ໄຂ້ຍຸງລະບາດໜັກຢູ່ສະຫວັນພົບຜູ້ຕິດເຊື້ອ 400 ກໍລະນີ

  ຕາມການໃຫ້ສຳພາດຂອງທ່ານ ດຣ ສີສຸມາ ພຸດທະວົງສາ ຮອງຫົວໜ້າຂະແໜງຄວບຄຸມພະຍາດຕິດຕໍ່, ພະແນກສາທາລະນະສຸກແຂວງສະຫວັນນະເຂດ ໄດ້ໃຫ້ຮູ້ວ່າ: ໃນປີ 2019 ນີ້, ແຂວງສະຫວັນນະເຂດພວກເຮົາແມ່ນເກີດມີການລະບາດຂອງພະຍາດໄຂ້ຍຸງ ຫຼື ໄຂ້ເລືອດອອກຊຶ່ງເລີ່ມມາແຕ່ເດືອນມັງກອນເປັນຕົ້ນມາ ແລະລະບາດໜັກໃນຊ່ວງເດືອນມີນາຫາເດືອນເມສາ, ເຊິ່ງມາຮອດປະຈຸບັນນີ້, ພົບຜູ້ຕິດເຊື້ອພະຍາດດັ່ງກ່າວໃນທົ່ວເມືອງແລ້ວຈຳນວນ 417 ຄົນ, ເສຍຊີວິດ 3 ຄົນ ໃນນີ້ເມືອງທີ່ມີຄົນເຈັບຫຼາຍທີ່ສຸດແມ່ນເມືອງອາດສະພອນມີຈຳນວນຄົນເປັນພະຍາດໄຂ້ຍຸງທັງໝົດ 130 ຄົນ, ເສຍຊີວິດ 3 ຄົນ (ບ້ານນາເດື່ອ 1 ຄົນ, ບ້ານດົງທະດາ 2 ຄົນ) ແລະເມືອງທີ່ບໍ່ມີການແຜ່ລະບາດຂອງພະຍາດໄຂ້ຍູງລາຍແມ່ນເມືອງນອງ, ບ້ານທີ່ຖືກກະທົບລວມມີ 114 ບ້ານໃນທົ່ວແຂວງ.

  ຕໍ່ສະພາບການດັ່ງກ່າວ, ທາງຂະແໜງຄວບຄຸມພະຍາດຕິດຕໍ່ຂອງພວກເຮົາກໍ່ບໍ່ໄດ້ນິ້ງນອນໃຈໄດ້ລົງຕິດຕາມ ແລະ ຈັດຕັ້ງປະຕິບັດເຜີຍແຜ່ມາດຕະການ ປ້ອງກັນພະຍາດໄຂ້ຍຸງໃຫ້ແກ່ປະຊາຊົນໂດຍໄດ້ເນັ້ນໜັກໃຫ້ປະຊາຊົນໃນແຕ່ລະບ້ານປະຕິບັດ 5 ປ. ຄື: ປິດຝາພາຊະນະທີ່ໃຊ້ເກັບນໍ້າພາຍໃນເຮືອນຂອງຕົນ, ປ່ຽນນໍ້າ ແລະຜັດຖູພາຊະນະເຊັ່ນ: ເຕົ້າດອກໄມ້, ນໍ້າຮອງຕີນຕູ້ເຢັນ ແລະອື່ນໆ, ປ່ອຍປາຫານົກຍູງເພື່ອກິນໜອນນໍ້າ, ປັບປຸງບໍ່ໃຫ້ມີນໍ້າຂັງທໍາລາຍກະໂປະກະປ໋ອງ, ປະຕິບັດເປັນປະຈໍາທຸກໆອາທິດ. ພ້ອມນີ້, ດຣ ສີສຸມາ ພຸດທະວົງສາ ຍັງໄດ້ກ່າວຕື່ມອີກວ່າ: ເຊື້ອພະຍາດໄຂ້ຍຸງໃນປະຈຸບັນນີ້ແມ່ນມີຄວາມຮຸນແຮ ງຂຶ້ນກວ່າເມື່ອກ່ອນ ແລະມີຄວາມຄ້າຍຄືກັນກັບພະຍາດຖອກທ້ອງເພາະຈະມີອາການເຈັບທ້ອງ, ຖ່າຍທ້ອງ, ປວດຮາກ, ມີໄຂ້ສູງ, ມີຝື່ນແດງ, ເຫື່ອອອກ ດັ່ງນັ້ນຈຶ່ງໄດ້ຮຽກຮ້ອງມາຍັງພໍ່ແມ່ປະຊາຊົນຖ້າຫາກມີອາການຄ້າຍຄືທີ່ກ່າວມານີ້ແມ່ນບໍ່ໃຫ້ປິ່ນປົວ ຫຼື ກິນຢາຢູ່ເຮືອນຂອງຕົວເອງເພາະຖ້າກິນຢາຜິດອາດຈະສົ່ງຜົນໃຫ້ເຊື້ອພະຍາດໃນຮ່າງກາຍແຜ່ກະຈາຍໄດ້ໄວໂດຍໃຫ້ຮີບຟ້າວໄປພົບແພດ-ໝໍຢູ່ໂຮງໝໍ ຫຼື ສຸກສາລາທີ່ໃກ້ທີ່ສຸດຈະດີກວ່າ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

• 13/05/2019