ເພີ່ມພູນຄູນສ້າງສາຍພົວພັນມິດຕະພາບ ການຮ່ວມມືຮອບດ້ານ ຫວຽດນາມ – ລາວ

ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ – ລາວ ແມ່ນມໍຣະດົກອັນລໍ້າຄ່າ, ໄດ້ກຳນົດທິດທາງ ແລະ ນຳພາຕາມແນວທາງອັນຖືກຕ້ອງ ຂອງສອງພັກຄອມມູນິດຫວຽດນາມ ແລະ ພັກປະຊາຊົນປະຕິວັດລາວ. ໃນສະຖານະການສາກົນ ແລະ ພາກພື້ນ ພວມມີການຜັນແປຢ່າງສັບສົນ, ແຜນນະໂຍບາຍ, ແນວທາງ ແລະ ນະໂຍບາຍ ຂອງສອງປະເທດ ນັບມື້ສະແດງໃຫ້ເຫັນແຈ້ງລັກສະນະຍຸດທະສາດ, ຄວາມພະຍາຍາມ ແນໃສ່ປັບປຸງ ແລະ ພັດທະນາສາຍພົວພັນຂຶ້ນສູ່ລະດັບສູງໃໝ່, ເພື່ອຜົນປະໂຫຍດອັນຊອບທໍາຂອງປະຊາຊົນສອງປະເທດ ແລະ ເພື່ອສັນຕິພາບໃນພາກພື້ນ.

ບົນພື້ນຖານທັດສະນະເອກະພາບ ຂອງສອງພັກກອມມູນິດຫວຽດນາມ ແລະ ລາວ ຖືວຽກງານປັບປຸງ ແລະ ເສີມຂະຫຍາຍສາຍພົວພັນມິດຕະພາບພິເສດ ແມ່ນບຸລິມະສິດອັນດັບໜຶ່ງ. ການພົວພັນການເມືອງ ແລະ ຄວາມໄວ້ເນື້ອເຊື່ອໃຈອັນສູງສຸດ ໄດ້ສືບຕໍ່ແມ່ນເສົາຄ້າ, ແມ່ນປັດໃຈພື້ນຖານຮັບປະກັນຄວາມສຳເລັດໃນທຸກຂົງເຂດຂອງການຮ່ວມມື. ແຜນນະໂຍບາຍນີ້ ໄດ້ສະແດງໃນບັນດາມະຕິກອງປະຊຸມໃຫຍ່ຂອງພັກ, ບັນດາຂໍ້ຕົກລົງຂັ້ນສູງ ແລະ ກົນໄກການຮ່ວມມືຍຸດທະສາດປະຈຳປີ. ສອງຝ່າຍ ໄດ້ຮັກສາການພົວພັນລະດັບສູງເປັນປົກກະຕິ, ໂດຍສະເພາະໃນບັນດາເຫດການສຳຄັນເຊັ່ນ: ການປະຊຸມປະຈຳປີ ລະຫວ່າງ ກົມການເມືອງຂອງສອງພັກ ແລະ ກອງປະຊຸມຂອງຄະນະກຳມະການຮ່ວມລັດຖະບານ ວ່າດ້ວຍການຮ່ວມມືທາງສອງຝ່າຍ ແມ່ນບັນດາກົນໄກສຳຄັນ ເພື່ອຄວາມເປັນເອກະພາບແຜນນະໂຍບາຍ, ແກ້ໄຂຂໍ້ຫຍຸ້ງຍາກທັນການ ແລະ ກຳນົດທິດຮ່ວມມືໃນແຕ່ລະໄລຍະ. ຮັບປະກັນການປະສານສົມທົບແໜ້ນ ໃນການແກ້ໄຂບັນດາບັນຫາພາກພື້ນ ແລະ ສາກົນ.
