ໃນວັນທີ 22 ມິຖຸນາ 2026, ເຈົ້າໜ້າທີ່ວິຊາສະເພາະ ກອງບັນຊາການ ປກສ ແຂວງເຊກອງ ສົມທົບກັບກອງບັນຊາການທະຫານແຂວງ ແລະ ອົງການໄອຍະການປະຊາຊົນແຂວງ ແລະ ພາກສ່ວນທີ່ກ່ຽວຂ້ອງ ໄດ້ເຂົ້້າກວດກາເປົ້າໝາຍຄົນຕ່າງປະເທດ ທີ່ເຂົ້າມາເຊົ່າຫ້ອງແຖວຂອງປະຊາຊົນ ເພື່ອເປັນບ່ອນເຄື່ອນໄຫວກໍ່ອາຊະຍາກຳທາງໂທລະຄົມ ແລະ ການສື່ສານ (ສະແກມເມີ).

 

ເຊີ່ງການປະຕິບັດງານຄັ້ງນີ້, ເກີດຂຶ້ນຈາກການປະສານງານແບບບູລະນາການ ໂດຍມີເຈົ້າໜ້າທີ່ວຽກງານວິຊາສະເພາະສືບສວນ-ສອບສວນ ເຮັດໜ້າທີ່ຕິດຕາມການເຄື່ອນໄຫວທາງໄຊເບີ, ວິເຄາະສັນຍານ, ແລະ ກວດກາຄົນເຂົ້າເມືອງມາພັກເຊົາພາຍໃນແຂວງເຊກອງ ຢ່າງເປັນປົກກະຕິ, ລວມເຖິງການໄດ້ຮັບຂໍ້ມູນສໍາຄັນຈາກປະຊາຊົນໃນເຂດເປົ້າໝາຍທີ່ເປັນຫູເປັນຕາໃຫ້ເຈົ້າໜ້າທີ່.

 

