ປະກາດບ້ານໂນນມີໄຊ ເປັນບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດ

ວັນທີ 9 ເມສາ ຜ່ານມາເມືອງອາດສະພອນໄດ້ຈັດພິທີປະ ກາດຮັບຮອງເອົາ 16 ບ້ານເປັນ ບ້ານພັດທະນາຮອບດ້ານຊຶ່ງໄດ້ຈັດ ຂຶ້ນທີ່ເດີ່ນວັດບ້ານໂພນນາດີ ໃຫ້ກຽດເປັນປະທານໂດຍທ່ານ ກົງຈັກໜໍ່ແກ້ວ ຫົວໜ້າພະແນກການ ເງິນແຂວງ, ທ່ານແສງທອງ ວັງແກ້ວມະນີເຈົ້າເມືອງອາດສະພອນ,ມີບັນດາທ່ານການນໍາຂັ້ນແຂວງ, ຕົວແທນຈາກເມືອງອ້ອມຂ້າງຕະ ຫຼອດຮອດປະຊາຊົນທັງ 16 ບ້ານ ເຂົ້າຮ່ວມຢ່າງພ້ອມພຽງ.

ທ່ານ ເພັດ ທຳທະວົງນາຍບ້ານໆໂພນນາດີຕາງໜ້າໃຫ້ກຸ່ມບ້ານທີ່ໄດ້ຮັບນາມມະຍົດໃນຄັ້ງນີ້ ໄດ້ຂຶ້ນຜ່ານບົດລາຍງານການສ້າງບ້ານພັດທະນາຮອບດ້ານ ຊຶ່ງໃຫ້ຮູ້ວ່າ: ທັງ 16 ບ້ານມີພົນລະເມືອງ ທັງໝົດ 16,5 ພັນຄົນ, ຍິງ 8,2 ພັນຄົນ, ມີ 2,5 ພັນຄອບຄົວ,ໃນນັ້ນມີຊົນເຜົ່າຜູ້ໄທກວມເອົາ 12 ບ້ານ, ຊົນເຜົ່າບາຣູ 4 ບ້ານແມ່ນນັບຖືສາສະໜາພຸດ 100%, ລັກສະນະພູມສັນຖານຂອງບ້ານ ເປັນເຂດທົ່ງພຽງເໝາະແກ່ການປູກຝັງ ແລະລ້ຽງສັດ, ອາຊີບຕົ້ນ ຕໍຂອງປະຊາຊົນປູກພືດ, ລ້ຽງສັດ ແລະຄ້າຂາຍເປັນອາຊີບສຳຮອງ ເພື່ອສ້າງລາຍຮັບໃຫ້ແກ່ຄອບຄົວ, ສາມາດສ້າງລາຍຮັບເພີ່ມຂຶ້ນກວມ ເອົາລາຍຮັບອື່ນໆ  57ກວ່າ%  ສ້າງ ລາຍຮັບສະເລ່ຍປີ 1 ຕໍ່ຄົນໄດ້ 3,9 ລ້ານກີບ ແລະສ້າງລາຍຮັບເຂົ້າ ງົບປະມານປີ 2018 ປະຕິບັດໄດ້ 90,50% ປະຊາຊົນມີຄວາມຕື່ນ ຕົວທາງດ້ານການເມືອງ, ມີຄວາມ ສາມັກຄີຊ່ວຍເຫຼືອເຊິ່ງກັນ ແລະກັນ ຢ່າງແໜ້ນແຟ້ນຕີລາຄາຄວາມຕື່ນຕົວປະຊາຊົນທາງດ້ານການເມືອງ  ໄດ້ 95%, ຊຶ່ງມາຮອດປະຈຸບັນໃນ 16  ບ້ານຍັງເຫຼືອຄອບຄົວທີ່ທຸກຍາກ 67 ຄອບຄົວ, ຜ່ານການປະເມີນ ວຽກງານແຕ່ລະດ້ານ 16 ບ້ານ ແມ່ນຄົບຕາມ 19 ມາດຖານເງື່ອນໄຂຂອງການສ້າງບ້ານພັດທະນາ.

ຈາກນັ້ນໃນພິທີ, ກໍ່ໄດ້ມອບໃບ ຢັ້ງຢືນຮັບຮອງເອົາ16 ບ້ານເປັນບ້ານພັດທະນາຮອບດ້ານເປັນກຽດມອບໂດຍທ່ານກົງຈັກໜໍ່ແກ້ວ,ນອກຈາກນີ້ຍັງໄດ້ມອບໃບຢັ້ງຢືນ ຮັບຮອງບ້ານໂນນມີໄຊ ເປັນບ້ານໃຫຍ່ຄ້າຍຄືຕົວເມືອງນ້ອຍໃນຊົນນະ ບົດ ແລະມອບໃບຢັ້ງຢືນບ້ານປ້ອງ ກັນຊາດເຂັ້ມແຂງ 16 ບ້ານ, ບ້ານ ສາມັກຄີປອງດອງ 15 ບ້ານ, ບ້ານພັດທະນາສີມືແຮງງານ ແລະ ສະຫວັດດີການສັງຄົມ 17 ບ້ານ, ບ້ານແບບຢ່າງປະຕິບັດກົດໝາຍ 10 ບ້ານ, ບ້ານໜ່ວຍພັກປອດໃສ, ໜັກແໜ້ນ, ເຂັ້ມແຂງ10 ບ້ານ, ໂດຍການນຳຜັດປ່ຽນກັນມອບໃຫ້ ຢ່າງສົມກຽດ. ຕໍ່ມາໃນພິທີຍັງໄດ້ມີ ການຕັດແຖບຜ້າເປີດປ້າຍທັງ 16 ບ້ານເປັນບ້ານພັດທະນາຮອບດ້ານ ພ້ອມທັງລັ່ນຄ້ອງ 9 ບາດເພື່ອເປັນສິລິມຸງຄຸນໃຫ້ແກ່ງານຄັ້ງນີ້ດວ້ຍ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์