ກະສິກຳ ນວ ໂຈະປູກກ້ວຍທຸກໂຄງການໃໝ່ຖ້າລະເມີດຈະຕັດຖີ້ມ

  ພະແນກກະສິກຳ ແລະປ່າໄມ້ ນະຄອນຫຼວງວຽງຈັນ ໄດ້ສັ່ງໃຫ້ທຸກໂຄງການສວນກ້ວຍໃໝ່ທີ່ກຳລັງບຸກເບີກພື້ນທີ່ດິນເຊົ່ານຳປະຊາຊົນໂຈະການປູກກ້ວຍໄວ້ກ່ອນເພື່ອປະກອບເອກະສານການລົງທຶນ, ເອກະສານສິ່ງແວດລ້ອມ ແລະ ຮັບການອະນຸຍາດຈາກພາກສ່ວນລັດຢ່າງຖືກຕ້ອງຕາມລະບຽບການທັງນີ້ຫາກໂຄງການໃດລະເມີດແມ່ນຈະຖືກດຳເນີນມາດຕະການທາງກົດໝາຍຢ່າງເດັດຂາດເປັນຕົ້ນແມ່ນຈະຖືກປັບໃໝ່ ຫຼື ທຳລາຍຕົ້ນກ້ວຍຖິ້ມ.

  ເມື່ອວັນທີ 9 ພຶດສະພາຜ່ານມາທ່ານ ຫຼ້າສາຍ ນວນທາສີງ ຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ ໃຫ້ສຳພາດຕໍ່ສື່ມວນຊົນວ່າ: ນະ ຄອນຫຼວງວຽງຈັນເລີ່ມມີການປູກກ້ວຍເປັນໂຄງການໃຫຍ່ນັບແຕ່ປີ 2014 ເປັນຕົ້ນມາຢູ່ເມືອງສັງທອງແລ້ວຂະຫຍາຍໄປສູ່ເມືອງປາກງື່ມ ແລະນາຊາຍທອງ ເຮັດໃຫ້ເວລານີ້ຢູ່ນະຄອນຫຼວງວຽງຈັນມີສວນກ້ວຍທີ່ປູກແລ້ວທັງໝົດ 533 ເຮັກຕາຈາກ 5 ບໍລິສັດທັງໃນ ແລະຕ່າງປະເທດໃນນັ້ນສວນກ້ວຍທີ່ໃຫ້ຜົນຜະ ລິດແລ້ວ 333 ເຮັກຕາ.

 ສະເພາະຢູ່ເມືອງນາຊາຍທອງໂຄງການໃໝ່ລວມມີທັງໝົດ 4 ຈຸດ ທຳອິດແມ່ນຢູ່ບ້ານແສນດິນ 80 ກວ່າເຮັດຕາ, ຈຸດທີ 2 ຢູ່ບ້ານນາທ່ອນໃກ້ອ່າງນ້ຳຫຸມ 400 ກວ່າເຮັດຕາ (ກວມເອົາປ່າສະຫງວນ 20 ເຮັກຕາ), ເຂດທີ 3 ແມ່ນທາງບ້ານອີ່ໄລເໜືອ 100 ກວ່າເຮັກຕາ ແລະຈຸດນານາດແສນດິນ 100 ກວ່າເຮັກຕາ ນອກຈາກນີ້ກໍຍັງມີຢູ່ເມືອງປາກງື່ມຕື່ມອີກຈຳນວນໜຶ່ງ.

  ທ່ານຫົວໜ້າພະແນກກະສິກຳ ແລະ ປ່າໄມ້ເປີດເຜີຍວ່າ: ໃນຈຳນວນສວນກ້ວຍເກົ່າທີ່ປູກແລ້ວແມ່ນມີພຽງຈຳນວນໜຶ່ງເທົ່ານັ້ນທີ່ໄດ້ຮັບອະນຸຍາດຖືກຕ້ອງ ແລະໂຄງການໃໝ່ທັງໝົດແມ່ນຍັງບໍ່ໄດ້ຮັບອະນຸຍາດບາງໂຄງການກໍບໍ່ມີເອກະສານຫຍັງເລີຍເນື່ອງຈາກນັກລົງທຶນໄດ້ໄປເຊົ່າດິນໄຮ່ນາ,ຮົ້ວສວນນຳຜູ້ເປັນເຈົ້າຂອງກຳມະສິດໂດຍກົງຊຶ່ງບໍ່ຜ່ານພາກສ່ວນກ່ຽວຂ້ອງຂອງລັດກໍຄືບໍ່ຜ່ານຂັ້ນຕອນການຂໍອະນຸຍາດລົງທຶນຕາມລະບຽບກົດໝາຍ.

