ທູດຈີນ ມອບອຸປະກອນຮັບໃຊ້ໃຫ້ຫໍສະໝຸດແຫ່ງຊາດ

   ໃນວັນທີ 13 ພຶດສະພາ ຜ່ານມາ, ທີ່ຫໍສະໝຸດແຫ່ງຊາດລາວໄດ້ມີພິທີມອບ-ຮັບເຄື່ອງຊ່ວຍເຫຼືອ, ຊຶ່ງເປັນອຸປະກອນຮັບໃຊ້ໃນຫໍສະໝຸດຈາກສະຖານທູດຈີນ ປະຈຳລາວ, ເຄື່ອງດັ່ງກ່າວລວມມີມູນຄ່າ 195 ລ້ານກີບ, ຕາງໜ້າສະຖານທູດ ສປ ຈີນ ມອບໂດຍທ່ານນາງ ຕິ່ງຊິ່ງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ ແລະຕາງໜ້າຮັບຝ່າຍລາວແມ່ນ ທ່ານ ບົວໄຂ ເພງພະຈັນ ຫົວໜ້າກົມພິມຈໍາໜ່າຍກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ ແລະທ່ານນາງ ຂັນທະມາລີ ຍັງນຸວົງ ຜູ້ອໍານວຍການຫໍສະໝຸດແຫ່ງຊາດລາວໂດຍມີພະນັກງານຂອງສອງຝ່າຍຮ່ວມເປັນສັກຂີພິຍານ.

  ທ່ານ ນາງ ຕິ່ງຊິ່ງ ກ່າວວ່າ: 2019 ແມ່ນປີທ່ອງທ່ຽວລາວ-ຈີນ ແລະກໍແມ່ນການສ້າງຄູ່ຮ່ວມມືຍຸດທະສາດລາວ-ຈີນ ຄົບຮອບ 10 ປີ, ຊຶ່ງກ່ອນໜ້ານີ້, ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະທານປະເທດແຫ່ງ ສປປ ລາວ ໄດ້ສໍາເລັດການຢ້ຽມຢາມລັດຖະກິດ ແລະ ເຂົ້າ ຮ່ວມກອງປະຊຸມເວທີປຶກສາຫາລືການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2 ທີ່ ສປ ຈີນ, ໃນໄລຍະດັ່ງກ່າວຜູ້ນໍາສູງສຸດ ພັກ-ລັດ ທັງສອງປະ ເທດໄດ້ຮ່ວມລົງນາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ຊຶ່ງຝ່າຍຈີນຫວັງຢ່າງຍິ່ງວ່າຈະຮ່ວມມືກັບຝ່າຍລາວ ແລະເພື່ອປະຕິບັດຕາມຄວາມເຫັນທີເປັນເອກະພາບຂອງຜູ້ນໍາສອງປະເທດ, ພ້ອມທັງສຸມໃສ່ການຊຸກຍູ້ຄວາມເຂົ້າອົກເຂົ້າໃຈຂອງປະຊາຊົນ, ຈັດງານປີທ່ອງທ່ຽວລາວ-ຈີນໃຫ້ມີຜົນສໍາເລັດ, ຊຸກຍູ້ການຮຽນຮູ້ ແລະ ແລກປ່ຽນທາງດ້ານວັດທະນະທໍາສັງຄົມ, ສ້າງພື້ນຖານວັດທະນະທໍາ-ສັງຄົມ ໃນການພັດທະນາສາຍພົວພັນສອງປະເທດໃຫ້ແໜ້ນແຟ້ນ. ສະນັ້ນ, ຫວັງຢ່າງຍິ່ງວ່າອຸປະກອນທີ່ມອບໃນຄັ້ງນີ້ລວມມີຄອມພິວເຕີ, ໂທລະພາບ, ເຄື່ອງປິ້ນ, ໜ້າຈໍ LED, ຫູຟັງ ແລະອື່ນໆມູນຄ່າ 195 ລ້ານກີບ ໃຫ້ກັບຫໍສະໝຸດແຫ່ງຊາດລາວຈະຊ່ວຍປຸບປຸງເງື່ອນໄຂຫ້ອງການ, ແລະຄວາມສະດວກສະບາຍໃນການບໍລິການທາງດ້ານການອ່ານ, ການຢືມໃຫ້ດີກວ່າເກົ່າໃຫ້ແກ່ມວນຊົນ.

  ທ່ານ ນາງ ຂັນທະມາລີ ຍັງນຸວົງ ກ່າວວ່າ: ເຄື່ອງຊ່ວຍເຫຼືອທີ່ທາງຝ່າຍຈີນມອບໃຫ້ປ່ຽບດັ່ງການມອບແສງສະຫວ່າງໃຫ້ຕອນຟ້າມືດ, ຊຶ່ງຈະຊ່ວຍແກ້ໄຂບັນ ຫາການຂາດບໍລິການການອ່ານແບບເອເລັກໂຕຣນິກ ແລະເຄື່ອງໃຫ້ຫ້ອງການທີ່ບໍ່ທັນສະໄໝ, ທາງຫໍສະໝຸດຈະຈັດແຈງການໃຊ້ງານຂອງອຸປະກອນເຫຼົ່ານີ້ ໃຫ້ມີຜົນປະໂຫຍດຕໍ່ການໃຊ້ງານຫຼາຍທີ່ສຸດ, ພ້ອມດຽວກັນນັ້ນກໍຫວັງວ່າໃນອະນາຄົດຈະມີການເພີ່ມທະວີການຮ່ວມມືກັບຝ່າຍຈີນຫຼາຍຂຶ້ນ, ພວກເຮົາຈະຮ່ວມ ກັນສົ່ງເສີມການຮ່ວມມື ແລະການແລກປ່ຽນລະຫວ່າງຊຸມຊົນຫໍສະຫມຸດຂອງສອງປະເທດ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ 

แชร์