ສະຫະລັດມອບອາຫານທ່ຽງ ໃຫ້ເດັກນ້ອຍເຂດທຸລະກັນດານ

ວັນທີ 10 ພຶດສະພາ 2019 ນະ ຄອນຫຼວງວຽງຈັນ ສະຖານທູດສະຫະລັດອາເມລິກາປະຈໍາ ສປປ ລາວ ໄດ້ຈັດພິທີມອບ-ຮັບເຄື່ອງຊ່ວຍເຫຼືອໃຫ້ແກ່ອົງການ ອາຫານໂລກເພື່ອຈະນໍາໄປໃຊ້ເຂົ້າໃນການເຮັດອາຫານທ່ຽງກວ່າ 1,40 ແສນຄາບ ໃຫ້ກັບເດັກນ້ອຍຊັ້ນປະຖົມໃນຖິ່ນທຸລະກັນດານໃນປະເທດລາວສຳລັບອຸ ປະກອນທີ່ນຳມາຊ່ວຍເຫຼືອໃນຄັ້ງນີ້ປະກອບມີເຂົ້າສານຈ້າວຈໍານວນ 2,2 ພັນໂຕນ,

 ໝາກຖົ່ວ 660 ໂຕນ ແລະນໍ້າມັນພືດ 260 ໂຕນ ມອບໂດຍທ່ານ ນາງ ຣີນາ ບິທເທີ, ເອກອັກຄະລັດຖະທູດສະຫະລັດອາເມລິກາ ປະຈໍາລາວ ແລະຮັບໂດຍ ທ່ານ ຢານ ເດວບາເຮ ຜູ້ອໍານວຍການ ແລະຜູ້ຕາງໜ້າຈາກອົງການອາຫານໂລກປະຈໍາລາວ, ມີບັນດາຫົວໜ້າ, ຮອງອົງການອາຫານໂລກ ແລະພາກສ່ວນທີ່ ກ່ຽວຂ້ອງເຂົ້າຮ່ວມ.

 ນາງ ຣີນາ ບິທເທີ ໃຫ້ຮູ້ວ່າ: ນັບແຕ່ ປີ 2008, ໂຄງການແມັກໂກລວັນໂດອາຫານເພື່ອໂພຊະນາການຂອງລັດຖະບານສະຫະລັດອາເມລິກາໄດ້ໃຫ້ການສະ ໜັບສະໜູນໂຄງການອາຫານທ່ຽງໃນໂຮງຮຽນໃນປະເທດລາວຊຶ່ງລວມມູນຄ່າຫຼາຍກວ່າ 60 ລ້ານໂດລາ. ແມັກໂກວັລໂດ ເລີ່ມຕົ້ນໃຫ້ການສະໜັບສະໜູນໂດຍຜ່ານອົງການອາຫານໂລກອັນໄດ້ເຮັດໃຫ້ເດັກນ້ອຍຫຼາຍກວ່າ 1,5 ລ້ານ ຄົນໄດ້ຮັບຜົນປະໂຫຍດຈາກໂຄງການອາຫານເພື່ອໂພຊະນາການນີ້.

  ຊຶ່ງປະຈຸບັນນີ້ ເດັກນ້ອຍຫຼາຍກວ່າ 1,40 ແສນຄົນ, ໃນ 1,4 ພັນໂຮງຮຽນຊຶ່ງນອນຢູ່ໃນ 8 ແຂວງທົ່ວປະເທດໄດ້ຮັບອາຫານທ່ຽງທີ່ເຕັມໄປດ້ວຍຄຸນຄ່າທາງໂພຊະນາການຊຶ່ງປະກອບດ້ວຍເຂົ້າສານຈ້າວ 100 ກຣາມ, ໝາກຖົ່ວ 40 ກຣາມ ແລະນໍ້າມັນ ຈໍານວນ 10 ກຣາມ ຈາກລັດຖະບານສະຫະລັດອາເມ ລິກາ.

 ສໍາລັບອົງການອາຫານໂລກແຫ່ງສະຫະປະຊາຊາດຊ່ວຍເຫຼຼືອຜູ້ຄົນໃນພາວະສຸກເສີນ ແລະຊ່ວຍປ່ຽນແປງຊີວິດຄົນນັບລ້ານຜ່ານການພັດທະນາແບບຍືນຍົງ, ນອກນັ້ນ, ອົງການອາຫານໂລກຍັງໄດ້ເຮັດວຽກຢູ່ຫຼາຍກວ່າ 80 ປະເທດທົ່ວໂລກເພື່ອໃຫ້ການຊ່ວຍເຫຼືອດ້ານອາຫານແກ່ຜູ້ທີ່ຕົກຢູ່ໃນພື້ນທີ່ຄວາມຂັດແຍ່ງ, ໄພພິບັດ ແລະຊ່ວຍວາງໂຄງລ່າງພື້ນຖານໃຫ້ນັບມື້ນັບດີຂຶ້ນກວ່າເກົ່າ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์