າວ

แชร์