ທ່ານ ກົງໃຈ ສີດາວົງ ຫົວໜ້າພະແນກກະສິກຳ ແລະສິ່ງແວດລ້ອມແຂວງ ໄດ້ລາຍ​ງານວ່າ: ການຈັດກິດຈະກຳສະເຫລີມສະຫລອງວັນປູກຕົ້ນໄມ້ແຫ່ງຊາດ ວັນທີ​ 1 ມິຖຸນາ, ວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ ປະຈຳປີ 2026​ ຄັ້ງນີ້​ ໂດຍແມ່ນປະ​ຕິບັດຕາມຄຳຂວັນ "ຊົມເຊີຍວັນປູກຕົ້ນໄມ້ແຫ່ງຊາດ ວັນທີ 1 ມີຖຸນາ 2026 ຄົບຮອບ 46 ປີ ຢ່າງສຸດໃຈ, ຮ່ວມແຮງຮ່ວມໃຈຊ່ວຍກັນປູກຕົ້ນໄມ້ ໃຫ້ໄດ້ຢ່າງໜ້ອຍ ໜຶ່ງຕົ້ນຕໍ່ຄົນຕໍ່ປີ, ຈົ່ງຊ່ວຍກັນປູກຕົ້ນໄມ້ ໃຫ້ກາຍເປັນປ່າ ເພື່ອເປັນສິນຄ້າ ແລະ ປະກອບສ່ວນໃນການຮັກສາສິ່ງແວດລ້ອມ, ຫລຸດຜ່ອນມົນລະຜິດທາງອາກາດ".​

 

ສໍາລັບກິດຈະກຳສະເຫລີມສະຫລອງວັນປູກຕົ້ນໄມ້ແຫ່ງຊາດ ທົ່ວແຂວງອັດຕະປື ໄດ້ກຳນົດເນື້ອທີ່ຈະປູກທັງໝົດ 9,73 ເຮັກຕາ, ເທົ່າກັບ 7.068 ເບ້ຍ, ຊຶ່ງໄດ້ເລີ່ມຈັດຕັ້ງປະຕິ​ບັດ ມາແຕ່ວັນທີ 29 ພຶດສະພາເປັນຕົ້ນມາ ແຕ່ລະເມືອງ​ໄດ້ກຳນົດເນື້ອທີ່​ ທີ່ຈະປູກໃນສະຖານທີ່ສໍາຄັນຂອງແຕ່ລະເມືອງ.​

ສໍາລັບພະ​ແນກກະສິກຳ ແລະ ສິ່ງແວດລ້ອມແຂວງ ຮ່ວມກັບ ຫ້ອງການກະສິກຳ ແລະ ສິ່ງແວດ​ລ້ອມເມືອງສາມັກຄີໄຊ ແມ່ນໄດ້ກຳນົດເອົາ ທ່າຜາມໄຊ ແຄມນໍ້າເຊກອງ, ຊຶ່ງຕັ້ງຢູ່ບ້ານເຊກອງ ເມືອງສະມັກຄີໄຊ ດ້ວຍການປູກຕົ້ນໄມ້ ປະເພດໄມ້ຍາງ ຕາມແຜນລຽບທັງສອງຝັ່ງເຊກອງ ແລະ ຝັ່ງບ້ານເຊກະໝານ 313 ຕົ້ນ, ສະເພາະໃນມື້ນີ້ ແມ່ນຈະປູກໃນຈໍານວນ 46 ຕົ້ນ ຊຶ່ງພໍດີກັບວັນຄົບຮອບ 46 ປີ ວັນປູກຕົ້ນໄມ້ແຫ່ງຊາດ, ທັງເປັນການຜັນຂະຫຍາຍເນື້ອໃນຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 10 ຂອງແຂວງ (2026-2030) ທີ່ໄດ້ກຳ​ນົດໄວ້ວ່າ: ສ້າງແຂວງອັດຕະປື ໃຫ້ເປັນແຂວງສີຂຽວ, ສະເໜ່, ສະຫງົບ,​ ປອດໄພ ກາຍເປັນເຂດບໍລິການດ້ານການທ່ອງທ່ຽວພາຍໃນພາກພື້ນ, ອະນຸພາກພື້ນ ພັດທະນາເສດຖະກິດເອກະລາດເປັນເຈົ້າຕົນເອງ ຕາມທ່າແຮງບົ່ມຊ້ອນຂອງແຂວງຢ່າງມີຈຸດສຸມ ມີຄຸນະພາບ,​ ມີຄວາມສົມດູນ ແລະ ຍືນຍົງ.​

 

ນອກຈາກການປູກໃນພິທີດັ່ງກ່າວນີ້ແລ້ວ ຍັງຈະໄດ້ສືບຕໍ່ປະສານສົມທົບກັບອຳນາດການປົກຄອງແຕ່ລະຂັ້ນ ກໍຄືຫ້ອງການກະສິກຳ ແລະ ສິ່ງແວດລ້ອມ 5 ເມືອງ, ຜູ້ປະກອບການ ແລະ ບັນດາໂຄງການລົງທຶນຂອງພາກເອກະ ຊົນສືບຕໍ່ຈັດຕັ້ງປະຕິບັດການປູກ ແລະ ຟື້ນຟູປ່າ ຕາມແຜນທີ່ໄດ້ກຳນົດໄວ້ໃນປີ 2026 ໃຫ້ສໍາເລັດຕາມແຜນການ.

 

ທັງນີ້ກໍເພື່ອໃຫ້ສະພາບແວດລ້ອມສົດໃສ, ລະບົບນິເວດມີຄວາມສົມດູນ, ປ່າໄມ້ ແລະ ຫ້ວຍນ້ຳລຳເຊເຕັມໄປດ້ວຍຊີວະນາໆພັນເພີ່ມອັດຕາການປົກຫຸ້ມ ຂອງປ່າໄມ້ໃຫ້ໄດ້ 70% ໃນທົ່ວປະເທດແນໃສ່ຄວາມອຸດົມສົມບູນຂອງດິນ, ນ້ຳ, ອາກາດຕະຫລອດຮອດການນຳໃຊ້ປ່າໄມ້ໃຫ້ເກີດປະໂຫຍດສູງສຸດດ້ວຍການປູກ ແລະບົວລະບັດຮັກສາໃຫ້ເຕີບໃຫຍ່ຂະຫຍາຍຕົວ.

ຂ່າວ: ມະນີວອນ