ທ່ານ ສັນຕິ ພົນເມືອງລາວ ຫົວໜ້າ ສທຄ ຜູ້ໃໝ່

  ເພື່ອເປັນການປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ ແລະເຂັ້ມແຂງຕາມມະຕິ ແລະການແຕ່ງຕັ້ງຂອງຄະນະພັກ-ຄະນະຜູ້ວ່າການທະນາຄານ ແຫ່ງ ສປປ ລາວ (ທຫລ) ແລະໃນວັນທີ 15 ພຶດສະພາ 2019 ທີ່ ສະຖາບັນການທະນາຄານ (ສທຄ) ໄດ້ຈັດຕັ້ງໃຫ້ມີພິທີມອບ-ຮັບໜ້າທີ່ຫົວໜ້າ ສທຄ ລະຫວ່າງທ່ານ ນາງ ດວງດີ ພິມ ວົງສາ ຄະນະພັກ ທຫລ, ເລຂາ ຄະນະພັກຮາກຖານ, ຫົວໜ້າ ສທຄ ຜູ້ເກົ່າທີ່ ອອກພັກຜ່ອນບໍານານກັບ ທ່ານ ສັນຕິ ພົນເມືອງລາວຫົວໜ້າ ສທຄ ຜູ້ໃໝ່ໂດຍການເຂົ້າຮ່ວມເປັນສັກຂີພິຍານຂອງບັນດາຜູ້ຕາງໜ້າຈາກກົມກ່ຽວຂ້ອງຂອງ ທຫລ ແລະພະນັກງານ ສທຄ ຈໍານວນໜຶ່ງ.

 ໃນໄລຍະທີ່ທ່ານ ນາງ ດວງດີ ພິມວົງສາ ເປັນຫົວໜ້າ ສທຄ; ທ່ານຮ່ວມກັບຄະນະໄດ້ອຸທິດສະຕິປັນຍາ,ເຫື່ອແຮງອັນຫຼວງຫຼາຍເຂົ້າໃນການພັດທະນາຊັບພະ ຍາກອນມະນຸດທີ່ມີຄຸນນະພາບໃຫ້ແກ່ປະເທດຊາດໂດຍສະເພາະໃນຂົງເຂດທະນາຄານ, ສະຖາບັນການເງິນຈຸລະພາກ, ຕະຫຼາດທຶນ ແລະຂະແໜງການ-ທ້ອງ ຖິ່ນເປັນຈໍານວນບໍ່ໜ້ອຍ; ສໍາລັບ ໃນປີ 2018 ນີ້, ກໍ່ສາມາດຍາດໄດ້ຜົນງານເດັ່ນຫຼາຍດ້ານໃນນີ້ດ້ານວິຊາສະເພາະວິຊາການກໍ່ໄດ້ຄົ້ນຄວ້າ ແລະພັດທະນາຫຼັ ກສູດສື່ການຮຽນ-ການສອນ,ສໍາເລັດສ້າງຄຳແນະນຳວິທີການຂຽນບົດໂຄງການຈົບຊັ້ນ; ໄດ້ຮັບອະນຸມັດນໍາໃຊ້ຫຼັກສູດອະນຸປະລິນຍາ 4 ສາຂາ ແລະ ປະລິນຍາຕີ ສາຂາການເງິນຈຸລະພາກ; ສໍາເລັດປັບປຸງລາຍວິຊາໃນຫຼັກສູດປະລິນຍາຕີ ແລະຫຼັກສູດຕໍ່ເນື່ອງຈໍານວນ 7 ຫຼັກສູດ; ສຳເລັດປັບປຸງປຶ້ມຕໍາລາຈຳນວນ 9 ວິຊາ; ສ້າງຂໍ້ສອບເສັງປະກອບເຂົ້າຄັງຂໍ້ສອບທີ່ຈະນໍາໃຊ້ໃນພາກຮຽນ I ສົກ 2018-2019 ສໍາເລັດ 25 ວິຊາໃນ 69 ວິຊາ.

