ລັດກຽມແຜນປະຕິບັດຮູບການລົງທຶນຄືນໃໝ່ຫວັງດຶງດູດໃຈນັກລົງທຶນຕ່າງຊາດຫຼາຍຂື້ນ

    ກອງປະຊຸມປຶກສາຫາລືຕໍ່ຮ່າງບົດລາຍງານແຜນການປະຕິຮູບການລົງທຶນ ຢູ່ ລາວ ໄດ້ຈັດຂຶ້ນໃນວັນທີ 16 ພຶດສະພາ 2019 ທີ່ນະຄອນຫຼວງວຽງຈັນ  ພາຍໃຕ້ການເປັນປະທານຂອງທ່ານ ນາງ ຄໍາຈັນ ວົງແສງບູນ ຮອງລັດຖະມົນຕີກະຊວງແຜນການ ແລະການລົງທຶນ, ມີບັນດາຄະນະ​ກົມ, ຄະນະ​ພະ​ແນ​ກ, ວິຊາການບັນດາກະຊວງອ້ອມຂ້າງ, ຊ່ຽວຊານອາວຸໂສພາກເອກະຊົນ ແລະຊ່ຽວຊານນະໂຍບາຍການລົງທຶນກຸ່ມທະນາຄານໂລກເຂົ້າຮ່ວມ.

  ທ່ານ ນາງ ຄໍາຈັນ ວົງແສງບູນ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອອຳນວຍຄວາມສະດວກ ແລະເປັນການສົ່ງເສີມການລົງທຶນທັງພາຍໃນ ແລະຕ່າງປະ ເທດ. ແຜນການປະຕິຮູບການລົງທຶນ (IRM) ແມ່ນກົນໄກທີ່ສຳຄັນສໍາລັບການປຶກສາຫາລື ເພື່ອພັດທະນານະໂຍບາຍການລົງທຶນທີ່ຈໍາເປັນເພື່ອດຶງດູດກາ ນລົງທຶນໂດຍກົງຈາກຕ່າງປະເທດຊື່ງສາມາດຊ່ວຍໃຫ້ປະເທດທີ່ຕ້ອງການພັດທະນາ ແລະດຶງດູດການລົງທຶນ. ສໍາລັບເປົ້າໝາຍຂອງແຜນການປະຕິຮູບການລົງທຶນແມ່ນເພື່ອສະເໜີການວິໃຈທີ່ມີລະບຽບການ ແລະເປັນເຄື່ອງມືໃນການປະຕິບັດໜ້າທີ່ແບບມີສ່ວນຮ່ວມ. ຮ່າງບົດລາຍງານແຜນການປະຕິຮູບການລົງທຶນສະໜັບສະໜູນກະຊວງແຜນການ ແລະການລົງທຶນ (MPI) ແລະ ລັດຖະບານຂອງ ລາວ ເພື່ອຊີ້ແຈງສະພາບ ແລະທ່າແຮງເສດຖະກິດປະຈຸບັນທີ່ເຊື່ອມໂຍມກັບເສດຖະກິດໂລກ.

  ແຜນການປະຕິຮູບການລົງທຶນນີ້ສາມາດສະແດງບົດບາດຂອງການລົງທຶນໂດຍກົງຂອງຕ່າງປະເທດໃນສປປລາວ, ລວມທັງທ່າອ່ຽງ, ປະເພດ ແລະຄວາມບົກຜ່ອງຂອງການລົງທຶນໂດຍກົງຂອງຕ່າງປະເທດ (FDI), ການວິເຄາະທາງດ້ານລະບຽບການ, ກົດໝາຍ, ສະຖາບັນ ແລະ ນະໂຍບາຍການສົ່ງເສີມການລົງທຶນສາມາດສັງລວມເປັນບົດລາຍງານການປະຕິຮູບການລົງທຶນເພື່ອຊ່ວຍໃຫ້ມີການພິຈາລະນາໃຫ້ມີການປັບປູງແຜນຍຸດທະສາດການລົງທຶນຂອງລັດຖະ ບານແຫ່ງ ສປປ ລາວ ໃນຕໍ່ໜ້າ.

  ໃນໄລຍະຜ່ານມາ ລາວ ຍັງບໍ່ໄດ້ມີແຜນປະຕິຮູບການລົງທຶນຢ່າງຈະແຈ້ງ ແລະມີແບບແຜນ. ຊຶ່ງແຜນການປັບປຸງການລົງທຶນອາດສາມາດຊ່ວຍໃຫ້ເພີ່ມການລົງທຶນໂດຍກົງຈາກຕ່າງປະເທດ, ສ້າງຄວາມເຊື່ອໝັ້ນໂດຍອາໃສຂໍ້ມູນທາງດ້ານຕົວຊີ້ວັດໃນການສົ່ງເສີມບັນຍາກາດໃນການເຮັດທຸລະກິດ ສປປ ລາວ ເຊັ່ນ: ການອໍານວຍຄວາມສະດວກໃນການດໍາເນີນທຸລະກິດ, ຄວາມກະຈ່າງແຈ້ງທາງດ້ານນິຕິກຳທີ່ຕິດພັນກັບການດຳເນີນທຸລະກິດ, ຂໍ້ມູນຂ່າວສານດ້ານເສດຖະກິດ, ແຫຼ່ງຊັບພະຍາກອນທຳມະຊາດ, ໂຄງລ່າງພື້ນຖານ, ໄຟຟ້າ, ນໍ້າປະປາ, ລະບົບສາທາລະນຸປະໂພກ, ສະຖານບັນການເງິນ-ທະນາຄານ, ສິດນໍາໃຊ້ທີ່ດິນ, ຂັ້ນຕອນການດຳເນີນງານ, ເວລາ, ຄ່າໃຊ້ຈ່າຍຕ່າງໆຕ້ອງມີລະບຽບການລົງທຶນເປັນເອກະພາບ ແລະສະເຖຍລະພາບ.

ນອກນັ້ນ ທ່ານນາງ ຄໍາຈັນ ວົງແສງບູນ ໄດ້ຢໍ້າຕື່ມວ່າ: ເພື່ອເຮັດໃຫ້ວຽກງານດັ່ງກ່າວໄດ້ຮັບໝາກຜົນ ແລະປະສົບຜົນເປັນຈິງສິ່ງຄວນເອົາໃຈໃສ່ອາດແມ່ນ: ການລົງທຶນທີ່ມີປະສິດທິຜົນສູງ; ສປປ ລາວ ຍັງບໍ່ມີນະໂຍບາຍການລົງທຶນທີ່ຊັດເຈນ ແລະຄົບຖ້ວນ; ໃນໄລຍະເວລາການທົບທວນຄືນລະບຽບການລົງທຶນ, ບັນຫາທີ່ສໍາຄັນທາງດ້ານກົດໝາຍຈໍານວນໜຶ່ງໄດ້ຖືກກວ່າອາດຈະສົ່ງຜົນກະທົບຕໍ່ການລົງທຶນ; ແຜນການເພື່ອປັບປຸງລະບົບການຊຸກຍູ້ ແລະ ໂຄງການສົ່ງເສີມໂດຍອີງໃສ່ການປະຕິບັດທີ່ດີທີ່ສຸດ ແລະ ບົດຮຽນຈາກປະສົບການຕື່ມອີກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ແຕ່ຫ້າມກັອບປີ້ຂ່າວ

แชร์