ປະຊຸມລະດັບຊາດ ພັດທະນາຊົນນະບົດແບບມີສ່ວນຮ່ວມ

 ໃນລະຫວ່າງວັນທີ 15-17 ພຶດສະພາ 2019 ທີ່ນະຄອນຫຼວງວຽງຈັນ ກະຊວງກະສິກໍາ ແລະປ່າໄມ້, ອົງການກອຍກາ (KOICA) ແລະສະຖາບັນພັດທະນາຊົນນະບົດ ສ. ເກົາຫຼີ (KIRD) ໄດ້ຈັດກອງປະຊຸມສໍາມະນາລະດັບຊາດກ່ຽວກັບການພັດທະນາຊົນນະບົດແບບມີສ່ວນຮ່ວມຢູ່ ສປປ ລາວ ໂດຍໃຫ້ ກຽດເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ລຽນ ລັດຖະມົນຕີກະຊວງກະສິກໍາ ແລະປ່ານໄມ້, ທ່ານ ນາງ ລີ ທີຢຸນ

 ປະທານກອຍກາແຫ່ງ ສ.ເກົາຫຼີ, ທ່ານ ສ.ເກົາຫຼີ ປະຈໍາລາວ, ມີບັນດາລັດຖະມົນຕີ, ຮອງລົດຖະມົນຕີ,ຮອງເຈົ້າແຂວງ,ຮອງເຈົ້າຄອງນະຄອນຫຼວງວຽງຈັນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ກອງປະຊຸມສໍາມະນາຄັ້ງນີ້, ເພື່ອປະເມີນຜົນການຈັດຕັ້ງປະຕິບັດໂຄງການແຊມວນອຸນດົງໃນແຂວງວຽງຈັນ ແລະແຂວງສະຫວັນນະເຂດເພື່ອຄົ້ນຄວ້າຫາທິດທາງ-ແຜນການໂຄງການໃນຕໍ່ໜ້າ, ພ້ອມທັງແຈ້ງບົດຮຽນທີ່ຖອດຖອນໄດ້ຈາກການປະຕິບັດໂຄງການໃນ 2 ແຂວງດັ່ງກ່າວ ເພື່ອວາງແນວທາງການເສີມຂະຫຍາຍບົດຮຽນ ແລະປະສົບການໄປຍັງແຂວງອື່ນໆອີກ, ພ້ອມທັງຄົ້ນຄວ້າແຜນຍຸດທະສາດໃໝ່ສໍາລັບການພັດທະນາຊົນນະບົດ ແລະຫຼຸດຜ່ອນຄວາມທຸກຍາກໃນລາວ.

 ນອກນັ້ນໃນກອງປະຊຸມດັ່ງກ່າວຍັງໄດ້ເຊັນບົດບັນທຶກຄວາມເຂົ້າໃຈໂຄງການພັດທະນາຊົນນະບົດແບບມີສວ່ນຮ່ວມຢູ່ ສປປ ລາວ ໃຫ້ກຽດລົງນາມໂດຍທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະປ່າໄມ້ ແລະທ່ານ ນາງ ລີ ທີຢຸນ ປະທານກອຍກາແຫ່ງ ສ.ເກົາຫຼີ, ມີບັນດາຮອງນາຍົກລັດຖະມົນຕີ, ລັດຖະ ມົນຕີ,ຮອງລົດຖະມົນຕີ,ຮອງເຈົ້າແຂວງ,ຮອງເຈົ້າຄອງນະຄອນຫຼວງວຽງຈັນເຂົ້າຮ່ວມເປັນສັກຂີພິຍານໂຄງການແຊມວນອຸນດົງໄດ້ລິເລີ່ມປະຕິບັດໃນປະເທ ດເກົາຫຼີ ຕັ້ງແຕ່ປີ 1971 ເພື່ອຕໍ່ສູ່ກັບຄວາມທຸກຍາກ ແລະ ສົ່ງເສີມການພັດທະນາຊົນນະບົດທີ່ມີລັກສະນະສະເພາະ ແລະໂຄງການດັ່ງກ່າວໄດ້ຮັບການຈັດ ຕັ້ງປະຕິບັດໃນລາວເລີ່ມແຕ່ປີ 2014 ພາຍໃຕ້ການຕົກລົງ ເຫັນດີລະຫວ່າງລັດຖະບານລາວ ແລະ ລັດຖະບານ ສ ເກົາຫຼີ.

