ບໍ່ແກ້ວ ຈັດຂະບວນແຫ່ພຣະໄຕຣປິດົກ ຢ່າງຍິ່ງໃຫຍ່ອະລັງການ ທີ່ບ້ານໃຫຍ່ສີ ເມືອງງາມ ເມືອງຕົ້ນເຜິ້ງ

​ຖືເປັນອີກໜຶ່ງພາບປະຫວັດສາດແຫ່ງຄວາມເຫຼື້ອມໃສສັດທາໃນພຣະພຸດທະສາສະໜາ ຂອງພີ່ນ້ອງຊາວເມືອງຕົ້ນເຜິ້ງ ເມື່ອບໍ່ດົນມານີ້ ໄດ້ມີການຈັດງານບຸນມະຫາກຸສົນອັນຍິ່ງໃຫຍ່ "ຂະບວນແຫ່ພຣະໄຕຣປິດົກ" ຂຶ້ນຢູ່ທີ່ວັດບ້ານໃຫຍ່ສີເມືອງງາມ, ເມືອງຕົ້ນເຜິ້ງ, ແຂວງບໍ່ແກ້ວ ໂດຍມີຄະນະສົງ, ອົງການປົກຄອງທຸກຂັ້ນ ຕະຫຼອດຮອດພໍ່ແມ່ປະຊາຊົນ ແລະ ພຸດທະສາສະນິກະຊົນທັງໃກ້ ແລະ ໄກ ເຂົ້າຮ່ວມຢ່າງຫຼວງຫຼາຍ.
 
​ບັນຍາກາດພາຍໃນງານແມ່ນເຕັມໄປດ້ວຍຄວາມສິຣິມຸງຄຸນ ແລະ ຄວາມເບີກບານມ່ວນຊື່ນໃນບຸນກຸສົນ ໂດຍມີຂະບວນແຫ່ຄຳພີພຣະໄຕຣປິດົກໂດຍມີຄະນະພຣະພິກສຸສົງ ແລະ ສາມະເນນ. ຂະບວນດັ່ງກ່າວໄດ້ເຄື່ອນຜ່ານໃຈກາງໝູ່ບ້ານ ເພື່ອໃຫ້ປະຊາຊົນໄດ້ຮ່ວມອະນຸໂມທະນາສາທຸການ ແລະ ກາບໄຫວ້ບູຊາ ເພື່ອຄວາມເປັນສິຣິມຸງຄຸນ, ຄວາມສະຫງົບສຸກຮົ່ມເຢັນຂອງຄອບຄົວ ກໍ່ຄືຂອງບ້ານເມືອງ. ​"ການແຫ່ ແລະ ພິມພຣະໄຕຣປິດົກ ຖືເປັນການສືບທອດອາຍຸພຣະພຸດທະສາສະໜາ ໃຫ້ຍືນຍົງຄົງຕົວຄູ່ຊາດລາວຕະຫຼອດໄປ"
 
​ການຈັດຂະບວນແຫ່ໃນຄັ້ງນີ້ ບໍ່ພຽງແຕ່ເປັນການສະແດງອອກເຖິງຄວາມສາມັກຄີອັນແໜ້ນແຟ້ນ ແລະ ຮີດຄອງປະເພນີອັນດີງາມຂອງທ້ອງຖິ່ນເທົ່ານັ້ນ ແຕ່ຍັງເປັນການຮ່ວມແຮງຮ່ວມໃຈກັນໃນການປົກປັກຮັກສາ ຄຳສອນອັນບໍລິສຸດຂອງອົງສົມເດັດພຣະສຳມາສຳພຸດທະເຈົ້າ ໃຫ້ຄົງຢູ່ຄູ່ກັບສັງຄົມລາວສືບໄປ.
​ ໂດຍ:ເງິນຫລົງ ຈິດພູວົງ

แชร์