ດ້ວຍເສັ້ນຊາຍແດນຮ່ວມທີ່ມີຄວາມຍາວກວ່າ 2.300 ກິໂລແມັດ, ຫວຽດນາມ ແລະ ລາວ ໄດ້ໃຫ້ຄວາມສຳຄັນເປັນພິເສດ ຕໍ່ການຮ່ວມມືດ້ານການປ້ອງກັນຊາດ – ປ້ອງກັນຄວາມສະຫງົບ ແນໃສ່ປ້ອງກັນຄວາມໝັ້ນຄົງດ້ານການເມືອງ ແລະ ຄວາມເປັນລະບຽບຮຽບຮ້ອຍ ຄວາມປອດໄພສັງຄົມ. ນະໂຍບາຍການສ້າງຊາຍແດນສັນຕິພາບ, ມິດຕະພາບ ແລະ ການພັດທະນາ ສອງປະເທດ ຢຶດໝັ້ນຜັນຂະຫຍາຍ ຜ່ານກົນໄກການປະສານງານໃນການລາດຕະເວນ, ກວດກາ ແລະ ຕໍ່ສູ້ຕ້ານອາຊະຍາກຳຂ້າມຊາດ. ບັນດາກຳລັງທີ່ມີໜ້າທີ່ຮັບຜິດຊອບຂອງສອງຝ່າຍ ໄດ້ຮັກສາການແລກປ່ຽນຂໍ້ມູນຂ່າວສານເປັນປະຈໍາ, ສົມທົບກັນໃນການແກ້ໄຂບັນຫາທີ່ເກີດຂຶ້ນ, ເຮັດໃຫ້ຊາຍແດນກາຍເປັນຂົວຕໍ່ຂອງການຮ່ວມມື ເພື່ອປ່ຽນແທນເຂດກັ້ນຊາຍແດນ. ຄຽງຄູ່ກັນນັ້ນ, ຫວຽດນາມ ຍັງສືບຕໍ່ໃຫ້ການສະໜັບສະໜູນ ລາວໃນການຝຶກອົບຮົມ ແລະ ບໍາລຸງສ້າງພະນັກງານກໍາລັງປ້ອງກັນຊາດ – ປ້ອງກັນຄວາມສະຫງົບ, ປະກອບສ່ວນຍົກສູງກໍາລັງຄວາມສາມາດໃນການປ້ອງກັນປະເທດດ້ວຍຕົນເອງ, ຮັກສາໝາກຜົນແຫ່ງການປະຕິວັດ ແລະ ຄວາມໝັ້ນຄົງຍາວນານ.
ໃນຂົງເຂດເສດຖະກິດ, ແຜນນະໂຍບາຍໃຫຍ່ຂອງສອງປະເທດ ແມ່ນເຮັດໃຫ້ການຮ່ວມມືເສດຖະກິດມີຄວາມເທົ່າທຽມກັບຄວາມສາມາດບົ່ມຊ້ອນ ແລະ ການພົວພັນການເມືອງ. ຫວຽດນາມ ໄດ້ຮັກສານະໂຍບາຍເພື່ອສົ່ງເສີມວິສາຫະກິດເຂົ້າໄປລົງທຶນຢູ່ລາວ ໃນບັນດາຂົງເຂດທີ່ລາວມີຄວາມຕ້ອງການເຊັ່ນ: ພະລັງງານ, ໂຄງລ່າງຄົມມະນາຄົມ, ກະສິກໍາ ເຕັກໂນໂລຊີສູງ ແລະ ການບໍລິການ. ໃນທາງກັບກັນ, ຝ່າຍລາວ ໄດ້ສ້າງເງື່ອນໄຂສະດວກດ້ານເອກະສານ, ພື້ນທີ່ ແລະ ກົນໄກນະໂຍບາຍພາສີ ໃຫ້ແກ່ບັນດາໂຄງການລົງທຶນຈຸດສຸມຂອງຫວຽດນາມ. ໜຶ່ງໃນບັນດາກໍານົດທິດສຳຄັນ ແມ່ນການພັດທະນາການເຊື່ອມໂຍງໂຄງລ່າງຍຸດທະສາດ. ສອງປະເທດ ກຳລັງຍູ້ແຮງຜັນຂະຫຍາຍບັນດາເສັ້ນທາງບົກ, ທາງລົດໄຟເຊື່ອມຕໍ່ ແລະ ສືບຕໍ່ເສີມຂະຫຍາຍປະສິດທິຜົນ ທ່າເຮືອຫວຸງອາງ ທີ່ເປັນປະຕູອອກສູ່ທະເລຂອງລາວ. ບັນດາກໍານົດທິດດັ່ງກ່າວ ບໍ່ພຽງແຕ່ຊ່ວຍໃຫ້ລາວ ປະຕິບັດເປົ້າໝາຍການເປັນສູນກາງການເຊື່ອມຕໍ່ພາກພື້ນເທື່ອລະກ້າວ, ແຕ່ຍັງສ້າງຕ່ອງໂສ້ມູນຄ່າການເຊື່ອມຕໍ່, ຍົກສູງຖານະບົດບາດເສດຖະກິດ ຂອງສອງປະເທດ ໃນພາກພື້ນ.

