ປີນີ້ກອງຄຸ້ມຄອງພາສີ II ຕັ້ງເປົ້າລາຍຮັບບັນລຸ 45 ຕື້ກວ່າກີບ 4 ເດືອນ ເກັບໄດ້ລື່ນແຜນ

 ການຈັດເກັບລາຍຮັບເຂົ້າງົບປະມານແຫ່ງລັດຂອງຂະແໜງພາສີມີລັກສະນະເພີ່ມຂຶ້ນຕາມລະດັບຄາດໝາຍໂດຍສະເພາະຢູ່ກອງຄຸ້ມຄອງພາສີ  II  (ແຂວງ ອຸດົມໄຊ-ແຂວງຜົ້ງສາລີ) ໄດ້ຮັບຕົວເລກແຜນການທັງໝົດ 45 ຕື້ກວ່າກີບ, ໃນ 4 ເດືອນປີ 2019 ຜ່ານມາສາມາດປະຕິບັດໄດ້17,45 ຕື້ກວ່າກີບ, ລື່ນແຜນ 16,38% ເທົ່າກັບ 38,79% ຂອງແຜນການປີ, ລາຍຮັບສ່ວນໃຫຍ່ໄດ້ມາຈາກການນຳເຂົ້າສິນຄ້າປະເພດເຄື່ອງອຸປະໂພກ-ບໍລິໂພກ, ເຄື່ອງກໍ່ສ້າງ, ເຄື່ອງໄຟຟ້າ, ນໍ້າມັນເຊື້ອໄຟ, ຄ່າຊັກພິເສດ, ຄ່າ ທຳນຽມ ແລະຄ່າປັບໃໝ-ຂາຍເຄື່ອງຮິບ, ສີ້ນສ່ວນອາໄຫຼ່, ພາຫະນະ ແລະອື່ນໆ.

ທ່ານ ບຸນເພັງ ສຸພັດທອນ ຫົວໜ້າກອງຄຸ້ມຄອງພາສີ II (ແຂວງອຸດົມໄຊ-ແຂວງຜົ້ງສາລີ) ໄດ້ໃຫ້ສໍາພາດຕໍ່ທີມຂ່າວການເງິນວ່າ: ກອງຄຸ້ມຄອງພາສີ  II  ປະກອບມີຂະ ແໜງບໍລິຫານ ແລະກວດກາພາຍໃນ, ຂະແໜງຕ້ານ ແລະກວດສອບຄືນການ ແຈ້ງພາສີ, ມີກອງກວດກາພາສີປະຈຳ ແຂວງອຸດົມໄຊ, ມີ 2 ດ່ານພາສີສາກົນ ຄື: ດ່ານພາສີສາກົນລານຕູ້ຍ, ດ່ານ ພາສີສາກົນປາງຫົກ ແລະ 2 ດ່ານພາສີ ທ້ອງຖິ່ນຄື: ດ່ານພາສີທ້ອງຖິ່ນປ່າຄາ, ດ່ານພາສີທ້ອງຖິ່ນພູຫຼັກຄໍາ, ປະກອບ ມີພະນັກງານ-ເຈົ້າໜ້າພາສີປະຈຳທັງ ໝົດ41 ທ່ານ, ຍິງ 4 ທ່ານ, ມີສະມາຊິກພັກທັງໝົດ 35 ສະຫຍາຍ, ຍິງ 3 ສະຫາຍ, ພະນັກງານຊ່ວຍວຽກ10 ທ່ານ, ຍິງ 3 ທ່ານ.

 ສຳລັບການຈັດຕັ້ງປະຕິບັດວຽກງານວິຊາສະເພາະໃນໄລຍະຜ່ານມາກອງຄຸ້ມຄອງພາສີ II ໄດ້ຖືເອົາວຽກເອົາວຽກງານການເມືອງແນວຄິດເປັນຫຼັກ,ເພື່ອສຶກ ສາອົບຮົມການເມືອງ-ແນວຄິດໃຫ້ ບັນດາຄະນະດ່ານ, ກອງກວດກາພາສີປະຈຳແຂວງ, ພະນັກງານ-ເຈົ້າໜ້າທີ່ພາສີມີຄວາມເຂົ້າໃຈ, ເຊື່ອມຊຶມຕໍ່ແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ, ເຮັດໃຫ້ມີຄວາມອຸ່ນອ່ຽງທຸ່ນທ່ຽງ, ມີຄວາມເຊື່ອໝັ້ນຕໍ່ການຈັດຕັ້ງ, ມີຄວາມສາມັກຄີເປັນເອກະພາບ ແລະ

