ມູນຄ່າການຄ້າລາວ-ຈີນເພີ່ມຂື້ນ 14,9% ປີແລ້ວບັນລຸເກືອບ 30 ພັນຕື້ກີບ

  ການຮ່ວມມືລະຫວ່າງ ສປປ ລາວ ແລະ ສປ ຈີນ ໃນຂົງເຂດຕ່າງໆເປັນຕົ້ນດ້ານການຄ້າ-ການລົງທຶນ, ການທ່ອງທ່ຽວ ແລະ ຂົງເຂດອື່ນໆນັບມື້ຂະຫຍາຍຕົວ, ໂດຍຫຼ້າສຸດຂໍ້ມູນເຜີຍວ່າສະເພາະການຄ້າຂອງສອງປະເທດໃນປີຜ່ານມາເພີ່ມຂຶ້ນຈາກປີກ່ອນ 14,9% ບັນລຸເກືອບ 30 ພັນຕື້ກີບ, ຂະນະທີ່ການລົງ ທຶນຂອງຈີນຍັງຕິດອັນດັບໜຶ່ງໃນການລົງທຶນຕ່າງປະເທດຢູ່ລາວ.

 ອີງຕາມຂໍ້ມູນຈາກຄະນະກຳມາທິການຮ່ວມມືລາວ-ຈີນ ຫຼື ຄລຈ ໃຫ້ຮູ້ວ່າ: ສປປ ລາວ ແລະ ສປ ຈີນ ເປັນສອງປະເທດທີ່ມີສາຍພົວພັນທີ່ດີມາໂດຍຕະຫຼອ ດ, ອັນໄດ້ເຮັດໃຫ້ການຮ່ວມມືຂອງສອງປະເທດກາຍເປັນຂົວຕໍ່ທີ່ສຳຄັນໃນການຂະຫຍາຍການຮ່ວມມືໃນຂົງເຂດຕ່າງໆເປັນຕົ້ນດ້ານການຄ້າ-ການລົງທຶນ, ການທ່ອງທ່ຽວ ແລະຂົງເຂດອື່ນໆທີ່ນັບມີຂະຫຍາຍຕົວຢ່າງຕໍ່ເນື່ອງ ແລະ ເຮັດໃຫ້ມູນຄ່າການຄ້າລະຫວ່າງສອງປະເທດໃນປີ 2018 ຜ່ານມາສາມາດປະຕິ ບັດໄດ້ທັງໝົດ 3,47 ຕື້ໂດລາ ຫຼື ປະມານ 29,49 ພັນຕື້ກີບ ເມື່ອທຽບກັບປີ 2017 ເພີ່ມຂຶ້ນ 14,9%, ໃນນັ້ນສິນຄ້າຂອງລາວສົ່ງໄປຈີນມີມູນຄ່າທັງ ໝົດ 2,02 ຕື້ໂດລາ ແລະນຳເຂົ້າສິນຄ້າຈາກ ສປ ຈີນ 1,45 ຕື້ໂດລາສະຫະລັດ, ໂດຍມູນຄ່າການຄ້າດັ່ງກ່າວໄດ້ເຮັດໃຫ້ ສປປ ລາວ ກາຍເປັນອັນດັບທີ 2 ໃນບັນດາປະເທດສະມາຊິກອາຊຽນທີ່ມີການເຕີບໂຕຢ່າງວ່ອງໄວໃນຂົງເຂດການຄ້າກັບ ສປ ຈີນ,

  ສ່ວນສິນຄ້າຫຼັກໆທີ່ລາວສົ່ງອອກໄປຈີນແມ່ນແຮ່ທອງ, ໝາກກ້ວຍ, ທອງແດງ ແລະເຄື່ອງທີ່ເຮັດດ້ວຍທອງແດງ, ຝຸ່ນ (ປຸ໋ຍ) ແລະຢາງພາລາ, ສຳລັບສິນ ຄ້າຂອງຝ່າຍຈີນທີ່ລາວນຳເຂົ້ານັ້ນສ່ວນໃຫຍ່ແມ່ນຈຳພວກເຫຼັກ ແລະເຫຼັກກ້າ, ຜະລິດຕະພັນຈາກເຫຼັກ, ອຸປະກອນເຄື່ອງຈັກ (ນອກຈາກເຄື່ອງກົນຈັກພາ ຫະນະ), ອຸປະກອນສື່ສານ ແລະສິນສ່ວນອາໄຫຼ່, ເຄື່ອງໄຟຟ້າ ແລະອຸປະກອນໄຟຟ້າ.

  ໂດຍຂໍ້ມູນຍັງໃຫ້ຮູ້ອີກວ່າ: ນອກຈາກການຮ່ວມມືທາງດ້ານການຄ້າແລ້ວ, ສອງປະເທດລາວ-ຈີນ ຍັງມີການຮ່ວມມືທາງດ້ານການລົງທຶນໂດຍສະເພາະການ ລົງທຶນຂອງວິສາຫະກິດຈີນຢູ່ລາວ, ຊຶ່ງນັບແຕ່ປີ 1988 ມາຮອດເດືອນກັນຍາ 2018 ມີການລົງທຶນທັງໝົດ 777 ໂຄງການ,ລວມມູນຄ່າຫຼາຍກວ່າ 11,1 ຕື້ໂດລາ ຫຼື ປະມານ 94,35 ພັນຕື້ກີບ, ໃນນີ້ເປັນການລົງທຶນຂອງຝ່າຍຈີນ 100% ຄິດເປັນມູນຄ່າ 8,6 ຕື້ໂດລາ, ຊຶ່ງເຫັນໄດ້ວ່າມູນຄ່າການລົງທຶນຂອງວິສາຫະກິດຈີນຢູ່ລາວເພີ່ມຂຶ້ນໄວໃນແຕ່ລະປີ ແລະສະເພາະໃນປີ 2018 ຜ່ານມາ, ການລົງທຶນໂດຍກົງຈາກວິສາຫະກິດຈີນຢູ່ລາວ ມີ 139,24 ລ້ານໂດລາ, ທີ່ລົງທຶນໃນ 7 ໂຄງການ, ດັ່ງນັ້ນ ຈຶ່ງເຮັດໃຫ້ ສປ ຈີນ ກາຍເປັນອັນດັບໜຶ່ງໃນຈຳນວນ 53 ປະ ເທດ ແລະເຂດແຄວ້ນທີ່ມາລົງທຶນຢູ່ລາວ.

ພາບຂ່າວ

ໂດຍ: ໜັງສືພິມເສດຖະກິດ-ສັງຄົມ

แชร์