 ເມື່ອບໍ່ດົນມານີ້ຄະນະກຳມະການທີ່ກ່ຽວຂ້ອງຂອງກະຊວງກະສິກຳ ແລະ ປ່າໄມ້, ນະຄອນຫຼວງແລະເມືອງກໍໄດ້ລົງຕິດຕາມກວດກາພ້ອມສະເໜີລາຍງານເຖິງລັດຖະບານໃນການພິຈາລະນາຄົ້ນຄວ້າບັນຫາດັ່ງກ່າວຕາມຄວາມເໝາະສົມພ້ອມດຽວກັນນັ້ນກໍໄດ້ເຊັນບົດບັນທຶກຮ່ວມກັບເຈົ້າຂອງໂຄງການເກົ່າ ແລະ ໃໝ່ໃຫ້ດຳເນີນຕາມຂັ້ນຕອນຂອງລະບຽບກົດໝາຍໂດຍສະເພາະແມ່ນບົດວິພາກເສດຖະກິດການບໍລິຫານຈັດການສີ່ງແວດລ້ອມຕະຫຼອດຮອດການຂໍອະນຸຍາດໃນການປູກທີ່ຖືກຕ້ອງຖ້າເອກະສານບໍ່ຜ່ານກໍຈະບໍ່ໃຫ້ດຳເນີນການປູກກ້ວຍຕໍ່ຢ່າງເດັດຂາດທ່ານ ຫຼ້າສາຍ ນວນທາສີງ ກ່າວ.

  ສໍາລັບໂຄງການໃໝ່ຊຶ່ງມີການບຸກເບີກພື້ນທີ່ແມ່ນໄດ້ມີການສັ່ງໂຈະການປູກກ້ວຍໄວ້ກ່ອນ ແລະໃຫ້ປູກພືດຊະນິດອື່ນທົດແທນຈົນກວ່າການປະກອບເອກະ ສານຈະໄດ້ຮັບການອະນຸຍາດທີ່ຖືກຕ້ອງຈາກເບື້ອງລັດແຕ່ຫາກໂຄງການໃດຜ່າຝືນແມ່ນຈະໄດ້ດຳເນີນການຢ່າງເດັດຂາດເປັນຕົ້ນແມ່ນຈະມີການປັບໃໝ່ ຫຼື ທຳລາຍກ້ວຍທີ່ປູກນັ້ນຖີ້ມໂດຍເວລານີ້ກຳລັງຈະຮ່າງແຈ້ງການເປັນລາຍລັກອັກສອນເຖິງຜູ້ປະກອບການ.

ທັງນີ້ທ່ານ ຫຼ້າສາຍ ນວນທາສີງ ໃຫ້ທັດສະນະຢ້ຳຕອນທ້າຍວ່າການປູກກ້ວຍຢູ່ເມືອງປາກງື່ມ ແລະເມືອງນາຊາຍທອງແມ່ນເຫັນວ່າບໍ່ມີຄວາມເໝາະສົມເພາະບາງໂຄງການມີຈຸດທີ່ຕັ້ງໃກ້ກັບສາຂາສາຍນ້ຳຕ່າງໆພ້ອມດຽວກັນນີ້ກໍໃກ້ຊຸມຊົນມີພື້ນທີ່ຮາບພຽງ.

  ແນວໃດກໍດີຜ່ານມາກໍຄືປະຈຸບັນໂຄງການປູກກ້ວຍຢູ່ຫຼາຍແຂວງທາງພາກເໜືອຂອງລາວສ່ວນໃຫຍ່ແມ່ນໄດ້ມີການຢຸດຕິອະນຸຍາດໂຄງການໃໝ່ໝົດແລ້ວ ອັນມີຜົນກະທົບມາຈາກບັນຫາສີ່ງແວດລ້ອມດັ່ງທີ່ເປັນຂ່າວໄດ້ນຳສະເໜີໄປກ່ອນໜ້ານີ້ຊຶ່ງຫາງສຽງປະຊາຊົນສ່ວນຫຼາຍແມ່ນຮຽກຮ້ອງໃຫ້ພາກລັດຖະບານ

ໂດຍສະເພາະນະຄອນຫຼວງວຽງຈັນ ຈົ່ງໄດ້ມີການພິຈາລະນາຄົ້ນຄວ້າໂຄງການໃຫ້ລະອຽດຖິ່ນຖ້ວນຄັກແນ່ກ່ອນເພາະຜ່ານມາມີຫຼາຍໂຄງການຂຽນເອກະສານສະເໜີເລື່ອງແວດລ້ອມຄັກແນ່ຈົບງາມແຕ່ພາກປະຕິບັດຕົວຈຶ່ງພັດເປັນໄປໃນທາງທີ່ກົງກັນຂ້າມໂດຍຜູ້ໄດ້ຮັບຜົນກະທົບໂດຍກົງແມ່ນພໍ່ແມ່ປະຊາຊົນເພາະ ຖ້າຫາກການບໍລິຫານຈັດການບັນຫາສີ່ງແວດລ້ອມບໍ່ຮອບຄອບອາດສົ່ງຜົນກະທົບຕໍ່ຊີວິດ ແລະສຸຂະພາບຂອງຄົນ ແລະ ສັດໃນຊຸມຊົນຢ່າງຮ້າຍແຮງໄດ້.

ພາບ ແລະຂ່າວໂດຍ:  ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์