ຮ່ວມສ້າງຊ່າງຖັກວິກຜົມ

  ໃນວັນທີ 8 ພຶດສະພາຜ່ານມາ, ທີ່ສະຖາບັນພັດທະນາສີມືແຮງງານລາວ-ເກົາຫຼີ, ໄດ້ມີພິທີລົງນາມເຊັນບົດບັນທຶກຄວາມຮ່ວມມືລະຫວ່າງສະຖາບັນພັດທະ ນາສີມືແຮງງານລາວ-ເກົາຫຼີ ແລະບໍລິສັດລາວຄວາລິຕີ ຈຳກັດ ກ່ຽວກັບການຝຶກສີມືແຮງງານສາຂາຊ່າງຖັກວິກຜົມເພື່ອສະໜອງແຮງງານໃຫ້ແກ່ບໍລິສັດລາວຄວາລິຕີ ຊຶ່ງເຂົ້າຮ່ວມ ແລະລົງນາມໃນບົດບັນທຶກຂອງ ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານລາວ-ເກົາ ຫຼີ ແລະທ່ານຮິ ໂຕຊິອາກັດຊາກະ (Hi toshi Akatsaka) ຜູ້ຈັດການບໍລິສັດ ລາວຄວາລິຕີ ຈຳກັດ, ມີທ່ານຮອງຫົວໜ້າຫ້ອງການ, ພະນັກງານວິການ ແລະ ຄູ-ອາຈານທີ່ກ່ຽວຂ້ອງເຂົ້າຮ່ວມ.

 ການຮ່ວມມືຂອງສອງຝ່າຍໃນຄັ້ງນີ້ເປັນການຝຶກສີມືແຮງງານໃນສາຂາຊ່າງຖັກວິກຜົມເພື່ອສະໜອງແຮງງານໃຫ້ແກ່ບໍລິສັດລາວຄວາລິຕີ ຈຳກັດ, ທັງເປັນການສ້າງວຽກເຮັດງານທຳໃຫ້ແກ່ກຳລັງແຮງງານງານລາວທີ່ວ່າງງານ, ໃຫ້ມີລາຍໄດ້ສາມາດກຸ້ມຕົວເອງ ແລະ ຄອບຄົວຊຶ່ງການຮ່ວມມືຂອງສອງຝ່າຍໃນເທື່ອນີ້ແມ່ນມີໄລຍະເວລາ 3 ປີ ແລະສາມາດຕໍ່ອາຍຸໄດ້ຖ້າຫາກຜົນການປະເມີນເປັນທີ່ພໍໃຈຂອງທັງສອງຝ່າຍ, ສໍາລັບການຝຶກອົບຮົມແມ່ນຈະໃຊ້ເວລາ 2 ເດືອນຕໍ່ຊຸດ, ໂດຍນັກຮຽນທີ່ມາຝຶກອົບຮົມໃນສາຂາວິຊາຊີບດັ່ງກ່າວແມ່ນຈະໄດ້ຮັບສິດທິພິເສດເປັນຕົ້ນຟີຄ່າຮຽນ,ຄ່າຫໍພັກ,ຄ່າອຸປະກອນການຮຽນ ແລະລ້ຽງເຂົ້າມື້ລະ 3 ຄາບ, ຫຼັງຈາກຮຽນຈົບຫຼັກສູດແລ້ວສາມາດເຂົ້າເຮັດວຽກກັບບໍລິສັດລາວຄວາລິຕີ ຈຳກັດ ໄດ້ທັນທີ.

ສຳລັບນັກຮຽນ, ນັກສຶກສາ ຫຼື ບຸກຄົນທົ່ວໄປທີ່ຍັງບໍ່ມີວຽກເຮັດງານທໍາກໍສາມາດມາລົງທະບຽນ ຫຼື ຕິດຕໍ່ພົວພັນກັບສະຖາບັນພັດທະນາສີມືແຮງງານລາວ-ເກົາຫຼີໄດ້ໃນໂມງລັດຖະການວັນຈັນ-ວັນສຸກ, ສະຖານທີ່ໂຮງຮຽນຕັ້ງຢູ່ ຖະໜົນໂພນຕ້ອງ-ດົກໂດກ, ບ້ານຄໍາຮຸ່ງ, ເມືອງໄຊທານີ, ນະຄອນຫຼວງວຽງຈັນ, ໂທ 020 22145483 ອາຈານ ບຸນຍົງ; 02059561631 ອາຈານສຸກັນ, ສ່ວນເອກກະສານສະໝັກປະກອບມີໃບຢັ້ງຢືນທີ່ຢູ່, ກອບປີ້ສຳມະໂນຄົວ ຫຼື ບັດ ປະຈຳຕົວ, ເອົາພຽງ 1 ໃນສາມເທົ່ານັ້ນ ກໍ່ສາມາດເຂົ້າຮຽນໄດ້ທັນທີ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์