ຄຶກຄັກນັກທ່ອງທ່ຽວຫຼັ່ງໄຫຼເຂົ້າຊົມສວນວັດທະນະທຳຊຽງຄວນ ປີນີ້ອາດທະລຸ 5 ແສນຄົມ

  ສວນວັດທະນະທຳຊຽງຄວນເປັນອີກສະຖານທີ່ທ່ອງທ່ຽວຢູ່ນະຄອນຫຼວງວຽງຈັນ ກຳລັງກາຍເປັນທີ່ສົນໃຈຂອງນັກທ່ອງທ່ຽວທັງພາຍໃນ ແລະຕ່າງປະເທດຊຶ່ງມີນັກທ່ອງທ່ຽວເຂົ້າມາທ່ຽວຊົມເພີ່ມຂຶ້ນຕໍ່ເນື່ອງສະເລ່ຍປະມານ 800 ຄົນຕໍ່ມື້ ປີນີ້ເປັນປີເປີດການທ່ອງທ່ຽວລາວ-ຈີນ ນັ້ນຈະເຮັດໃຫ້ນັກທ່ອງທ່ອງເຂົ້າມາສວນວັດທະນະທຳຊຽງຄວນເພີ່ມຂຶ້ນເນື່ອງຈາກວ່າຜ່ານໄປ 3-4 ເດືອນເຫັນວ່າມີນັກທ່ອງທ່ຽວເຂົ້າຢ່າງບໍ່ຂາດສາຍເປັນຕົ້ນນັກທ່ອງທ່ຽວຈາກ ສປ ຈີນ ແລະບັນດາປະເທດໃກ້ຄຽງຂະນະທີ່ຜູ້ສຳປະທານຄາດຄະເນໝົດປີນີ້ຈະມີນັກທ່ອງທ່ຽວເຂົ້າມາທ່ຽວຊົມສວນວັດທະນະທຳຊຽງຄວນເຖິງ 5 ແສນຄົນ.

 ທ່ານ ນາງ ສ້ອຍສຸດາ ອິນເມືອງໄຊ ປະທານບໍລິສັດສວນວັດທະນະທຳຊຽງຄວນຈຳກັດໃຫ້ສຳພາດວ່າ: ພາຍຫຼັງທີ່ຕົນໄດ້ເຂົ້າມາເປັນຜູ້ສຳປະທານສວນວັດທະ ນະທຳຊຽງຄວນກໍ່ໄດ້ມີສ່ວນຮ່ວມໃນການພັດທະນາສວນວັດທະນະທຳຊຽງຄວນໃຫ້ເປັນສະຖານທີ່ທ່ອງທ່ຽວອີກຈຸດໜຶ່ງຂອງນະຄອນຫຼວງວຽງຈັນ ໂດຍສະ ເພາະໄດ້ສ້າງສິ່ງອຳນວຍຄວາມສະດວກຕ່າງໆໃຫ້ນັກທ່ອງທ່ຽວເຂົ້າມານັບມື້ນັບຫຼາຍຂຶ້ນຈາກເກົ່າ, ສຳລັບປີທ່ອງທ່ຽວລາວ-ຈີນ ກໍເປັນອີກປີໜຶ່ງທີ່ມີຄວາມສຳຄັນໂດຍສະເພາະການດຶງ ດູດເອົານັກທ່ອງທ່ຽວຈາກຈີນທີ່ເຂົ້າມາທ່ຽວລາວໃຫ້ເຂົ້າມາທ່ຽວຊົມທີ່ສວນວັດທະນະທຳຊຽງຄວນນັບມື້ຫຼາຍຂຶ້ນ.

  ຊຶ່ງຜ່ານໄປ 3-4 ເດືອນມານີ້ສັງເກດເຫັນວ່ານັບທ່ອງທ່ຽວເຂົ້າມາເພີ່ມຂຶ້ນຢ່າງຕໍ່ເນື່ອງເມື່ອທຽບໃສ່ປີທ່ອງທ່ຽວລາວຜ່ານມາ, ໃນແຕ່ລະເດືອນແມ່ນມີນັກ ທ່ອງທ່ຽວເພີ່ມຂຶ້ນສະເລ່ຍນັກທ່ອງທ່ຽວເຂົ້າມາທ່ຽວຊົມ 800 ຄົນຕໍ່ມື້ ສ່ວນໃຫຍ່ແມ່ນນັກທ່ອງທ່ຽວຈີນ, ຮອງລົງມາແມ່ນເກົາຫຼີ, ຫວຽດນາມ, ໄທ ແລະ ຄົນລາວເຮົາ, ທີ່ມາແບບທົວ, ແບບຄອບຄົວແລະອື່ນໆ, ນັກທ່ອງທ່ຽວເຂົ້າມາຫຼາຍແມ່ນງານເທສະການ ແລະວັນສຳຄັນຕ່າງໆສຳລັບລາຄາເຂົ້າຊົມຄົນລາວ ແມ່ນ 10 ພັນກີບ, ຄົນຕ່າງປະເທດ 15 ພັນກີບ, ສຳລັບໃນປີ 2019 ຊຶ່ງເປັນປີທີ່ເປີດປີທ່ອງທ່ຽວລາວ-ຈີນຄາດວ່ານັກທ່ອງທ່ຽວຈະເຂົ້າມາທ່ຽວຊົມສວນວັດທະນະທຳຊຽງຄວນເຖິງ 5 ແສນຄົນ.

  ທ່ານ ນາງ ສ້ອຍສຸດາ ອິນເມືອງໄຊ ກ່າວຕື່ມວ່າ: ການພັດທະນາຂອງສວນວັດທະນະທຳຊຽງຄວນປະຈຸບັນແມ່ນໄດ້ສຳເລັດຫຼາຍໜ້າວຽກເປັນຕົ້ນທາງຍ່າງ ພາຍໃນສວນ, ການບໍລິການຫ້ອງນ້ຳ, ເວທີການສະແດງ, ສະຖານທີ່ຈອດລົດ, ກຳແພງອ້ອມສວນ ແລະອື່ນໆ, ສ່ວນທີ່ຈະເລັ່ງມືພັດທະນາຕໍ່ໄປແມ່ນປະຕູໂຂງຈະພັດທະນາໃຫ້ແລ້ວກ່ອນປີໃໝ່ລາວປີໜ້າຊຶ່ງໄດ້ລົງທຶນພັດທະນາໄປທັງໝົດແລ້ວ 20 ຕື້ກວ່າກີບ, ນອກນັ້ນຍັງພັດທະນາສວນແຄມຂອງຈະພັດທະນາເປັນຈຸດຊົມວິວ, ສວນອຸທະຍານດອກໄມ້ທີ່ມີຫຼາຍຊະນິດຊຶ່ງຄາດວ່າການພັດທະນາໃຫ້ສຳເລັດສົມບູນໄວສຸດ 3 ປີ ແລະຊ້າສຸດ 5 ປີຄາດມູນຄ່າການລົງທຶນ 5 ລ້ານໂດລາຫຼືປະມານ 40 ຕື້ກວ່າກີບ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์