ມີລະບຽບວິໄນຢ່າງເຂັ້ມງວດ,ຕ້ານການສວຍໃຊ້ສິດໜ້າທີ່ເພື່ອຫາຜົນປະໂຫຍດສ່ວນຕົວ, ມີຄວາມໂປ່ງໃສຮອບດ້ານ; ປັບປຸງ ແລະສ້າງກົນໄກການຄຸ້ມຄອງ, ຕິດຕາມ, ກວດກາ-ກວດການຈັດຕັ້ງປະ ຕິບັດວຽກງານວິຊາສະເພາະຂອງບັນດາດ່ານ, ພະນັກງານວິຊາການພາຍໃນຄວາມຮັບຜິດຊອບຂອງກອງຄຸ້ມຄອງ ພາສີ II ປັບປຸງແບບແຜນວິທີເຮັດວຽກຢູ່ບັນດາດ່ານພາສີຊາຍແດນຄືນໃໝ່ໃຫ້ມີຄວາມລະອຽດ, ເພື່ອແນ່ໃສ່ການອຳນວຍຄວາມສະດວກໃຫ້ແກ່ຜູ້ປະກອບ ການ ແລະບໍລິການໃຫ້ມີຄວາມວ່ອງໄວ.

  ດ້ານການຈັດຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານ ແຫ່ງລັດໃນປີ 2019 ກອງຄຸ້ມຄອງພາ ສີ II ໄດ້ຮັບຕົວເລກແຜນການທັງໝົດ 45 ຕື້ກວ່າກີບ, ແຕ່ຜ່ານການຈັດຕັ້ງປະ ຕິບັດໃນ 4 ເດືອນປີ 2019 ຜ່ານມາ, ປະຕິບັດໄດ້17,457 ຕື້ກວ່າກີບ ລື່ນແຜນ 16,38% ຂອງແຜນການ 4 ເດືອນ ປີ 2019 ຖ້າທຽບໃສ່ແຜນການປີເທົ່າກັບ 38,79% ໃນນັ້ນ,ລາຍຮັບສ່ວນໃຫຍ່ໄດ້ມາຈາກການນຳເຂົ້າສິນຄ້າປະເພດເຄື່ອງອຸປະໂພກ-ບໍລິໂພກ, ເຄື່ອງກໍ່ສ້າງ, ເຄື່ອງໄຟຟ້າ, ນໍ້າມັນເຊື້ອໄຟ, ຄ່າຊັກພິເສດ, ຄ່າທຳນຽມ ແລະຄ່າປັບໃໝ-ຂາຍເຄື່ອງຮິບ, ສີ້ນສ່ວນອາໄຫຼ່, ພາຫະນະ ແລະອື່ນໆ.

  ນອກນັ້ນ, ຍັງໄດ້ຈາກການແກ້ໄຂພາຫະນະນຳເຂົ້າບໍ່ເສຍພາສີ 80 ຄະດີຍັງຄ້າງ 654 ຄັນ, ເຖິງຢ່າງໃດກໍ່ຕາມ,ໃນ 8 ເດືອນ ກອງຄຸ້ມຄອງພາສີ II ຈະສູ້ຊົນຂຸດຄົ້ນແຫຼ່ງລາຍຮັບທີ່ບົ່ມຊ້ອນ ທີ່ມີຂອງແຂວງ, ເອົາໃຈໃສ່ປັບປຸງກົນ ໄກວຽກງານຕ້ານ ແລະສະກັດກັ້ນການ ລັກລອບໜີພາສີຢູ່ແຕ່ລະດ່ານພາສີຊາຍ ແດນ, ກອງກວດກາພາສີທີ່ຂຶ້ນກັບກອງພາສີ II ໃຫ້ມີຄວາມເຂັ້ມແຂງ, ສ້າງກົນໄກການຄຸ້ມຄອງການນຳເຂົ້າພາຫະນະຢ້ຽມຢາມບໍ 53 ໃຫ້ເຂັ້ມງວດ, ປະ ສານສົມທົບກັບເຈົ້າໜ້າທີ່ຂະແໜງການກ່ຽວ ຂ້ອງເປັນຕົ້ນແມ່ນເຈົ້າໜ້າ ປກສ, ຍທຂ ເພື່ອນຳໃຊ້ມາດຕະການໃນການແກ້ໄຂພາຫະນະນຳເຂົ້າບໍ່ເສຍພາສີໂດຍສະ ເພາະແມ່ນພາຫະນະບໍ່ມີປ້າຍທີ່ຍັງນຳໃຊ້ຕາມຕົວເມືອງ, ພາຫະນະນຳໃຊ້ປ້າຍທະບຽນປອມ ແລະຄຸ້ມຄອງພາຫະນະເຂົ້າ-ອອກຕາມຊາຍແດນເພື່ອຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນການທີ່ວາງໄວ້.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์