#ໃນ​ 3 ເດືອນ​ ງວດ​ I ປີ​ 2026​,​ ສ່ວຍສາອາກອນປະຈໍາແຂວງຈໍາປາສັກ​ ສາມາດເກັບລາຍຮັບເຂົ້າງົບປະມານໄດ້ທັງໝົດ 449 ຕື້ 96 ລ້ານກີບ,​ ທຽບກັບ​ 30,99% ຂອງແຜນການປີ. ວຽກງານຄຸ້ມຄອງການເກັບຄ່າທຳນຽມທາງໃນ 3 ເດືອນ ສາມາດເກັບໄດ້ 22.228 ຄັນ,​ ເປັນເງິນ 5 ຕື້ 51 ລ້ານກີບ,​ ຄ່າປັບໃໝ 695 ລ້ານກີບ,​ ເທົ່າກັບ 68,90% ຂອງແຜນການປີ.​ ວຽກງານ​ປ້ອນຂໍ້ມູນຕອນດິນເຂົ້າລະບົບຄຸ້ມຄອງເກັບອາກອນທີ່ດິນຕາມກົດໝາຍ 35,​ ໃນງວດ I ປີ​ 2026, ປັກໝຸດໄດ້​ 1.635 ຕອນ,​ ປ້ອນເຂົ້າໄດ້ທັງໝົດ 280.937 ຕອນ,​ ເທົ່າ​ກັບ​ 99,18% ຂອງຂໍ້ມູນອາກອນ.​ ສໍາລັບທິດທາງແຜນການ 3 ເດືອນ​ ງວດ​ II ປີ 2026​, ສ່ວຍສາອາກອນປະຈໍາແຂ​ວງ ຈະສຸມໃສ່ຈັດເກັບລາຍຮັບໃຫ້ໄດ້ທັງໝົດ 363 ຕື້ກີບ​ ເພື່ອສູ້ຊົນຈັດເກັບລາຍຮັບງົບປະມານ​ ໃຫ້ໄດ້ຕາມແຜນການ,​ ຄາດຄະເນໝົດປີ 2026​ ແມ່ນ 1.​500 ຕື້ກີບ.​

 

#ຂໍ້ມູນ​ດັ່ງກ່າວນີ້ ຖືກລາຍງານໃນໂອກາດທີ່ສ່ວຍສາອາກອນປະຈໍາແຂວງຈໍາປາສັກ ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານ​ ປະຈຳ 3 ເດືອນ​ ງວດ​ I ປີ​ 2026​ ແລະ ວາງທິດທາງແຜນການ 3 ເດືອນ ງວດ​ II ທີ່ຈັດຂຶ້ນໃນວັນທີ 2 ເມສາ 2026​ ຢູ່ຫ້ອງປະຊຸມພະແນກການເງິນແຂວງ (ຕຶກບີ)​ ໂດຍການເປັນປະທານຂອງທ່ານ ປອ.​ອຸ່ນຄຳ ກອງຈຳປາ ຫົວໜ້າສ່ວຍສາອາກອນປະຈຳແຂວງ.​ ມີການນໍາສ່ວຍສາອາກອນປະຈໍາແຂວງ ພ້ອມດ້ວ6ຍພະນັກງານວິຊາການ​ທີ່​ກ່ຽວຂ້ອງ​ ເຂົ້າຮ່ວມ.

 

#ໃນກອງປະຊຸມ ທ່ານ​ ຄໍາພັນ​ ນວນປະເສີດ​ ຮອງຫົວໜ້າສ່ວຍສາອາກອນປະຈໍາແຂວງ​ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານສ່ວຍສາອາກອນ​ ປະຈໍາ​ແຂວງ​ ໃນ​ 3 ເດືອນ​ ງວດ​ I ປີ 2026​ ເຊິ່ງຍົກໃຫ້ເຫັນຜົນງານດ້ານ​ດີ,​ ດ້ານ​ອ່ອນ,​ ຂໍ້ຄົງຄ້າງ​ ແລະ​ ບາງ​ບົດຮຽນ​ທີ່ຖອດຖອນໄດ້ ໃນການຈັດຕັ້ງນໍາພາວຽກ​ງານແຕ່ລະດ້ານ ນັບແຕ່ດ້ານການເມືອງ​ -​ ແນວຄິດ, ດ້ານກົງຈັກການຈັດຕັ້ງ, ບຸກຄະລາກອນ​ ແລະ​ ບໍລິຫານ - ການເງິນ, ວຽກງານກວດກາພາຍໃນ, ວຽກງານຜົນການກວດສອບ​ -​ ກວດກາ​ ແລະ​ ວຽກງານຈັດເກັບລາຍຮັບເຂົ້າງົບປະມານ,​ ວຽກງານຄຸ້ມຄອງເກັບລາຍຮັບ,​ ອາກອນມູນຄ່າເພີ່ມ, ອາກອນຊົມໃຊ້ ແລະ​ ໃບເກັບເງິນ,​ ພ້ອມ​ນີ້,​ ກໍໄດ້ຜ່ານທິດທາງແຜນການ,​ ມາດຕະການໃນ​ການຈັດຕັ້ງ​ປະຕິບັດ​ ໃນ​ 3 ເດືອນ​ ປະຈໍາ​ງວດ​ II ປີ 2026​ ເພື່ອຮັບປະກັນການຈັດຕັ້ງປະຕິບັດແຜນການ ປີ​ 2026​ ໃຫ້ບັນລຸຕາມແຜນການທີ່ວາງໄວ້.​

 

#ຕໍ່ມາ,​ ຜູ້ເຂົ້າຮ່ວມກໍໄດ້ປະກອບຄຳເຫັນໃສ່ບົດສະຫຼຸບ​ ແລະ​ ທິດທາງ​ແຜນການ​ຢ່າງກົງໄປກົງມາ​ ເຮັດໃຫ້ມີເນື້ອໃນເລິກເຊິ່ງ​ ແນໃສ່ການຈັດຕັ້ງປະຕິບັດການເກັບລາຍຮັບງົບປະມານຢ່າງມີປະສິດທິຜົນ.​ ຕອນທ້າຍ​ກອງປະຊຸມ,​ ທ່ານ ປອ.​ອຸ່ນຄຳ ກອງຈຳປາ ຫົວໜ້າສ່ວຍສາອາກອນປະຈຳແຂວງ​ ກໍໄດ້​ມີຄໍາເຫັນໂອ້ລົມຊີ້ທິດເຍືອງທາງ ເພື່ອເປັນບ່ອນອີງໃນການຈັດຕັ້ງປະຕີບັດວຽກງານສ່ວຍສາອາກອນປະຈໍາແຂວງ​ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.​