ສະຫາຍ ໄຊຊະນະ ໂຄດພູທອນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງຄຳມ່ວນ ໄດ້ລາຍງານກອງປະຊຸມເປີດກວ້າງຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 4 ສະໄໝທີ XI ໃນວັນທີ 22 ກໍລະກົດ 2026 ນີ້ວ່າ: ສ່ວນດ້ານການເງິນ ສາມາດເກັບລາຍຮັບເຂົ້າງົບປະມານໄດ້ 3.324,30 ຕື້ກີບ ເທົ່າກັບ 68,59% ຂອງແຜນປີ ໃນນັ້ນ, ລາຍຮັບສູນກາງບັນລຸ 81,43% ແລະ ລາຍຮັບທ້ອງຖິ່ນບັນລຸ 60,22%. ສ່ວນດ້ານລາຍຈ່າຍງົບປະມານປະຕິບັດໄດ້ 583,39 ຕື້ກີບ ຫລື 30,79% ຂອງແຜນ.

 

ໃນກອງປະຊຸມໄດ້ຕີລາຄາຜົນການນຳພາ-ຊີ້ນຳຮອບດ້ານໃນໄລຍະ 6 ເດືອນຕົ້ນປີ 2026 ແລະ ຄົ້ນຄວ້າທິດທາງວຽກງານ 6 ເດືອນທ້າຍປີ ໂດຍເນັ້ນການລາຍງານ 4 ບັນຫາສໍາຄັນ ປະກອບມີ: ການປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ, ວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານທົ່ວແຂວງ, ການຊຸກຍູ້ການສົ່ງເສີມຜະລິດເປັນສິນຄ້າ ແລະ ການກຽມພ້ອມຮັບມືໄພພິບັດໃນລະດູຝົນ. ພ້ອມນີ້, ຍັງໄດ້ຕີລາຄາ ການຜະລິດກະສິກຳໄດ້ຂະຫຍາຍເປັນສິນຄ້າຫລາຍຂຶ້ນ, ການລົງທຶນຂອງລັດ ແລະ ເອກະຊົນດຳເນີນໄປຕາມກົດໝາຍ, ໂຄງການພັດທະນາໂຄງສ້າງພື້ນຖານມີຄວາມຄືບໜ້າ, ດ້ານການສຶກສາ, ສາທາລະນະສຸກ ແລະ ວັດທະນະທຳ ຍັງສືບຕໍ່ໄດ້ຮັບການຍົກລະດັບ ແນໃສ່ການພັດທະນາຢ່າງຍືນຍົງ.

ໂອກາດນີ້, ສະຫາຍ ໄຊຊະນະ ໂຄດພູທອນ ຍັງໄດ້ເນັ້ນວ່າ ບັນດາຫົວຂໍ້ທີ່ນຳມາຄົ້ນຄວ້າໃນກອງປະຊຸມຄັ້ງນີ້ ລ້ວນແຕ່ເປັນວຽກງານສຳຄັນທີ່ກ່ຽວພັນກັບການນຳພາ-ຊີ້ນຳຂອງຄະນະບໍລິຫານງານພັກແຂວງ ແລະ ຮຽກຮ້ອງໃຫ້ຜູ້ເຂົ້າຮ່ວມຮ່ວມກັນວິເຄາະຜົນສຳເລັດ, ຊີ້ແຈງຂໍ້ຄົງຄ້າງ ແລະ ສະເໜີມາດຕະການແກ້ໄຂຢ່າງກົງໄປກົງມາ ເພື່ອໃຫ້ການດຳເນີນວຽກງານໃນໄລຍະຕໍ່ໜ້າບັນລຸຕາມເປົ້າໝາຍ.

ຂ່າວ : ມະນີວັນ