ອັດຕະປື ເສັງຄັດເລືອກເອົາລັດຖະກອນຄູ

ພະແນກສຶກສາທິການ ແລະກີລາແຂວງອັດຕະປືໄດ້ເປີດການສອບເສັງຄັດເລືອກເອົາລັດຖະກອນ ຄູ ແລະບໍລິຫານໃໝ່ປະຈຳສົກປີ 2018-2019 ຂຶ້ນໃນວັນທີ 30 ເມສາ ຜ່ານມາ ທີ່ຫ້ອງປະຊຸມຂອງ ພະແນກສຶກສາທິການ ແລະກີລາ ແຂວງ ໂດຍພາຍໃຕ້ການເປັນປະ ທານຂອງທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະ ກີລາແຂວງອັດຕະປື, ມີທ່ານ ສົມຫວັງນາມສີນາ ຄະນະພະແນກພາຍໃນ ແຂວງອັດຕະປື, ມີຕາງໜ້າກະຊວງ ສຶກສາທິການ ແລະກີລາ, ພ້ອມດ້ວຍ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄໍາພູນ ແກ້ວມາລາ ຫົວ ໜ້າພະແນກສຶກສາທິການ ແລະ ກີລາແຂວງອັດຕະປືກ່າວວ່າ: ການສອບເສັງຄັ້ງນີ້ຄັດເລືອກເອົາລັດຖະກອນຄູ ແລະບໍລິຫານໃໝ່ຄັ້ງນີ້ ເປັນການປະຕິບັດຕາມລະບຽບກົດ ໝາຍຂອງລັດຖະກອນ, ເພື່ອເຮັດ ໃຫ້ການບັນຈຸລັດຖະກອນຄູໃໝ່ ຂອງຂະແໜງການສຶກສາ ແລະກີ ລາພາຍໃນແຂວງອັດຕະປື ຖືກຕ້ອງຕາມລະບຽບຫຼັກກການ, ຮັບ ປະການຄວາມສະເໝີພາບ, ໂປ່ງໃສ, ຍຸດຕິທຳ ແລະຄັດໄດ້ຜູ້ທີ່ຮຽນດີ-ຮຽນເກັ່ງ, ມີຄວາມຮູ້ຄວາມສາມາດທີ່ແທ້ຈິງ, ມີຄຸນສົມບັດ, ມີຄວາມ ຮັກອາຊີບຢ່າງແທ້ຈິງ ແລະສອດ ຄ່ອງກັບຄວາມຕ້ອງການຄູຕົວຈິງ ໃນແຕ່ລະຊັ້ນ, ແຕ່ລະສາຍຮຽນແລະລາຍວິຊາທີ່ຍັງຂາດຄູ ໂດຍສະ ເພາະໂຮງຮຽນທີ່ຢູ່ເຂດຫ່າງໄກ ສອກຫຼີກ.

ສໍາລັບຕົວເລກລັດຖະກອນຄູ ແລະບໍລິຫານຂະແໜງການສຶກສາ ແລະກີລາແຂວງອັດຕະປື ສົກປີນີ້ ຕາມຕົວເລກແບ່ງປັນຈາກກະຊວງສຶກສາທິການ ແລະກີລາມີທັງໝົດ 38 ໂກຕາ ໃນນັ້ນລັດຖະກອນຄູ 36 ໂກຕາ ແລະບໍລິຫານ 2ໂກຕາ.ສຳລັບຕົວເລກລັດຖະກອນຄູ 36 ໂກຕາ ປະກອບມີຄູໂຄງການອີຊີອີ 6 ໂກຕາ, ຄູໄພພິບັດເມືອງສະໜາມ ໄຊ 12 ໂກຕາ ແລະຄູອະຊີວະໂຮງຮຽນເຕັກນິກ-ວິຊາຊີບ 2 ໂກຕາໃນນັ້ນມີຄູຟິຊິກ, ຄະນິດສາດ, ປະ ຖົມ, ອະນຸບານ ແລະສັງຄົມ, ຊ່າງ ໄມ້ ແລະຕັດຫຍິບ, ສ່ວນໂກຕາບໍ ລິຫານມີໄອທີ ແລະການເງິນ.ສ່ວນການສອບເສັງຄັດເລືອກຄັ້ງນີ້ມີນັກ ສອບເສັງທັງໝົດ 69 ຄົນ, ຍິງ 37 ຄົນ, ຮູບແບບການສອບເສັງມີພາກທິດສະດີຄວາມຮູ້ດ້ານວິຊາສິເພາະ, ການສຳພາດ ແລະການສອນຕົວຈິງ.

ໂດຍ: ສຸກອຳໄພ

แชร์