ນໍ້າຕົກຕາດທອງ ອີກສະຖານທີ່ສວຍສົດງົດງາມທາງທໍາມະຊາດ

ລະດູແລ້ງເປັນລະດູການທີ່ ເໝາະແກ່ການໄປທ່ອງທ່ຽວມື້ນີ້ພວກເຮົາຈະມາແນະນໍາບາງສະຖານທີ່ທ່ອງທ່ຽວພາຍໃນປະເທດທີ່ເໝາະແກ່ການໄປສໍາຜັດໃນໄລຍະລະດູນີ້ເພາະຫຼາຍຄົນກໍ່ອາດບໍ່ເຄີຍໄປສໍາຜັດຫຼືບໍ່ເຄີຍຮູ້ວ່າສະຖານທີ່ທ່ອງທ່ຽວໃນລາວກໍ່ມີດີຫຼາຍແຫ່ງ ແລະອາກາດກໍ່ດີອີກດ້ວຍເນື່ອງຈາກຕົ້ນໄມ້ຊີວະນານາພັນກໍາລັງຂຽວສະອຸ່ນທໍາມະຊາດກໍາລັງງົດງາມຄ່ອຍໃຫ້ທ່ານໄປທ່ຽວຊົມ.

ນໍ້າຕົກຕາດທອງກາຍເປັນສະຖານທີ່ທ່ອງທ່ຽວໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນແລະຕ່າງປະເທດເປັນຈໍານວນບໍ່ໜ້ອຍເນື່ອງຈາກມີຄວາມສວຍສົດ ງົດງາມທາງດ້ານທິວທັດທໍາມະຊາດປ່າໄມ້ອັນດົກໜາຂຽວງາມອຸ່ມທຸ່ມບວກກັບສາຍນ້ຳທີ່ທະຍອຍກັນຢັງຢາຍລົງມາຈາກຕີນພູສູງຄ່ອຍໆ  ໄຫຼລີນລົງມາຕາມຮ່ອງຫ້ວຍລົງ ຕາມຮ່ອງຫີນເປັນຊັ້ນໆບັນດານັກທ່ອງທ່ຽວສາມາດອາບນ້ຳໄດ້ຢ່າງສະບາຍຢູ່ກ້ອງນ້ຳຕົກ,ເປັນນ້ຳທີ່ໄຫຼ ຜ່ານຮາກໄມ້ທຳມະຊາດ, ໄຫຼຜ່ານຕົ້ນໄມ້ແບບສົດໆຄືຈັ່ງຊີ້, ນັກທ່ອງ ທ່ຽວບາງກຸ່ມພະຍາຍາມຍ່າງຂຶ້ນ ໄປຕາມເນີນພູເພື່ອໄປເບິ່ງຈຸດທີ່ນ້ຳ ໄຫຼອອກມາຈາກຜາຫີນ, ເພາະສາຍນ້ຳດັ່ງກ່າວແມ່ນໄຫຼໂຮມເອົານ້ຳຫຼາຍຕໍ່ຫຼາຍບ່ອນມາຈວບກັນຢູ່ບ່ອນ ດຽວເປັນນ້ຳທີ່ໄຫຼມາຈາກແຕ່ລະ ຮ່ອມພູ ແລະຜາຫີນມາລົງໃສ່ບ່ອນພະລານຫີນໃຫຍ່ທາງເບື້ອງເທິງ ເຮັດໃຫ້ສັດປ່ານາໆຊະນິດທີ່ອາໄສ ໃນເຂດນັ້ນອອກມາກິນນ້ຳ, ອັນຫຼາຍກວ່າໝູ່ແມ່ນນົກ ແລະແມງກະເບື້ອນາໆຊະນິດມີຫຼາກຫຼາຍສີນັບວ່າ ເປັນແມງໄມ້ທີ່ປະດັບເອ້ຢ້ອງໃນຕາດແຫ່ງນີ້ໃນເມື່ອມັນພົບຜູ້ຄົນທີ່ຂຶ້ນໄປມັນກໍ່ຈະແຕກຕື່ນເປັນບາງ ຄັ້ງຄາວ, ແຕ່ໂດຍລວມແລ້ວມັນຈະ ຄຸ້ນໃຫ້ຄົນເຮົາໄດ້ໃກ້ກັບມັນຫຼາຍຂຶ້ນເພາະໃນສະຖານທີ່ແຫ່ງນີ້ເປັນ ເຂດອານຸຮັກມັນບໍ່ເຄີຍຖືກທຳຮ້າຍ.ສະນັ້ນ,ຈິ່ງບໍ່ເປັນອຸປະສັກໃດເລີຍ ໃນຍາມພໍ້ຄົນຜ່ານໄປມາ, ສຽງນ້ຳປະສານກັບສຽງນົກແລະແມງໄມ້ ຮ້ອງສະໜັ່ນຫວັ່ນໄຫວປາກົດວ່າ ເວົ້າກັນຈົນຊິບໍ່ໄດ້ຍິນພຸ້ນລະ.

ສໍາລັບນັກທ່ອງທ່ຽວທີ່ຈະເດີນທາງໄປທ່ຽວຊົມສະຖານທີ່ແຫ່ງນີ້ ບໍ່ຕ້ອງເປັນຫ່ວງວ່າການເດີນທາງເຂົ້າໄປຈະມີຄວາມຫຍຸ້ງຍາກປະຈຸບັນທາງເມືອງໄດ ້ພັດທະນາພື້ນຖານໂຄງລ່າງໃຫ້ເຂົ້າໄປເຖິງສະຖານທີ່ ທ່ອງທ່ຽວເພື່ອອໍານວຍຄວາມສະ ດວກໃຫ້ກັບຜູ້ມາຊົມ, ນໍ້າຕົກຕາດ ທອງຕັ້ງຢູ່ເມືອງພູຄູນແຂວງຫຼວງ ພະບາງ.

ໂດຍ: ວົງມະນີ

แชร์