  ໂຄງການດັ່ງກ່າວໄດ້ຮັບການຈັດຕັ້ງປະຕິບັດສໍາເລັດໃນແຂວງວຽງຈັນ ແລະແຂວງສະຫວັນນະເຂດ (ລວມມີ 6 ເມືອງ ແລະ 30 ບ້ານ) ແລະຜ່ານມາ ໄດ້ຮັບການຕີລາຄາຈາກການນໍາຂັ້ນສູງວ່າເປັນໂຄງການທີ່ໄດ້ປະກອບສ່ວນເຂົ້າໃນວຽກງານຫຼຸດຜ່ອນຄວາມທຸກຍາກ ແລະພັດທະນາຊົນນະບົດແບບຍືນຍົງ.

 ໂຄງການພັດທະນາຊົນຊະບົບແບບມີສ່ວນຮ່ວມນີ້ໄດ້ເນັ້ນໃສ່ສົ່ງເສີມຄວາມເປັນເຈົ້າການຂອງຊາວກະສິກອນ, ສ້າງໃຫ້ຄົນຊົນນະບົດເປັນເຈົ້າຊົນນະບົດຕາມ ທິດເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ, ມັນໄດ້ສ້າງຄວາມຮັບຮູ້ໃໝ່ໃຫ້ພະນັກງານຂອງອົງການຈັດຕັ້ງຂອງເມືອງ, ບ້ານ, ແນວໂຮມ, ອົງການຈັດຕັ້ງມະຫາຊົນຂັ້ນຮາກຖານ ກໍຄືຊຸມຊົນກ່ຽວກັບການພັດທະນາຊົນ ນະບົດແບບໃໝ່ໄດ້ຮັບການປຸກລະດົມ ຄວາມຕື່ນຕົວເປັນເຈົ້າສະໝັກໃຈເຂົ້າຮ່ວມແກ້ໄຂບັນຫາຂອງຕົນເອງໂດຍອີງໃສ່ຊັບພະຍາກອນທີ່ມີ, ແຮງງານ ແລະ ປັດໄຈອື່ນໆຂອງຄອບຄົວ, ບໍ່ເອື້ອຍອີງລໍຖ້າຊ່ວຍເຫຼືອຈາກພາຍນອກ ແລະຂັ້ນເທິງເປັນຕົ້ນຕໍ.

  ນອກນັ້ນເພື່ອເປັນການແຜນການຊຸກຍູ້ການພັດທະນາແບບແຊມວນອຸນດົງໃນແຂວງວຽງຈັນ ແລະແຂວງສະຫວັນນະເຂດ ແລະເພື່ອສືບຕໍ່ໂຄງການຫຼັງ ຈາກໂຄງການຕົວແບບໄດ້ສິ້ນສຸດລົງ, ພ້ອມກັນນັ້ນຍັງມີເປົ້າໝາຍຜັນຂະຫຍາຍປະສົບການຮ່ວມກັບແຊມວນອຸນດົງເພີ່ມອີກ 3 ແຂວງຄື: ຄໍາມ່ວນ, ບໍລິຄໍາໄຊ ແລະແຂວງໄຊຍະບູລີ. ເພື່ອໃຫ້ສອດຄ່ອງກັບການສະເໜີຂອງລັດຖະບານ, ອົງການກອຍກາອະນຸມັດການຊ່ວຍເຫຼືອເພີ່ມເຕີມເພື່ອເສີມຂະຫຍາຍບົດ ຮຽນທີ່ຖອດຖອນໄດ້ຈາກຫຼັກການພັດທະນາແບບແຊມວນອຸນດົງອອກໄປອີກ 3  ແຂວງໃນເຂດພາກໃຕ້ຄື: ແຂວງຈໍາປາສັກ, ເຊກອງ ແລະສາລະວັນ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์