  ດ້ານການຮຽນ-ການສອນໄດ້ຈັດສໍາມະນາວິຊາການໃຫ້ຄູ-ອາຈານ ແລະ ນັກສຶກສາ 6 ຄັ້ງ ແລະນໍາພານັກສຶກສາໄປທັດສະນະສຶກສາ 2 ຄັ້ງ; ມອບທຶນການສຶກສາໃຫ້ນັກສຶກສາຮຽນດີ-ຮຽນ ເດັ່ນຈໍານວນ 18  ຄົນ; ນັກສຶກສາຝຶກງານ ຢູ່ທະນາຄານຈໍາລອງ ສທຄ ຈໍານວນ 356 ຄົນ ແລະຢູ່ພາຍນອກ 60 ຄົນ; ສໍາເລັດຈັດການຮຽນ-ການສອນວິຊາປ້ອງກັນຊາດໃຫ້ແກ່ນັກສຶກສາ 712 ຄົນ; ນັກສຶກສາທີ່ຈົບການສຶກສາສົກ 2017- 2018 ຈໍານວນ 430 ຄົນ.

  ທາງດ້ານ ທ່ານ ສັນຕິ ພົນເມືອງ ລາວຫົວໜ້າ ສທຄ ຜູ້ໃໝ່ແມ່ນໄດ້ເຄື່ອນໄຫວ ແລະເຕີບໃຫຍ່ຢູ່ໃນຂະແໜງການ ທະນາຄານມາເປັນເວລາຫຼາຍປີຊຶ່ງໃນ ລະຫວ່າງປີ 2005 ເປັນຮອງຫົວໜ້າ ສທຄ, ແຕ່ຍ້ອນຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະຂັ້ນເທິງໄດ້ມອບໝາຍໃຫ້ປະຕິບັດໜ້າທີ່ເປັນຮອງຫົວໜ້າກົມພົວພັນສາກົນ ທຫລ (ກົມຮ່ວມມືໃນປະຈຸບັນ), ເປັນຜູ້ ອໍານວຍການກອງທຶນປົກປ້ອງຜູ້ຝາກເງິນ (ສໍານັກງານປົກປ້ອງເງິນຝາກ) ແລະເປັນຫົວໜ້າໂຮງພິມທະນະບັດຕາມລໍາດັບ.

  ຂ່າວຍັງແຈ້ງໃຫ້ຮູ້ອີກວ່າ: ໃນທ້າຍອາທິດ (9 ພຶດສະພາ) ຜ່ານມາ; ກໍ່ໄດ້ຈັດໃຫ້ມີການມອບ-ຮັບໜ້າທີ່ຫົວໜ້າສູນເກັບຊື້ໜີ້ ແລະ ຮັບຝາກໜີ້ລະຫວ່າງ ທ່ານ ບົວລຽນ ພົມມະວົງສາ ຫົວໜ້າສູນເກັບຊື້ໜີ້ ແລະຮັບຝາກໜີ້ຜູ້ເກົ່າທີ່ ຮັບພັກຜ່ອນບໍານານກັບ ທ່ານ ນາງ ທິບພະວັນ ຈັນທະຜາສຸກວ່າການຫົວໜ້າ ສູນເກັບຊື້ໜີ້ ແລະຮັບຝາກໜີ້ຜູ້ໃໝ່ທັງນີ້ກໍ່ເພື່ອປະຕິບັດຕາມຂໍ້ຕົກລົງຂອງຜູ້ວ່າການ ທຫລ ວ່າດ້ວຍການຍົກຍ້າຍ ແລະແຕ່ງຕັ້ງໃຫ້ຖືກຕ້ອງຕາມລະບຽບ ຫຼັກການຂອງພັກ ແລະລັດຖະບານໄດ້ກໍານົດໄວ້ແນໃສ່ປັບປຸງກົງຈັກການຈັດຕັ້ງໃຫ້ມີຄວາມໜັກແໜ້ນ ແລະເຂັ້ມແຂງ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์