ຈີນ ແລະສະຫະພາບເອີຣົບຄວນຍຶດໝັ້ນຖານະທີ່ເປັນຄູ່ຮ່ວມມື ແລະ ທິດທາງພື້ນຖານການຮ່ວມມື
ວິທະຍຸໂທລະພາບສູນກາງຈີນ ລາຍງານ, ໃນລະຫວ່າງວັນທີ 8 ຫາ 9 ຕຸລານີ້, ກອງປະຊຸມສະໄໝສາມັນຄັ້ງທີ 2 ຂອງກົນໄກປຶກສາຫາລືການຄ້າ ແລະ ການລົງທຶນຈີນ-ເອີຣົບ ໄດ້ຈັດຂຶ້ນຢູ່ນະຄອນຫຼວງປັກກິ່ງຂອງຈີນ. ສອງຝ່າຍໄດ້ປຶກສາຫາລືທີ່ເນັ້ນປະຕິບັດຕົວຈິງ ແລະ ໄດ້ຮັບໝາກຜົນຢ່າງອຸດົມສົມບູນ ພ້ອມທັງໄດ້ບັນລຸບັນຊີລາຍການຄວາມຮັບຮູ້ທີ່ເປັນເອກະພາບກັນ 16 ລາຍການທີ່ກວມເອົາ 4 ຂົງເຂດ. ສອງຝ່າຍຍັງໄດ້ຕົກລົງຈະຈັດກອງປະຊຸມສະໄໝສາມັນຄັ້ງທີ 3 ຂອງກົນໄກດັ່ງກ່າວໃນເດືອນມີນາປີ 2027. ນີ້ສະແດງໃຫ້ເຫັນຢ່າງເຕັມທີ່ວ່າ: ຈີນ ແລະ ສະຫະພາບເອີຣົບມີຄວາມເຕັມໃຈ ແລະ ມີສະຕິປັນຍາ ເພື່ອຄວບຄຸມ ແລະ ແກ້ໄຂຂໍ້ຍັດແຍ້ງຢ່າງເໝາະສົມໂດຍຜ່ານການສົນທະນາ ແລະ ການປຶກສາຫາລືກັນ.
ໃນກອງປະຊຸມສະໄໝສາມັນດັ່ງກ່າວ, ສອງຝ່າຍໄດ້ຢືນຢັນຈະແກ້ໄຂຂໍ້ຂັດແຍ້ງລະຫວ່າງສອງຝ່າຍ ແລະ ຄວາມກັງວົນຂອງກັນແລະກັນຢ່າງສົມດຸນໃນຂອບກົດລະບຽບອົງການການຄ້າໂລກ ເພື່ອຊຸກຍູ້ໃຫ້ການຄ້າຈີນ-ເອີຣົບພັດທະນາໄປຂ້າງໜ້າຢ່າງໝັ້ນທ່ຽງ. ສອງຝ່າຍໄດ້ບັນລຸຄວາມຮັບຮູ້ທີ່ເປັນເອກະພາບກັນ 16 ລາຍການ, ຈຸດເດັ່ນໃຫຍ່ທີ່ສຸດແມ່ນຈັດເອົາບັນຫາລົດຍົນທີ່ວົງການພາຍນອກໃຫ້ຄວາມສົນໃຈໃນລະດັບສູງນັ້ນ ເຂົ້າໃນວົງໂຄຈອນແຫ່ງການເຈລະຈາທີ່ຈະສືບຕໍ່ດຳເນີນໄປ. ນອກນີ້, ບັນຊີລາຍການດັ່ງກ່າວກໍໄດ້ຮັບຄວາມຄືບໜ້າໃນດ້ານການຄຸ້ມຄອງການສົ່ງອອກ, ຊັບສິນທາງປັນຍາ ແລະອື່ນໆ ເຊິ່ງສະແດງໃຫ້ເຫັນວ່າ: ກົນໄກປຶກສາຫາລືການຄ້າ ແລະ ການລົງທຶນຈີນ-ເອີຣົບໄດ້ປ່ຽນຈາກການສ້າງຂອບໄປສູ່ການສ້າງຜົນໄດ້ຮັບ.
