ທ່ຽວຊົມວັງນໍ້າຢ້ຽມ ເມືອງຫີນບູນ ແຂວງຄໍາມ່ວນ

ແຂວງຄໍາມ່ວນເປັນແຂວງໜຶ່ງທີ່ມີຊື່ສຽງເປັນທີ່ນິຍົມຂອງນັກທ່ອງທ່ຽວທັງໃກ້ ແລະໄກຍ້ອນຄວາມງົດງາມຂອງທຳມະຊາດທີ່ໂອບອ້ອມໄປດ້ວຍພູຜາແລະສາຍ ນ້ຳອັນໃສເຢັນຈົນກາຍເປັນສະຫວັນຂອງນັກທ່ອງທ່ຽວທີ່ຢູ່ຫ່າງຈາກນະຄອນຫຼວງວຽງຈັນພຽງແຕ່ 350 ກິໂລ ແມັດເທົ່ານັ້ນ ແລະຍັງເປັນທີ່ ນິຍົມໃນການພັກຜ່ອນທ້າຍອາທິດດ້ວຍການທ່ອງທ່ຽວປະຈົນໄພ ຫຼາຍໆຢ່າງ,ບໍ່ວ່າຈະເປັນການລ່ອງເຮືອຊົມທໍາມະຊາດ, ການປິນຜາ, ຢ່າງເລາະຕາມແມ່ນໍ້າລໍາເຊ ຫຼົງໄຫຼ ໄປກັບທຳມະຊາດພູຜາອັນງົດງາມ ເພື່ອຜ່ອນຄາຍອາລົມຂອງຜູ້ມາ ທ່ຽວ.

ວັງນໍ້າຢ້ຽມເປັນສະຖານທີ່ທ່ອງທ່ຽວທາງທໍາມະຊາດທີ່ສວຍສົດງົດງາມອ້ອມຮອບບໍລິເວນວັງນໍ້າ ດັ່ງກ່າວເຕັມໄປດ້ວຍພູຜາທີ່ສູງຊັນແລະປ່າໄມ້ອັນດົກໜາຂຽວງາມອຸ່ມທຸ່ມປົກຄຸມຫຸ້ມຫໍ່ຕະຫຼອດປີເຮັດໃຫ້ອາກາດເຂດນີ້ມີຄວາມສົດຊື່ນຊຸ່ມເຢັນດີເໝາະແກ່ການມາພັກຜ່ອນຢ່ອນໃຈ ແລະກິນເຂົ້າປ່າສາມັກຄີ, ໂດຍໄປ-ມາຢ່າງສະດວກສະບາຍແລະບໍ່ໄດ້ເສຍຄ່າບໍລິການຫຍັງມີແຕ່ຄ່າອາຫານ ແລະເຄື່ອງດື່ມພາຍໃນບ່ອນທ່ອງທ່ຽວໃນລາຄາປົກກະຕິຈຶ່ງເຮັດໃຫ້ນັກທ່ອງທ່ຽວທັງພາຍ ໃນ ແລະຕ່າງປະເທດເຂົ້າມາທ່ຽວຊົມເປັນປະຈໍາ.

ວັງນໍ້າຢ້ຽມຕັ້ງຢູ່ເຂດເມືອງຫີນບູນ ແຂວງຄໍາມ່ວນ ຢູ່ຫ່າງຈາກເມືອງຫີນບູນໄປ 39 ກິໂລແມັດ ເປັນສາຍນໍ້າທີ່ໄຫຼມາຈາກຂຸນກອງ ແລງ ແລະເປັນວັງນໍ້າສີຂຽວສົດໃສໄຫຼເຢັນຕະຫຼອດປີແລະມີໝູ່ປາລ່ອງລອຍຢູ່ຕາມວັງນໍ້າປະກອບມີສະຖານທີ່ບໍລິການລົງອາບນໍ້າ, ສະຖານທີ່ໃຫ້ນັ່ງຊົມວິວແລະພັກຜ່ອນຢ່ອນໃຈຕະຫຼອດຮອດຮ້ານອາຫານກິນດື່ມມີອາຫານຫຼາກຫຼາຍຊະນິດໄວ້ຄອຍບໍລິການບັນດານັກທ່ອງທ່ຽວທີ່ມາທ່ຽວຊົມຢ່າງສະດວກສະບາຍ, ຊຶ່ງແຕ່ລະອາທິດໄດ້ມີຜູ້ຄົນຫຼັ່ງໄຫຼມາທ່ຽວຊົມແລະລົງອາບນໍ້າແຊ່ເຢັນບໍ່ໄດ້ຂາດ.

ໂດຍ: ວົງມະນີ

• 06/05/2019