ພາຍຫຼັງການຕິດຕາມມາໄດ້ໄລຍະໜຶ່ງ, ກໍາລັງເຈົ້າໜ້າທີ່ ຕຳຫຼວດຈຶ່ງໄດ້ບຸກເຂົ້າກວດຄົ້ນເຮືອນພັກເຊົາໃນເທດສະບານ, ຕົວເມືອງ ເຊິ່ງກຸ່ມດັ່ງກ່າວໄດ້ໃຊ້ເປັນສະຖານທີ່ໃນການກໍ່ເຫດ; ເຊີ່ງໄດ້ເຄືອນໄຫວກວາດລ້າງຢູ່ 9 ຈຸດ ຄື: ເຂດບ້ານເພຍໃຫ່ມ, ບ້ານໂນມີໄຊ, ບ້ານໂພນ, ບ້ານໂພໄຊ, ເມືອງລະມາມ ແລະ ບ້ານທ່າແຕງເໜືອ, ເມືອງທ່າແຕງ, ແຂວງເຊກອງ ເຊີ່ງພົບເຫັນເປົ້າໝາຍກຸ້ມແກ້ງສະແກມເມີ ທີ່ເປັນຄົນຕ່າງປະເທດ ທັງໝົດ ຈຳນວນ 101 ຄົນ ຍິງ 6 ຄົນ; ໃນນີ້ມີ 3 ສັນຊາດ ຄື: ສັນຊາດຈີນ ມີ 90 ຄົນ ຍິງ 2 ຄົນ, ຍີ່ປຸ່ນ 7 ຄົນ ແລະ ກຳປູເຈຍ 4 ຄົນ ຍິງ 4 ຄົນ; ໄດ້ເເບ່ງເປັນ 2 ກຸ່ມ ຄື: ໃນນີ້ ໄດ້ແບ່ງກຸ່ມສະແກມເມີ ແລະ ກຸ່ມຄົນປະເທດທີ່ລັກລອບເຂົ້າ-ເມືອງຜິດກົດໝາຍ ພ້ອມທັງຢືດຂອງກາງໄດ້ຈຳໜວນໜື່ງ. ໃນນີ້ ກຸ່ມແກ້ງສະແກມເມີ ມີທັງໝົດ 63 ຄົນ ຍິງ 6 ຄົນ ລວມມີ 2 ສັນຊາດ: ຈີນ ມີ 59 ຄົນ ຍິງ 2 ຄົນ, ກຳປູເຈຍມີ 4 ຄົນ ຍີງ 4 ຄົນ; ສາມາດຢຶດຂອງກາງໄດ້ປະກອບມີ: ຄອມພິວເຕີ 9 ໜ່ວຍ, ບັດ ATM 43 ບັດ, ປືນສັ້ນ 01 ກະບອກ, ໂທລະສັບມືຖື 1.331 ໜ່ວຍ, ເງິນກີບ 62.000.000ກີບ, ເງິນໂດລາ 4.011 ໂດລາ, ເງິນ ກຳປູເຈຍ 353.600 ລຽວ, ຢາບ້າ 2 ເມັດ, ອຸປະກອນການເສບ 1 ຊຸດ, ແປ້ງຜົງຄ້າຍຄືຜົງເຄ 8 ຖົງ ແລະ ອື່ນໆອີກຫຼາຍລາຍການ ເຊີ່ງເຄື່ອນໄຫວໃນການກະທຳຜິດ; ກຸ່ມຄົນຕ່າງປະເທດທີ່ລັກລອບເຂົ້າ-ເມືອງຜິດກົດໝາຍ ມີຈຳນວນທັງໝົດ 38 ຄົນ, ລວມມີ 2 ສັນຊາດຄື: ຈີນ 31 ຄົນ, ຍີ່ປຸ່ນ 7 ຄົນ ມີເຄື່ອງຕິດຕົວຄື: ໂທລະສັບ 41 ໜ່ວຍ, ໄອແພັດ 01 ໜ່ວຍ, ເຄື່ອງບັດ ATM 20 ບັດ, ບັດປະຈຳຕົວ 08 ບັດ, ເງິນກີບ 18.749.000 ກີບ, ເງິນດົ້ງ 670,000 ດົ້ງ, ເງິນໂດລາ 195 ໂດລາ, ສາຍຄໍຄ້າຍຄືເງິນ 01 ເສັ້ນ, ສາຍແຂນລູກປັດ 01 ເສັ້ນ.

 

ປັດຈຸບັນ, ເຈົ້າໜ້າທີ່ກ່ຽວຂ້ອງກຳລັງສືບຕໍ່ດຳເນີນການສືບສວນ-ສອບສວນ ຜູ້ຕ້ອງຫາທັງໝົດຢ່າງລະອຽດຈະແຈ້ງ, ພ້ອມທັງຂະຫຍາຍຜົນເກັບກຳຂໍ້ມູນ ເຈົ້າຂອງສະຖານທີ່ ທີ່ອຳນວຍຄວາມສະດວກໃຫ້ແກ່ກຸ່ມແກ້ງດັ່ງກ່າວ ເພື່ອນຳຕົວມາສືບສວນ-ສອບສວນ ແລະ ດຳເນີນຄະດີຕາມລະບຽບກົດໝາຍ; ພ້ອມນັ້ນ ຍັງໄດ້ຮຽກຮ້ອງມາຍັງພໍ່ແມ່ປະຊາຊົນທົ່ວປ່ວງຊົນເວົ້າລວມ, ເວົ້າສະເພາະແຂວງເຊກອງ ຈົ່ງພ້ອມກັນເອົາໃຈໃສ່ເປັນຮູເປັນຕາໃຫ້ທາງເຈົ້າໜ້າທີ່ເພື່ອສະດວກໃນການກວາດລ້າງໄພຕໍ່ສັງຄົມ.

ຂ່າວ : ປກສ ແຂວງເຊກອງ