ໃນຖານະເປັນ 2 ກຸ່ມເສດຖະກິດໃຫຍ່ຕົ້ນຕໍຂອງໂລກ, ການທີ່ຈີນ ແລະ ເອີຣົບເກີດມີຂໍ້ຂັດແຍ້ງໃນການແລກປ່ຽນດ້ານເສດຖະກິດການຄ້າ ແມ່ນເລື່ອງປົກກະຕິ. ໃນຖານະເປັນປະເທດໃຫຍ່ທີ່ມີຄວາມຮັບຜິດຊອບ, ຈີນບໍ່ເຄີຍຕັ້ງໃຈສະແຫວງຫາການໄດ້ປຽບດຸນການຄ້າຈັກເທື່ອ. ນັກການເມືອງບາງຄົນໃນເອີີຣົບປ່າວຂ່າວອັນທີ່ເອີ້ນວ່າ “ຄວາມສາມາດການຜະລິດເກີນຄວາມຕ້ອງການ” ເຊິ່ງສ່ວນຫຼາຍແມ່ນຕັ້ງຢູ່ບົນພື້ນຖານຕົວຊີ້ວັດດຽວ ຄື ການຂາດດຸນການຄ້າສິນຄ້າປະເພດຈັບຕ້ອງໄດ້, ແຕ່ຕັ້ງໃຈຫຼີກລ່ຽງຄວາມຈິງທີ່ການຄ້າການບໍລິການແມ່ນການເກີນດຸນ. ຂໍ້ມູນສະແດງໃຫ້ເຫັນວ່າ: ໃນປີ 2025, ການເກີນດຸນການຄ້າການບໍລິການຂອງເອີຣົບຕໍ່ຈີນແມ່ນ 48 ຕື້ 300 ລ້ານໂດລາ. “ການເກີນດຸນຢູ່ຈີນ ແລະ ຜົນກຳໄລຢູ່ເອີຣົບ” ຈຶ່ງແມ່ນສະພາບຕົວຈິງຂອງການຄ້າຈີນ-ເອີຣົບ.
ຄວາມຈິງໄດ້ພິສູດໃຫ້ເຫັນແລ້ວວ່າ: ຈີນບໍ່ແມ່ນສາເຫດຕົ້ນຕໍຂອງບັນຫາຕ່າງໆຂອງເອີຣົບ, ແຕ່ແມ່ນຄູ່ຮ່ວມມືໃນການແກ້ໄຂບັນຫາ. ປີນີ້ແມ່ນປີທຳອິດໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 15 ຂອງຈີນ. ໃນໄລຍະຈັດຕັ້ງປະຕິບັດແຜນດັ່ງກ່າວ, ຈີນຈະສົ່ງເສີມການຄ້າຕ່າງປະເທດໃຫ້ມີຄຸນນະພາບ ແລະ ປະສິດທິພາບສູງຂຶ້ນ, ຊຸກຍູ້ການພັດທະນາການນຳເຂົ້າ-ສົ່ງອອກໃຫ້ມີຄວາມສົມດຸນ, ປັບປຸງບັນຊີລາຍການຜະລິດຕະພັນ, ການບໍລິການ ແລະ ເຕັກໂນໂລຊີທີ່ນຳເຂົ້າ, ຫຼຸດຜ່ອນບັນຊີລາຍການທາງລົບສຳລັບການເຂົ້າມາລົງທຶນຈາກຕ່າງປະເທດ ແລະອື່ນໆ. ເລື່ອງເຫຼົ່ານີ້ຈະສະໜອງໂອກາດການຕະຫຼາດທີ່ກວ້າງຂວາງກວ່າເກົ່າໃຫ້ແກ່ປະເທດຕ່າງໆໃນໂລກ ເຊິ່ງລວມທັງສະຫະພາບເອີຣົບ.
