ໂອກາດນີ້ ທ່ານ ບຸນທັນ ແສງທອງ ຮອງປະທານຄະນະກຳມະການປົກຄອງຕາແສງກະດັນ ໄດ້ຜ່ານບົດລາຍງານໂດຍສັງເຂບວ່າ: ພາຍຫຼັງທີ່ຕາແສງກະດັນ ໄດ້ຮັບການສ້າງຕັ້ງຂຶ້ນໃໝ່ຢ່າງເປັນທາງການ ຕາມມະຕິຕົກລົງຂອງຄະນະປະຈໍາພັກເມືອງໂຂງ ເມື່ອວັນທີ 27 ກຸມພາ 2026 ທີ່ຜ່ານມາ. ໂດຍຜ່ານການຈັດຕັ້ງປະຕິບັດວຽກງານຕົວຈິງໃນໄລຍະ 6 ເດືອນຕົ້ນປີ, ຄະນະກໍາມະການປົກຄອງຕາແສງກະດັນ ພາຍໃຕ້ການນໍາພາ-ຊີ້ນໍາຂອງອົງຄະນະພັກຮາກຖານ ຍາດໄດ້ຜົນງານອັນພົ້ນເດັ່ນໃນຫຼາຍດ້ານເປັນຕົ້ນ: ວຽກງານການເມືອງ-ແນວຄິດ ແລະ ການປັບປຸງກົນຈັກການຈັດຕັ້ງ ອົງຄະນະພັກຮາກຖານຕາແສງກະດັນ ໄດ້ເອົາໃຈໃສ່ຢ່າງຕັ້ງໜ້າໃນການໂຄສະນາສຶກສາອົບຮົມການ ເມືອງ-ແນວຄິດ ໃຫ້ແກ່ພະນັກງານ, ສະມາຊິກພັກ ແລະ ພໍ່ແມ່ປະຊາຊົນພາຍໃນ 23 ບ້ານ. ປັດຈຸບັນ, ທົ່ວຕາແສງມີຄະນະພັກຮາກຖານກວມເອົາ 37 ໜ່ວຍພັກ, ມີສະມາຊິກພັກທັງໝົດ 478 ສະຫາຍ. ສໍານັກງານຕາແສງກະດັນ (ຕັ້ງຢູ່ບ້ານໃຫຍ່ຂີ້ນາກ) ໄດ້ຮັບການປັບປຸງບູລະນະດ້ານອາຄານສະຖານທີ່ໄດ້ 80% ເພື່ອຮັບປະກັນຄວາມພ້ອມໃນການບໍລິການປະຊາຊົນ. ນອກຈາກນີ້, ຍັງໄດ້ຕ້ອນຮັບຄະນະຜູ້ແທນຈາກຄະນະຈັດຕັ້ງແຂວງຫົວພັນ ແລະ ແຂວງຈໍາປາສັກ ໃນການພົບປະແລກປ່ຽນບົດຮຽນວຽກງານການຈັດຕັ້ງ ແລະ ວຽກງານຕາແສງ. ວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ): ວຽກງານຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ຕາແສງໄດ້ສໍາເລັດການເປີດອົບຮົມການເມືອງ-ຫັດແອບການທະຫານໃຫ້ແກ່ກໍາລັງ ປກຊ-ປກສ ທັງໝົດ 23 ບ້ານ ໂດຍມີຜູ້ເຂົ້າຮ່ວມ 200 ກວ່າຄົນ, ເຮັດໃຫ້ກໍາລັງມີຄວາມເຂັ້ມແຂງ ພ້ອມທັງໄດ້ເຄື່ອນໄຫວຮ່ວມກັບ ກອງບັນຊາການ ປກສ ເມືອງ ໃນການກວດກາ, ທ້ອນໂຮມອາວຸດລ່າເນື້ອ ແລະ ສິ່ງຜິດກົດໝາຍຕ່າງໆ. ວຽກງານເສດຖະກິດ-ການເງິນ ແລະ ການຄຸ້ມຄອງຊຸມຊົນ: ໃນດ້ານການເງິນ, ຕາແສງກະດັນ ສາມາດຈັດເກັບລາຍຮັບເຂົ້າງົບປະມານປະຈໍາປີ 2026 ໄດ້ແລ້ວ 234.928.859 ກີບ, ເທົ່າກັບ 59.43% ຂອງແຜນການປີ. ວຽກງານວັດທະນະທໍາ-ສັງຄົມ ແລະ ສິ່ງແວດລ້ອມ: ຄະນະປົກຄອງຕາແສງ ໄດ້ເອົາໃຈໃສ່ຊີ້ນໍາການສຶກສາ ໂດຍໄດ້ເຂົ້າຮ່ວມຕິດຕາມ ແລະ ອໍານວຍຄວາມສະດວກໃນການສອບເສັງຈົບຊັ້ນ ມໍ 4 ແລະ ມໍ 7 ຢູ່ ມສ ຂີ້ນາກ ພ້ອມທັງອອກແຈ້ງການໃຫ້ປິດຮ້ານບັນເທິງຊົ່ວຄາວໃນຊ່ວງເວລາສອບເສັງ. ດ້ານສິ່ງແວດລ້ອມ, ໄດ້ຊີ້ນໍາໃຫ້ບ້ານຊົນລະວຽງ ແລະ ບ້ານພຽງດີ ຕິດປ້າຍຫ້າມຖິ້ມຂີ້ເຫຍື່ອຕາມແຄມທາງຫຼວງເລກທີ 13, ພ້ອມທັງນໍາພາຂະບວນການອະນາໄມ ແລະ ປູກຕົ້ນໄມ້ ຢູ່ອ້ອມຮອບສໍານັກງານຕາແສງຢ່າງເປັນຂະບວນຟົດຟື້ນ.

 

ທັງໝົດນັ້ນ ຄືໝາກຜົນທີ່ຕາແສງກະດັນ ຍາດມາໄດ້ໃນໄລຍະ 6 ເດືອນຕົ້ນປີ 2026. ສໍາລັບທິດທາງ 06 ເດືອນທ້າຍປີ, ຄະນະກໍາມະການປົກຄອງຕາແສງກະດັນ ຈະສືບຕໍ່ເພີ່ມທະວີຄວາມສາມັກຄີ, ປັບປຸງແບບແຜນວິທີເຮັດວຽກໃຫ້ມີວິທະຍາສາດ ແລະ ຫັນປ່ຽນຢ່າງຕັ້ງໜ້າ ເພື່ອຊຸກຍູ້ໃຫ້ 23 ບ້ານພາຍໃນຕາແສງ ໄດ້ຮັບການພັດທະນາຢ່າງຮອບດ້ານ ແລະ ໝັ້ນຄົງ ຕາມທິດທາງແຜນການທີ່ວາງໄວ້.

 

ຂ່າວ-ພາບ: ພຸດທະສິນ ວົງວິໄລທອງ