ໃນພິທີ​ ທ່ານ ຄູນສະຫວັນ ເວັນມະສອນ ຮອງເລຂາພັກເມືອງ ປະທານຄະນະກຳມະການປົກ​ຄອງ​ ເມືອງສາ​ມັກຄີໄຊ ໄດ້ລາຍງານໃຫ້ຮູ້ວ່າ: ຕາແສງໂພນໄຊສະອາດ ມີເນື້ອທີ່ 22,17 ກິໂລຕາ​ແມັດ ປະກອບມີ 6 ບ້ານ ຄື: ບ້ານຮະລາງ, ບ້ານກະໂສມ, ບ້ານໂສກຄຳ, ບ້ານສອກ, ບ້ານໄຊໂພສີ ແລະ ບ້ານໃຫຍ່ໝື່ນຫົວເມືອງ, ມີພົນລະເມືອງ 8,844 ຄົນ ຍິງ 4,289 ຄົນ, ການສ້າງຕັ້ງຕາແສງໃນຄັ້ງນີ້ ກໍເພື່ອແນໃສ່ປັບປຸງກົງຈັກການຈັດຕັ້ງ ແລະ ຍົກລະດັບປະສິດ​ທິພາບການຄຸ້ມຄອງບໍລິຫານລັດຢູ່ຮາກຖານໃຫ້ມີຄວາມເຂັ້ມແຂງ,​ ເຊິ່ງໄດ້ມີ​ການກຳນົດກົງຈັກການຈັດ​ຕັ້ງຢ່າງລະອຽດ ເພື່ອຮັບປະກັນການເຄື່ອນໄຫວວຽກງານ ເປັນຕົ້ນ ​ດ້ານການຈັດຕັ້ງພັກສ້າງຕັ້ງຄະນະ​ພັກຮາກ​ຖານຕາແສງ,​ ເຊິ່ງປະກອບມີ 1 ຄະນະພັກຮາກ​ຖານ ແລະ​ ມີ 8 ໜ່ວຍພັກຂຶ້ນກັບ,​ ດ້ານກົງຈັກບໍລິ ຫານ ປະກອບມີ 5 ໜ່ວຍງານວິຊາສະເພາະ ຄື: ໜ່ວຍງານບໍລິຫານ- ປົກຄອງ, ເສດຖະກິດ​-ການເງິນ, ວັດ​ທະນະທຳ-ສັງຄົມ, ປກຊ-ປກສ ແລະ ໜ່ວຍງານພັກ-ອົງການຈັດຕັ້ງມະຫາຊົນ, ໂດຍມີພະນັກງານປະ​ຈຳການທັງໝົດ 13 ທ່ານ.

 

ໃນພິທີ​ ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງບຸກຄະລາກອນ,​ ໃນນີ້ໄດ້ແຕ່ງຕັ້ງ ທ່ານ ຈີດຕະກອນ ກອງບົວຄຳ ກຳມະການພັກເມືອງ ເປັນປະທານຄະນະກຳມະການປົກຄອງຕາແສງໂພນໄຊສະອາດ, ທ່ານ ພັຕ ດວງໃຈ ຜາລີວັນ ແລະ ທ່ານ ຄານມາໄລ ໄຊຍະສອນ ເປັນຮອງປະ​ທານ ພ້ອມດ້ວຍຄະນະໜ່ວຍງານວິຊາສະເພາະອີກຈໍານວນໜຶ່ງ.

 

ໃນຕອນທ້າຍພິທີ ຄະນະປະທານໄດ້ຮ່ວມກັນຕັດແຖບຜ້າ,​ ເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເລີ່ມຕົ້ນປະຕິບັດງານຂອງຕາແສງໂພນໄຊສະອາດຢ່າງເປັນທາງ​ການ

ຂ່າວ-ພາບ: ຂາວພອນ