ລາວຈະມີລະບົບເກັບກຳຂໍ້ມູນຟາມລ້ຽງສັດຜ່ານອອນລາຍ

ວັນທີ 13 ພືດສະພາ ທີ່ກະຊວງກະສິກຳ ແລະປ່າໄມ້ ໄດ້ມີພິທີເຊັນບົດບັນທຶກຄວາມເຂົ້າໃຈກ່ຽວກັບໂຄງການສ້າງລະບົບເກັບກັບຂໍ້ມູນຟາມລ້ຽງສັດໂດຍຜ່ານລະບົບອອນລາຍທາງມືຖືລະຫວ່າງກົມລ້ຽງສັດ ແລະການປະມົງກະຊວງກະສິກຳ ແລະ ປ່າໄມ້ກັບບໍລິສັດ ເທຟູດ ອິນເຕີເນເຊີແນວ ຈິເມມບີເຮັດ ເຢຍລະມັນ ຕາງໜ້າກະຊວງເຊັນໂດຍທ່ານ ສົມພັນ ຈັນເພັງໄຊ ຫົວໜ້າກົມລ້ຽງສັດ ແລະ ການປະມົງ ແລະຕາງໜ້າຝ່າຍເຢຍລະມັນເຊັນແມ່ນທ່ານ ດາວ ຮາ ຈຸງ ແຊແມນ ປະທານບໍລິສັດ ເທຟູດ ສາກົນ, ຊຶ່ງຮ່ວມເປັນສັກຂີພິຍານຂອງທ່ານ ບຸນຂວາງ ຄຳບຸນເຮືອງຮອງລັດຖະມົນຕີກະຊວງກະສິກຳ ແລະ ປ່າໄມ້, ພ້ອມດ້ວຍແຂກຖືກເຊີນເຂົ້າຮ່ວມ.

  ໃນຂໍ້ມູນໃຫ້ຮູ້ວ່າ: ຄວາມປອດໄພດ້ານອາຫານແມ່ນວຽກບູລິມະສິດໜຶ່ງຂອງລັດຖະບານໄດ້ສຸມໃສ່ ແລະສ້າງຫຼາຍໂຄງການເພື່ອແກ້ໄຂບັນຫານີ້ຢ່າງຕັ້ງໜ້າມາໂດຍຕະຫຼອດແຕ່ກໍຍັງບໍ່ທັນສາມາດຄວບຄຸມ ແລະຮັບປະກັນໄດ້ເທົ່າທີ່ຄວນໂດຍສະເພາະຟາມລ້ຽງສັດຂອງຜູ້ປະກອບການ, ພາກເອກະຊົນ ແລະ ຊາວ ກະສິກອນ (ເປັນຜູ້ຜະລິດອາຫານ) ຕ້ອງໄດ້ຮັບການພັດທະນາ ເພື່ອໃຫ້ເຂົ້າມາດຕະຖານສາກົນດ້ານຟາມລ້ຽງສັດທີ່ດີເພື່ອສາມາດກວດສອບຍ້ອນກັບຄືນທີ່ມາ ຂອງອາຫານໄດ້ ແລະວຽກດັ່ງກ່າວແມ່ນໜ້າທີ່ຂອງພາກລັດກໍຄືກົມລ້ຽງສັດ ແລະ ການປະມົງທີ່ມີໜ້າທີ່ຄຸ້ມຄອງ, ພັດທະນາ ແລະ ຊຸກຍູ້ສົ່ງເສີມໃຫ້ເຂົ້າລະບົບການລ້ຽງສັດແບບເປັນຟາມທີ່ດີ, ຊຶ່ງໃນສະພາບປະຈຸບັນບັນຫາກ່ຽວກັບການຂາດຂໍ້ມູນລາຍງານໃນຟາມສັດລ້ຽງເປັນຕົ້ນລາຍງານຊັກຊ້າ ແລະ ຂາດຄວາມເຊື່ອຖືເປັນບັນຫາທີ່ຕ້ອງໄດ້ແກ້ໄຂ.

 ດັ່ງນັ້ນ, ເພື່ອສາມາດຄຸ້ມຄອງ, ວາງແຜນພັດທະນາ ແລະຄວບຄຸມການລະບາດຂອງພະຍາດຢູ່ໃນຟາມລ້ຽງສັດ, ກົມລ້ຽງສັດ ແລະ ການປະມົງຈຶ່ງໄດ້ຮ່ວມ ກັບບໍລິສັດ TE-Food ສາກົນໃນໂຄງການ ຫຼືສ້າງກິດຈະກຳການເກັບກຳຂໍ້ມູນຟາມລ້ຽງສັດໂດຍຜ່ານລະບົບແອັບພິເຄຊັນໂທລະສັບມືຖື,ຊຶ່ງຈະເປັນການລາຍງານທີ່ແນ່ນອນ ແລະລາຍງານຈາກຟາມໂດຍກົງໄດ້ທຸກເວລາທີ່ຕ້ອງການ ແລະຂໍ້ມູນທີ່ໄດ້ຈາກລະບົບນີ້ມີຄວາມປອດໄພສູງທັງໃນດ້ານການປ້ອງກັນການລັກລອບຂໍ້ມູນ ແລະປ່ຽນແປງຂໍ້ມູນ,ສະນັ້ນຈຸດປະສົງກໍເພື່ອໃຫ້ມີຂໍ້ມູນສະຖິຕິຝູງສັດຈາກການລ້ຽງແບບເປັນຟາມມີຄວາມຖືກຕ້ອງວ່ອງໄວຊັດເຈນເພື່ອສະໜ ອງໃນການວາງແຜນພັດທະນາແນໃສ່ເຮັດໃຫ້ບັນລຸໄດ້ການຜະລິດຊີ້ນຮັບປະກັນດ້ານສະບຽງອາຫານ, ຜະລິດເປັນສິນຄ້າມີຄວາມປອດໄພ, ຊຶ່ງກິດຈະກຳ ຫຼື ໂຄງການດັ່ງກ່າວຈະມີໄລຍະເວລາ 5 ປີ ແລະປີທຳອິດຈະເລີ່ມທົດລອງກັບຟາມລ້ຽງໆໝູກ່ອນແລ້ວຈຶ່ງກ້າວໄປຟາມລ້ຽງສັດປະເພດອື່ນໆຢູ່ໃນທຸກແຂວງຂອງ ລາວ

  ບໍລິສັດ TE-Food ເປັນບໍລິສັດທີ່ໄດ້ຮັບການຍອມຮັບໃນລະດັບສາກົນໃນການພັດທະນາ ແລະກວດສອບກັບຄືນຍ້ອນຫຼັງຄວາມປອດໄພໃນອາຫານ ແລະ ບໍລິສັດໄດ້ມີກິດຈະກຳດັ່ງກ່າວນີ້ຢູ່ເກືອບທົ່ວໂລກລວມມີສະຫະລັດອາເມລິກາ, ສະຫະພາບເອີຣົບ ແລະໃກ້ກັບບ້ານເຮົາແມ່ນ ສສ ຫວຽດນາມ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์