ໃນຕອນເຊົ້າວັນທີ 23 ມິຖຸນາ 2026 ທ່ານ ນາງ ແກ້ວອຳພອນ ສຸວັນນະພາບ ອຳນວຍການອົງການແຄ ປະຈຳ ສປປ ລາວ, ທ່ານ ນາງ ດໍເທ ເວກເກີ ອຸປະທູດ ສະຫະພາບເອີຣົບ ປະຈຳ ສປປ ລາວ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມສູນຜະລິດກາເຟບ້ານດາກຢອຍ ເມືອງດາກຈຶງ ແຂວງເຊກອງ ໂດຍມີຂະແໜງການກ່ຽວຂ້ອງຂັ້ນແຂວງ, ເມືອງ, ພະນັກງານອົງການແຄ ປະຈຳແຂວງເຊກອງ, ຜູ້ປະສານງານໂຄງການສຸເປີວີຄອບຟີ ( Super we coffee)ແລະກຸ່ມຜະລິດກາເຟບ້ານດາກຢອຍເຂົ້າຮ່ວມຕ້ອນຮັບ.

 

ທ່ານ ນາງ ລອຍມະນີ ໄຊຍະອິ້ວ ຄະນະບໍລິຫານງານສະຫະກອນກາເຟພູດອຍດາກຈຶງ ປະທານກຸ່ມຜະລິດກາເຟບ້ານດາກຢອຍ ກ່າວວ່າ: ກຸ່ມຜະລິດກາເຟ

ບ້ານດາກຢອຍ ແມ່ນໜຶ່ງໃນ 17 ກຸ່ມການຜະລິດກາເຟປອດສານພິດ ເປັນມິດຕໍ່ສິ່ງແວດລ້ອມ ທີ່ນອນໃນໂຄງການ ເສີມສ້າງຄວາມເຂັ້ມແຂງໃຫ້ແກ່ແມ່ຍິງໂດຍຜ່ານລະບົບຕ່ອງໂສ້ມູນຄ່າເພີ່ມຂອງຜະລິດຕະພັນກາເຟທີ່ມີຈັນຍາບັນ ແລະ ເປັນມິດຕໍ່ສິ່ງແວດລ້ອມ ( Super we coffee ) ແລະຂຶ້ນກັບສະຫະກອນກາເຟພູດອຍດາກຈຶງ ເຊິ່ງສາມາດສ້າງລາຍຮັບເພີ່ມຂຶ້ນຈາກໄລຍະຜ່ານມາ ແລະ ເປັນອາຊີບທີ່ຍືນຍົງໃຫ້ແກ່ຄອບຄົວປະຊາຊົນພາຍໃນບ້ານ ເຊິ່ງມີອາຊີບປູກຝັງ, ລ້ຽງສັດເປັນຫຼັກ ແລະ ມີຫລາຍຄອບຄົວຖືການປູກກາເຟ ເພື່ອເປັນສິນຄ້າ ເຊິ່ງໂຄງການສຸເປີວີຄອບຟີ ໄດ້ເຂົ້າມາຊ່ວຍໂດຍການສ້າງຕັ້ງກຸ່ມຜະລິດກາເຟຢູ່ບ້ານດາກຢອຍແຕ່ປີ 2017 ເປັນຕົ້ນມາ, ໂຄງການນີ້ໄດ້ຍົກເຕັກນິກການຜະລິດກາເຟປອດສານພິດ, ຮັກສາສິ່ງແວດລ້ອມ ແລະ ສະໜອງອຸປະກອນການຜະລິດ ເຮັດໃຫ້ໄດ້ຮັບຜົນຜະລິດຫລາຍຂຶ້ນ, ມີຄຸນນະພາບດີຂຶ້ນ, ຂາຍໄດ້ລາຄາສູງ ສາມາດສ້າງລາຍຮັບໄດ້ເພີ່ມຂຶ້ນກວ່າເກົ່າ.

 

ຫລັງຈາກໄດ້ຢ້ຽມຊົມອາຄານສະຖານທີ່ຂອງກຸ່ມຜະລິດແລ້ວ ກໍໄດ້ໄປເບິ່ງສວນປູກກາເຟ ຂອງປະຊາຊົນບ້ານດາກຢອຍ.

.

ຂ່າວ: ອັດສະວິນ