ຫ້ອງການຄຸ້ມຄອງ ແລະ ບໍລິການຕົວເມືອງ (ຄບຕ) ນະຄອນຫລວງວຽງຈັນ ຮ່ວມກັບກົມເຄຫາ ແລະ ຜັງເມືອງ ກະຊວງໂຍທາທິການ ແລະ ຂົນສົ່ງ ຈັດກອງປະຊຸມປຶກສາຫາລືເພື່ອແລກປ່ຽນຂໍ້ມູນ, ບົດຮຽນ, ປະສົບການ ແລະ ປຶກສາຫາລືບັນຫາຄົງຄ້າງ ກ່ຽວກັບວຽກງານຄຸ້ມຄອງ, ພັດທະນາ ແລະ ອະນຸລັກສິ່ງແວດລ້ອມຕົວເມືອງ ໂດຍສະເພາະບັນຫາການຈັດການຂີ້ເຫຍື້ອ, ນ້ຳເສຍ, ນ້ຳຖ້ວມຂັງ, ການຈັດລະບຽບຕົວເມືອງ ແລະ ການຍົກລະດັບຄຸນນະພາບສິ່ງແວດລ້ອມໃນເຂດຕົວເມືອງ ໃນວັນທີ 16 ມິຖຸນາ 2026.

 

ໂອກາດນີ້, ທ່ານ ປັນຍາ ມະນີວົງ ຫ້ອງການຄຸ້ມຄອງ ແລະ ບໍລິການຕົວເມືອງ ນະຄອນຫລວງວຽງຈັນ ໄດ້ລາຍງານສະພາບການຈັດຕັ້ງປະຕິບັດວຽກງານ, ບັນຫາ ແລະ ຂໍ້ຫຍຸ້ງຍາກຕ່າງໆ ທີ່ພວມຜະເຊີນ ພ້ອມທັງໄດ້ສະເໜີຫລາຍແນວທາງເພື່ອຮ່ວມກັນແກ້ໄຂບັນຫາດ້ານສິ່ງ ແວດລ້ອມ, ການຈັດການຂີ້ເຫຍື້ອ, ການປັບປຸງລະບົບລະບາຍນ້ຳ ແລະ ການຈັດລະບຽບຕົວເມືອງໃຫ້ດີຂຶ້ນ. ການພົບປະປຶກສາຫາລືໃນຄັ້ງນີ້, ບໍ່ພຽງແຕ່ໄດ້ຊ່ວຍໃຫ້ທັງສອງຝ່າຍເຂົ້າໃຈສະພາບຕົວຈິງ ຂອງວຽກງານຫລາຍຂຶ້ນເທົ່ານັ້ນ, ແຕ່ຍັງໄດ້ວາງພື້ນຖານອັນດີໃນການເສີມສ້າງການພົວພັນ, ການປະສານງານ ແລະ ການສະໜັບສະໜູນຊ່ວຍເຫລືອຊຶ່ງກັນ ແລະ ກັນ ລະຫວ່າງສູນກາງ ແລະ ທ້ອງຖິ່ນ ໃນອະນາຄົດ.

 

ໃນໂອກາດດຽວກັນ, ທ່ານ ບຸນຕາ ອ່ອນນາວົງ ຫົວໜ້າກົມເຄຫາ ແລະ ຜັງເມືອງ ກະຊວງໂຍທາທິການ ແລະ ຂົນສົ່ງ ໄດ້ກ່າວອີກວ່າ: ການພົບປະຄັ້ງນີ້, ຖືເປັນນິມິດໝາຍ ແລະ ຂີດໝາຍສຳຄັນ ໃນການປັບປຸງກົນໄກ ແລະ ວິທີການເຮັດວຽກ ລະຫວ່າງ ກົມເຄຫາ ແລະ ຜັງເມືອງ ກັບ ບັນດາ ຄບຕ ແລະ ອົງການປົກຄອງ ແລະ ບໍລິຫານຕົວເມືອງ ຂັ້ນແຂວງ ໃຫ້ມີຄວາມໃກ້ຊິດ ແລະ ມີປະສິດທິຜົນຫລາຍຂຶ້ນ. ການພົບປະຄັ້ງນີ້, ສອງຝ່າຍໄດ້ສະແດງຄວາມຕັ້ງໃຈຮ່ວມກັນ ທີ່ຈະສືບຕໍ່ເສີມສ້າງການປະສານງານ, ການແລກປ່ຽນຂໍ້ມູນ ແລະ ການຮ່ວມມືໃນທຸກດ້ານ ເພື່ອຮ່ວມກັນແກ້ໄຂບັນຫາຕົວເມືອງ, ປັບປຸງຄຸນນະພາບສິ່ງແວດລ້ອມ ແລະ ພັດທະນາຕົວເມືອງຂອງ ສປປ ລາວ ໃຫ້ສະອາດ, ຂຽວງາມ, ເປັນລະບຽບ, ທັນສະໄໝ ແລະ ຍືນຍົງ ຕາມທິດທາງການພັດທະນາຂອງພັກ ແລະ ລັດ.