ສຟລ ຮຽກຮ້ອງລັດປົດລັອກຂະໜາດສິນຄ້າໄມ້ສົ່ງອອກໃຫ້ສອດຄ່ອງຕະຫຼາດທີ່ຕ້ອງການ

  ສະມາຄົມເຟີນິເຈີລາວຮຽກຮ້ອງໃຫ້ລັດຖະບານຊ່ວຍປັບປຸງບັນຊີໄມ້ສົ່ງອອກໃຫ້ສອດຄ່ອງກັບຄວາມຕ້ອງການຂອງຕະຫຼາດຕ່າງປະເທດໂດຍພາຍຫຼັງທີ່ລັດກຳນົດໃໝ່ຕາມຂໍ້ຕົກລົງເລກທີ 0002/ອຄ, ກອຫ ແມ່ນໄດ້ຈຳກັດຂະໜາດນ້ອຍກວ່າລູກຄ້າຕ້ອງການອັນໄດ້ສ້າງຄວາມຫຍຸ້ງຍາກແກ່ຜູ້ປະກອບການເຮັດສຳເລັດຮູບຫຼາຍສົມຄວນ ຫຼື ມີພຽງແຕ່ 30% ເທົ່ານັ້ນຂອງສິນຄ້າຜະລິດໄດ້ສາມາດສົ່ງອອກ.

  ເມື່ອວັນທີ 10 ພຶດສະພາຜ່ານມາທ່ານ ກອງມາລາ ພົມມະໄລ ຮອງປະທານສະມາຄົມເຟີນິເຈີໄມ້ລາວ (ສຟລ) ໃຫ້ສຳພາດວ່າ: ນັບແຕ່ລັດຖະບານໄດ້ອອກຄຳ ສັ່ງເລກທີ 15/ນຍ ເມື່ອກາງປີ 2016 ຜ່ານມາກໍນັບວ່າເປັນສີ່ງທີ່ດີທີ່ສຸດອັນໄດ້ເຮັດໃຫ້ພື້ນທີ່ການປົກຫຸ້ມຂອງປ່າໄມ້ໃນລາວມີສີຂຽວເພີ່ມຂຶ້ນ, ການສົ່ງ ອອກໄມ້ທ່ອນໄດ້ຢຸດຕິລົງຢ່າງຊິນເຊີງ ແລະໂຮງງານໄມ້ບໍ່ໄດ້ມາດຕະຖານກໍຖືກສັ່ງປິດໃຫ້ໝົດໄປນັບມື້ໂດຍຂໍ້ມູນຈາກລັດຖະບານໃນເວລານີ້ທົ່ວປະເທດມີໂຮງ ງານໄມ້ທັງໝົດ 1.086 ແຫ່ງ ໃນນີ້ເປັນໂຮງເລື່ອຍ 8 ແຫ່ງ, ໂຮງ ງານ 404 ແຫ່ງ ແລະອີກ 674 ແຫ່ງ ແມ່ນເປັນໂຮງງານເຟີນິເຈີ.

 ຢ່າງໃດກໍຕາມແຕ່ພາຍຫຼັງກະຊວງອຸດສາຫະກຳ ແລະການຄ້າກໍໄດ້ອອກຂໍ້ຕົກລົງເລກທີ 0002/ອຄ,ກອຫ ໃນຕົ້ນປີ 2018 ວ່າດ້ວຍການຮັບຮອງເອົາລາຍ ການ (ບັນຊີ) ຜະລິດຕະພັນໄມ້ເພື່ອສົ່ງອອກ (ສະບັບປັບປຸງ) ທ່ານ ຮອງປະທານ ສຟລ ກ່າວວ່າຜູ້ປະກອບການແມ່ນໄດ້ຮັບຜົນກະທົບຫຼາຍສົມຄວນບັນຍາ ກາດການສົ່ງອອກຜະລິດຕະພັນໄມ້ງຽບເຫງົາຍ້ອນຂະໜາດຂອງສິນຄ້າທີ່ກຳນົດໃຫ້ແມ່ນນ້ອຍເກີນກວ່າຄວາມຕ້ອງການຂອງຕະຫຼາດຕ່າງປະເທດເຮັດໃຫ້ຜູ້ປະກອບການສາມາດສົ່ງອອກໄດ້ພຽງ 30% ຂອງຜະລິດຕະພັນທີ່ຜະລິດໄດ້ທັງໝົດຂະນະທີ່ການຈຳໜ່າຍພາຍໃນແມ່ນເປັນຕະຫຼາດນ້ອຍກຳລັງຊື້ບໍ່ຫຼາຍ.

  ທ່ານ ກອງມາລາ ພົມມະໄລ ກ່າວຕື່ມວ່າ: ຫາກລັດຍັງຈະສືບຕໍ່ຮັກສາຂະໜາດໄມ້ໃຫ້ສົ່ງອອກໄວ້ຄືແນວນີ້ເຊື່ອແນ່ວ່າຈະສ້າງຄວາມເສຍຫາຍໃຫ້ກັບສິນຄ້າເຟີນິເຈີໄມ້ລາວຫຼາຍຂຶ້ນຢ່າງແນ່ນອນໂດຍສະເພາະໃນດ້າຍລາຄາເພາະຄຸນນະພາບໄມ້ຈະຫຼຸດລົງຕາມການເວລາທັງເຮັດໃຫ້ສິນຄ້າລາວເສຍໂອກາດທີ່ຈະແຂ່ງ ຂັນໃນຕະຫຼາດໂລກທັງນີ້ຮຽກຮ້ອງໃຫ້ລັດຖະບານຈົ່ງຊ່ວຍເບີ່ງຄືນບັນຊີໄມ້ສົ່ງອອກ ແລະຕ້ອງມີການປັບປຸງໃໝ່ຂະໜາດໃຫ້ສອດຄ່ອງກັບຄວາມຕ້ອງການ

ຂອງຕະຫຼາດ ແລະສາມາດສົ່ງອອກໄດ້ເປັນຕົ້ນຜະລິດຕະພັນໄມ້ສຳເລັດຮູບທີເປັນເຄື່ອງເຟີນິເຈີປະກອບມີຊຸດຮັບແຂກ, ໂຕະ, ຕຽງ, ຕັ່ງ, ໂຕະເຄື່ອງແຕ່ງໜ້າ, ຊຸດຕູ້ໃນເຮືອນ, ຕູ້ໃສ່ເຄື່ອງນຸ່ງຮົ່ມ ແລະ ໄມ້ແກະສະຫຼັກລວດລາຍຕ່າງໆກໍຄວນຈະອະນຸຍາດໃຫ້ສົ່ງອອກເລີຍຍິ່ງເປັນການດີທັງນີ້ກໍເພື່ອເປັນການເພີ່ມຄຸນຄ່າໃຫ້ຜະລິດຕະພັນໄມ້ລາວສາມາດແຂ່ງຂັນກັບສາກົນຊ່ວຍຜູ້ປະກອບພາຍໃນທັງຈະເປັນການສ້າງລາຍຮັບເຂົ້າປະເທດຢ່າງມະຫາສານນຳອີກ.

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

ໝາຍເຫດ: ແຊຣໄດ້ ແຕ່ຫ້າມກັອບປີ້ຂ່າວ

แชร์