ການສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ 1 ມິຖຸນາ ໄດ້ຈັດຂຶ້ນທຸກໆປີ ເປັນວັນແຫ່ງຄວາມສຸກ, ຄວາມເບີກບານມ່ວນຊື່ນຂອງເດັກທັງເປັນໂອກາດທີ່ທົ່ວສັງຄົມໄດ້ຮ່ວມກັນທົບທວນ ແລະຢືນຢັນຄວາມສໍາຄັນຂອງການສົ່ງເສີມ ແລະປົກປ້ອງສິດທິເດັກ, ສ້າງສະພາບແວດລ້ອມທີ່ປອດໄພ ອົບອຸ່ນ ແລະ ເປັນມິດເພື່ອໃຫ້ເດັກທຸກຄົນໄດ້ເຕີບໃຫຍ່ຢ່າງມີຄຸນນະພາບ, ເດັກນ້ອຍທຸກຄົນແມ່ນຄວາມຫວັງແມ່ນກໍາລັງສໍາຄັນ ແລະ ອະນາຄົດຂອງຊາດ ເປັນຜູ້ສືບທອດ ແລະ ເປັນກຳລັງຫຼັກແຫຼ່ງໃນການພັດທະນາປະເທດໃນອະນາ ຄົດ ພ້ອມທັງເປັນການປູກຈິດສຳນຶກໃຫ້ເດັກມີຄວາມຮັບຜິດຊອບ ຮັກໃນການປົກປັກຮັກສາທຳມະຊາດ ແລະສິ່ງແວດລ້ອມຕັ້ງແຕ່ຍັງນ້ອຍ ເດັກປຽບເໝືອນຕົ້ນກ້າທີ່ຕ້ອງການດູແລອົບຮົມສັ່ງສອນຈາກພໍ່-ແມ່, ຜູ້ປົກຄອງ, ຄູ-ອາຈານ ແລະ ສັງຄົມ ເພື່ອສ້າງພູມຄຸ້ມກັນໃຫ້ເດັກຫ່າງໄກຈາກສິ່ງທີ່ບໍ່ດີ ສ້າງໃຫ້ເຂົາເຈົ້າເຕີບໃຫຍ່ ເປັນຊັບພະຍາກອນມະນຸດທີ່ມີຄຸນນະພາບ ເປັນຜູ້ສືບທອດໃນອະນາຄົດ.

 

ໃນພິທີ, ທ່ານ ນາງ ໄຊທິດາ ພົມວິຫານ ໄດ້ໃຫ້ຮູ້ປະຫວັດຄວາມເປັນມາ, ການສະເຫຼີມສະຫຼອງວັນເດັກນ້ອຍສາກົນຊຶ່ງແຕ່ລະປີແມ່ນເຫດການທີ່ສໍາຄັນຕໍ່ເດັກ ຈຸດປະສົງແນໃສ່ຊຸກຍູ້ສົ່ງເສີມພັດທະນາ ແລະ ປົກປ້ອງເດັກໃນທົ່ວໂລກໃຫ້ເດັກມີຄວາມເປັນຢູ່ທີ່ດີ ແລະການດໍາເນີນກິດຈະກໍາຕ່າງໆ ເພື່ອເດັກ. ຍ້ອນເຫັນໄດ້ຄວາມສໍາຄັນຂອງເດັກທີ່ເປັນອະນາຄົດຂອງຊາດເປັນເມັດພຶດເປັນໜໍ່ແໜງທຶນຮອນແຫ່ງຊີວິດໃນມື້ນີ້ເພື່ອກາຍເປັນອະນາຄົດອັນແຈ່ມໃສຂອງປະເທດຊາດໃນມື້ໜ້າ.ຄອບຄົວກໍແມ່ນຈຸດໜຶ່ງທີ່ຕ້ອງໄດ້ເອົາໃຈໃສ່ໃນການພັດທະນາຊີວິດຂອງເດັກໃນການເຂົ້າເຖິງການບໍລິການທາງດ້ານສຸຂະພາບ ແລະ ເຂົ້າຮ່ວມກິດຈະກໍາອື່ນໆ ຕາມຄວາມສາ ມາດ, ບັນດາປະຊາຊາດໃນທົ່ວໂລກຈຶ່ງໄດ້ສະເຫຼີມສະຫຼອງວັນເດັກນ້ອຍສາກົນຕາມເງື່ອນໄຂ ແລະ ສະພາບຕົວຈິງຂອງປະເທດຕົນ. ໃນພິທີໄດ້ມີກິດຈະກໍາຖາມ-ຕອບ, ຮ້ອງເພັງສະແດງຄວາມສາມາດຂອງເດັກ ແລະມອບຂອງຂວັນໃຫ້ເດັກຕື່ມອີກ.

ຂ່າວ-ພາບ: ສນຊ