ກອງປະຊຸມໃນຄັ້ງນີ້ ໄດ້ສຸມໃສ່ສະຫຼຸບຕີລາຄາຄືນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 6 ເດືອນຕົ້ນປີ, ວິເຄາະເຈາະຈີ້ມດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂ ເພື່ອເປັນບ່ອນອີງໃນການກໍານົດແຜນວຽກຈຸດສຸມ 6 ເດືອນທ້າຍປີ 2026 ໃຫ້ບັນລຸຕາມຄາດໝາຍທີ່ວາງໄວ້.

 

ໃນໂອກາດນີ້, ທ່ານ ວັນຄຳເກັ່ງ ຢ່າຊົງກົວ ກຳມະການພັກແຂວງ, ຫົວໜ້າຫ້ອງວ່າການແຂວງໄຊສົມບູນ ໄດ້ຂຶ້ນລາຍງານຜົນສຳເລັດທີ່ພົ້ນເດັ່ນໃນໄລຍະ 6 ເດືອນຕົ້ນປີ 2026 ເຫັນວ່າ: ຄະນະກຳມະການປົກຄອງແຂວງ ໄດ້ເອົາໃຈໃສ່ຊີ້ນຳ-ນຳພາຮອບດ້ານ ໂດຍສະເພາະແມ່ນການຈັດຕັ້ງປະຕິບັດດຳລັດ 414/ລບ ວ່າດ້ວຍການພັດທະນາແຂວງໄຊສົມບູນ, ການຜັນຂະຫຍາຍ 2 ວາລະແຫ່ງຊາດ, ວຽກງານ 3 ສ້າງ ແລະ ການຫັນກຳລັງລົງກໍ່ສ້າງຮາກຖານການເມືອງ ຕິດພັນກັບການລຶບລ້າງຄວາມທຸກຍາກ ເຊິ່ງສາມາດສ້າງຕົວເລກການເຕີບໂຕທາງເສດຖະກິດຢ່າງໜ້າຊື່ນຊົມ ດັ່ງນີ້: ອັດຕາການຂະຫຍາຍຕົວທາງເສດຖະກິດ ບັນລຸໄດ້ 7,16%; ລວມຍອດຜະລິດຕະພັນພາຍໃນ (GDP) ມີມູນຄ່າກວ່າ 1,800 ຕື້ກີບ (ສະເລ່ຍໃສ່ຫົວຄົນໄດ້ກວ່າ 16 ລ້ານກີບ ຫຼື ປະມານ 700 ກວ່າໂດລາສະຫະລັດ),

 

ການເກັບລາຍຮັບງົບປະມານ ປະຕິບັດໄດ້ກວ່າ 1,200 ຕື້ກີບ; ການຄຸ້ມຄອງລາຍຈ່າຍ ຢູ່ໃນລະດັບ 200 ກວ່າຕື້ກີບ; ການລົງທຶນຂອງລັດ ໄດ້ຮັບອະນຸມັດທັງໝົດ 172 ໂຄງການ, ມູນຄ່າກວ່າ 170 ຕື້ກີບ (ໃນນີ້ ເປັນໂຄງການອະນຸມັດຈາກສູນກາງ 54 ໂຄງການ, ມູນຄ່າກວ່າ 160 ຕື້ກີບ).

ສຳລັບທິດທາງແຜນການໃນ 6 ເດືອນທ້າຍປີ 2026, ທ່ານປະທານກອງປະຊຸມໄດ້ເນັ້ນໜັກໃຫ້ທຸກພາກສ່ວນ ພ້ອມກັນສຸມໃສ່ຄົ້ນຄວ້າ ແລະ ຈັດຕັ້ງປະຕິບັດວຽກງານຈຸດສຸມຢ່າງມີປະສິດທິຜົນ ເປັນຕົ້ນແມ່ນ: ການເຂັ້ມງວດຄຸ້ມຄອງໂຄງການລົງທຶນຂອງລັດ ແລະ ເອກະຊົນ, ການເລັ່ງຂຶ້ນສຳມະໂນທີ່ດິນ ແລະ ອອກໃບຕາດິນຖາວອນ, ການປົກປັກຮັກສາສິ່ງແວດລ້ອມ, ການຄຸ້ມຄອງແລະປະເມີນໂຄງການຂຸດຄົ້ນແຮ່ທາດ, ຕະຫຼອດຮອດການກໍ່ສ້າງ-ສ້ອມແປງເສັ້ນທາງຫຼວງແຫ່ງຊາດ ແລະ ທ້ອງຖິ່ນ. ພ້ອມກັນນັ້ນ, ຈະໄດ້ເລັ່ງຊຸກຍູ້ກອງທຶນພັດທະນາແຂວງໄຊສົມບູນ ແລະ ກອງທຶນພັດທະນາບ້ານ ເພື່ອສະໜອງທຶນໃຫ້ແກ່ກຸ່ມການຜະລິດເປັນສິນຄ້າ (ການປູກ-ການລ້ຽງ) ຂອງປະຊາຊົນ ເພື່ອສ້າງລາຍຮັບ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເລື້ອຍໆ.

ຂ່າວ: ພຸດທະສອນ ເວດສະວົງ