ທ່ານ ດຸສິດ ພົມມະຈັນ ຜູ້ອໍານວຍການເຂື່ອນໄຟຟ້ານໍ້າເທີນ 2 ໄດ້ລາຍງານຕໍ່ກອງປະຊຸມກ່ຽວກັບການຢຸດການປ່ອຍນໍ້າ ຊຶ່ງບໍລິສັດໄຟຟ້ານໍ້າເທີນ 2 ໄດ້ຢຸດການຜະລິດກະແສໄຟຟ້າ ແລະ ຢຸດການປ່ອຍນໍ້າຊົ່ວຄາວ ເພື່ອບໍ່ໃຫ້ມີການປ່ອຍນໍ້າລົງສູ່ແມ່ນໍ້າເຊບັ້ງໄຟ ເພື່ອຮັບປະກັນຄວາມປອດໄພຂອງປະຊາຊົນ ແລະ ຫຼຸດຜ່ອນຜົນກະທົບຕໍ່ຊຸມຊົນລຸ່ມເຂື່ອນ ເນື່ອງຈາກລະດັບນໍ້າ ແມ່ນໍ້າເຊບັ້ງໄຟເພີ່ມລະດັບສູງຂຶ້ນສູງຈາກນໍ້າທໍາມະຊາດ (ຝົນຕົກຕິດຕໍ່ກັນຫຼາຍວັນ ເຮັດໃຫ້ລະດັບນໍ້າສູງຂຶ້ນຮອດເຂດເຕືອນໄພ ເກືອບເຂົ້າສູ່ລະດັບນໍ້າຖ້ວມ) ຊຶ່ງການຢຸດປ່ອຍນໍ້າໃນຄັ້ງນີ້ແມ່ນໄດ້ເລີ່ມປະຕິບັດແຕ່ເວລາ 0:00 ໂມງ ຂອງວັນທີ 7 ສິງຫາ ເປັນຕົ້ນມາ (ໂດຍອີງຕາມສັນຍາສໍາປະທານຂອງບໍລິສັດ ກໍຄືຖ້າຫາກລະດັບນໍ້າຂຶ້ນຮອດຈຸດກຳນົດ ຫຼື ຈຸດເຕືອນໄພ ແລ້ວບໍລິສັດຈະໄດ້ຢຸດເຊົາການຜະລິດຊົ່ວຄາວ) ແລະ ຈະປະຕິບັດຕໍ່ໄປຈົນກວ່າລະດັບນໍ້າຈະຫຼຸດລົງຮອດລະດັບທີ່ສະມາດດໍາເນີນການຜະລິດໄດ້.

 

ທ່ານ ດຸສິດ ພົມມະຈັນ ຍັງໄດ້ຍົກໃຫ້ເຫັນເຖິງສະພາບການດຳເນີນກິດຈະການຂອງບໍລິສັດ, ຄວາມອາດສາມາດຂອງການກັກເກັບປະລິມານນໍ້າໃນອ່າງເກັບນໍ້າໜ້າເຂື່ອນ ລວມເຖິງການບໍລິຫານຈັດການນໍ້າ ແລະ ມາດຕະຖານຄວາມປອດໄພຂອງບໍລິສັດໃຫ້ຮັບຊາບຕື່ມ.

ຂ່າວ: ກອງຄໍາ