ດ້ານການສຶກສາ – ບໍາລຸງສ້າງ ສອງປະເທດ ໄດ້ຖືເປັນນະໂຍບາຍການລົງທຶນເພື່ອອະນາຄົດ ແລະ ເປັນໜຶ່ງໃນບັນດາຂົງເຂດການຮ່ວມມືໝັ້ນແກ່ນທີ່ສຸດ. ແຕ່ລະປີ, ຫວຽດນາມ ໄດ້ຈັດສັນທຶນການສຶກສາເປັນຈຳນວນພັນທຶນໃຫ້ແກ່ນັກສຶກສາ ແລະ ພະນັກງານຂອງລາວ ໄດ້ໄປຮຽນຕໍ່ໃນຫຼາຍຂະແໜງການຕ່າງໆ ຕັ້ງແຕ່ການເມືອງ, ການຄຸ້ມຄອງລັດ ໄປຈົນເຖິງວິທະຍາສາດເຕັກນິກ. ນີ້ແມ່ນແຫຼ່ງສັບພະຍາກອນທີ່ມີຄຸນນະພາບສູງ ປະກອບສ່ວນສຳຄັນເຂົ້າໃນການພັດທະນາເສດຖະກິດ – ສັງຄົມຂອງລາວ ແລະ ເປັນຂົວຕໍ່ສຳຄັນ ລະຫວ່າງສອງຊາດ. ການຮ່ວມມືດ້ານວັດທະນະທຳ – ສັງຄົມ ກໍໄດ້ຈັດຕັ້ງຜັນຂະຫຍາຍເປັນປົກກະຕິ ຜ່ານບັນດາການເຄື່ອນໄຫວແລກປ່ຽນວັດທະນະທຳ, ສິລະປະ, ກິລາ ແລະ ການທ່ອງທ່ຽວ, ຊ່ວຍເພີ່ມທະວີຄວາມຜູກພັນ ແລະ ຄວາມເຂົ້າໃຈຊຶ່ງກັນແລະກັນ ໂດຍສະເພາະ ໃນກຸ່ມຄົນຮຸ້ນໜຸ່ມ. ພ້ອມກັນນັ້ນ, ການສຶກສາທີ່ເປັນມູນເຊື້ອການພົວພັນພິເສດ ລະຫວ່າງ ຫວຽດນາມ – ລາວ ໄດ້ຮັບການຍູ້ແຮງໃນໂຮງຮຽນ ແລະ ບັນດາອົງການຈັດຕັ້ງ, ປະກອບສ່ວນເພີ່ມພູນຄູນສ້າງນໍ້າໃຈມິດຕະພາບ ຫວຽດນາມ – ລາວ ໃຫ້ເຂົ້າສູ່ລວງເລິກ ແລະ ສະໜິດຕິດພັນຢ່າງໝັ້ນແກ່ນ.
ບັນດາແຜນນະໂຍບາຍ ແລະ ນະໂຍບາຍເອກະພາບ ຂອງສອງພັກ ແລະ ສອງລັດ ແມ່ນປັດໃຈຕັດສິນ ຮັບປະກັນໃຫ້ແກ່ສາຍພົວພັນພິເສດ ຫວຽດນາມ – ລາວ ລ້ວນແຕ່ຕິດແທດຕົວຈິງ, ສາມາດປັບຕົວເຂົ້າກັບສະພາບການໃໝ່ ແລະ ການພັດທະນາຢ່າງບໍ່ຢຸດຢັ້ງ. ຄວາມເອກະສູງດ້ານແນວຄິດການເມືອງ, ປະສິດທິຜົນໃນການຮ່ວມມືດ້ານເສດຖະກິດ ແລະ ຄວາມຜູກພັນທາງວັດທະນະທຳ – ສັງຄົມ ໄດ້ສ້າງກຳລັງແຮງສັງລວມ ຊ່ວຍໃຫ້ສອງປະເທດ ສາມາດຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍ. ບົນພື້ນຖານດັ່ງກ່າວ, ສາຍພົວພັນ ຫວຽດນາມ – ລາວ ຈະສືບຕໍ່ໄດ້ຮັບການຍົກລະດັບຂຶ້ນອີກ, ກາຍເປັນສັນຍາລັກແຫ່ງຄວາມສາມັກຄີທີ່ເປັນແບບຢ່າງ ປະກອບສ່ວນເຂົ້າໃນສັນຕິພາບ, ການຮ່ວມມື ແລະ ພັດທະນາ ໃນພາກພື້ນ ກໍຄືວົງຄະນາຍາດໂລກ.

แชร์